Ukutemwa E Kutucincisha Ukuti Tuleshimikila
1 Abantu balishiba bwino ukuti fwe Nte sha kwa Yehova twalipimpa ku kushimikila ubukombe bwa Bufumu. (Mat. 24:14) Inte ukucila pa mamilioni 6 shileshimikila mwi sonde lyonse; abapya tulabapendelako lilya batendeka ukushimikila na ifwe. Impendwa tupenda ya bantu babomba umulimo wa kushimikila.
2 Cinshi citulenga ukuba abaitemenwa ukubomba uyu mulimo ushayanguka? Tatupatikishiwa, tatucincishiwa ku kufwaya ukunonkelamo icuma, kabili tatubombela ukuti batutashe. Pa kutendeka fye, fwe bengi twaletiina pantu twaleimona ati tatwafikapo, kabili abengi abo twalefwaya ukulandako tabalebikako na mano. (Mat. 24:9) Abengi abatumona balafilwa ukumfwikisha icilenga ukuti tulebomba uyu mulimo. Kufwile kwaba cimo icilenga ukuti tube no mupampamina wa kutwalilila ukubomba.
3 Amaka ya Kutemwa: Yesu asokolwele ifunde lyakulisha pali yonse lintu atile tufwile ‘ukutemwa Shikulu Lesa wesu ku mutima wesu onse, na ku mweo wesu onse, na ku mano yesu yonse, na ku maka yesu yonse.’ (Marko 12:30) Ukutemwa twatemwa Yehova kwalimbe mishila mu kumfwikisha kwesu ukwa fyo Yehova aba, twamwishiba ati ni Mulopwe kabili Kateka, Kalenga wa fintu fyonse, uwawamina ‘ukupokelelo bukata no mucinshi na maka.’ (Ukus. 4:11) Takwaba ico twingalinganya ku mibele yakwe iyapesha mano.—Ukufu. 34:6, 7.
4 Ukwishiba no kutemwa Yehova kutucincisha ukulenga ulubuuto lwesu ukubalika ku cinso ca bantu. (Mat. 5:16) Ulubuuto lwesu lulabalika ilyo tulumbanya Yehova ku cintubwingi, ilyo tulanda pa milimo yakwe iyapesha mano, na lintu tubila ubukombe pa lwa Bufumu bwakwe. Nga filya ficita malaika uupupuka mu kati ka muulu, twasenda ‘imbila nsuma ya muyayaya iya kubila . . . ku luko lonse no mukowa no lulimi na bantu.’ (Ukus. 14:6) Ukutemwa kwesu e kulenga ukuti tulebomba umulimo wa kushimikila mwi sonde lyonse.
5 Icalo cimona ukushimikila ukuti “buwelewele” ubushili bwa kukutikako. (1 Kor. 1:18) Abantu mpanga yonse balatukuta ukwesha ukupumfyanya umulimo wesu. Ukutemwa kwesu ukwa cishinka kwalitukosha ukulanda mu kushipa, nge fyalandile abatumwa ukuti: “Pantu ifwe twafilwa ukuleko kulande fyo twamwene no kuumfwa. . . . Tuli no kunakila Lesa ukucilo kunakila abantu.” (Imil. 4:20; 5:29) Umulimo wa kushimikila uletwalilila ukutanunuka mwi sonde lyonse te mulandu no kukaanya.
6 Ukutemwa kwesu kuli Yehova ukwaba ngo mulilo uulepya, kutucincisha ukubila ifya bulumba fyakwe. (Yer. 20:9; 1 Pet. 2:9) Tukatwalilila ‘ukulenga abantu na bantu ukwishibe milimo yakwe, . . . pantu acite fya kupuulama’!—Esa. 12:4, 5.