Ukusanga Ukusekelela mu Mulimo Wenu Uwashila

¹ Babwelele no “kusekelela.” Baibolo ilangilila fintu abasambi 70 bali ne nsansa lintu baishileshimikilako Yesu ifyo cali, pa numa ya kushimikila mu ncende ishingi. Bali ne nsansa pa mulandu wa kucita ukufwaya kwa kwa Lesa. (Luka 10:17) Finshi fingamwafwa ukuti na imwe musange ukusekelela kwapalako mu mulimo wenu uwashila?

² Ukuba Abaishininkisha: Mwalikwata ishuko Lesa amupeela ilya kusambilishako abantu imifwaile ikalamba iya kwa Yehova. Ukupitila mu kushimikila, kuti mwaafwilisha umuntu ukuleka imyendele ya museebanya iya cino calo no kulubuka ku kupepa kwa bufi. Kuti mwatambika abantu isubilo lya bumi mu calo umushakabe amalekano ayaba muli cino calo twaikala ilelo. Tontonkanyeni fintu Yehova asekelela lintu mwatunguluka mu kubyala imbuto sha cine mu mutima wa muntu uwatemwa icine. Beni abaishininkisha ilyo mulepepela umupashi wa kwa Lesa ku kumwafwilisha ukulundulula icisabo ca kusekelela ilyo mulebomba ubutumikishi no mutima wenu onse.

³ Ukukansha Kubomba: Inshita Yesu abomfeshe mu kukansha abasambi bakwe 70 yapashanishiwa ku Kulongana kwa Mulimo ukwa ndakai. Alibakanshishe pa kuti bengabomba bwino ubutumikishi bwabo. (Luka 10:1-16) Muno nshiku, Ukulongana kwa Mulimo kumukansha mu nshila sha kulandilamo na bantu, ifya kutendeka ukulanshanya, ne fya kutendeka no kutungulula amasambililo ya Baibolo. Ukupitila mu kubombesha no kuwamyako ukulamuka kwenu ukwa kushimikila, kuti mwasanga ukuti mwaleka ukumfwa umwenso nelyo ukumfwa nga bashafikapo, ifyo mwaleumfwa kale kabili kuti mwatendeka ukumfwa abaicetekela sana e lyo kuti mwaba abasekelela.

⁴ Tontomesheni pa Nshita ya ku Ntanshi: Yesu alisangile ukusekelela mu mulimo wakwe uwashila te mulandu no kucula kuntu ashipikishe. Mulandu nshi? Pa mulandu wa kuti atontomeshe amenso sana pa mapaalo na mashuko ali no kukwata ku ntanshi. (Heb. 12:2) Na imwe bene kuti mwacita cimo cine ukupitila mu kutontomesha pe shina lya kwa Yehova na pa mapaalo yakaba mu calo cipya ica kwa Lesa. Ici cikalundako ukusekelela ku butumikishi bwenu no kubulenga ukubamo imifwaile.

⁵ Ukubombela Yehova umulimo washila e shuko lyakulisha pali yonse ilyo mwingakwata lelo. E ico, mwingasosa amuti: “Nabekelwo kucite co mutemenwe, mwe Lesa wandi.”—Amalu. 40:8.