Bushe Mulatasha pa Kutekanya kwa kwa Yehova?

¹ Nga Yehova talolelele pa myaka yapitapo 10, 20, nangu iyafulilako, no kusuminisha ubunte bwakulilako ukushimikilwa, bushe nga mwalisambilile cine? Fintu tutasha pa kuti alisuminisha abantu abengi na bambi “ukulola ku kulapila.” Nalyo line, ubushiku bwa kwa Yehova ubukulu “bukesa ngo mupupu.” (2 Pet. 3:9, 10) E co, tatufwile ukutontonkanya ukuti ukutekanya kwa kwa Lesa ninshi kushingashinga mu kuleta impela ya buno bwikashi.—Haba. 2:3.

² Ikatilweni Abantu Inkumbu: Ukushishimisha kwa kwa Yehova te kuti tukumfwikishe. Tatufwile ukulaba imifwaile ya kuko. (Yona 4:1-4, 11) Yehova alamona imibele ya bulanda abantunse babamo kabili alabekatilwa inkumbu. E fyo na Yesu omfwa. Pa kwikatilwa inkumbu amabumba aleshimikilako, alefwaya umulimo wa kubila imbila ukufika ukutali pa kuti abengi bakwate ishuko lya kunonko mweo wa muyayaya.—Mat. 9:35-38.

³ Ilyo kwaba utuyofi na masanso, bushe tatulangulukilako abashaishiba cine? Abantu lelo baba nge “mpaanga ishishaba na kacema” ilyo baleesha ukucimfya no kwishiba umo icimfundawila ca mu calo cilolele. (Marko 6:34) Tulasansamusha abalemenena ku bulungami ukupitila mu kushimikila imbila nsuma mu kupimpa kabili tulangilila ukuti tuletasha Yehova pa kutekanya kwakwe.—Imil. 13:48.

⁴ Umulimo Wesu Walipamfya: Uyu mwaka wapwile, abantu 323,439 balibatishiwe na basangilwe ku Cibukisho bacilile pa mamilioni 14. Mwandi kuli isubilo lya kuti abengi kuti bafulumuka uboni buleishila buno bwikashi! Tatwaishiba impendwa iyo “ibumba likalamba” likafika. (Ukus. 7:9) Tatwaishiba ubutali bwa nshita umulimo wesu uwa kushimikila ukatwalilila. Lelo Yehova alishiba. Imbila nsuma ikashimikilwa ukufika apo umwine akamona ati capwa, “e lyo impela ikesa.”—Mat. 24:14.

⁵ Naipipa inshita yashalako, kabili ubushiku bwa kwa Lesa nabusungamina. (1 Kor. 7:29a; Heb. 10:37) Ukwabula no kutwishika “ipusukilo nalipalama ukucila ilyo twatendeke ukutetekela.” (Rom. 13:11) Shi twifilwa ukumfwikisha imifwaile ya kutekanya kwa bulesa. Lelo, lekeni tuleshimikila mu kupamfiwa pa kuti abengi abafwaya ubulungami bengamona inkumbu shakulisha isha kwa Yehova.