Umukululo wa Fipusho

◼ AmaBaibolo ya mu ndimi sha cikaya ayashipulintwa na Sosaite yalingile ukumonwa shani?

AmaBaibolo ya mu ndimi sha cikaya ayashipulintwa na Sosaite yaba fipe fyalamwa ifilingile ukupeelwa fye kuli bakasabankanya epela te ku cintubwingi iyo kabili tayafwile ukushalikwa mu butumikishi bwesu ubwa ku ng’anda ne ng’anda. Fyaba fipe fya kuorda mu kuibela, pamo nga Baibolo wa Deluxe, Insight on the Scriptures, Reference Bible, amabaundi volyumu, amakaseti ya mu cilimba na ya vidio, na fimbipo. Icilonganino cilingile ukuorda fye ifi fipe fya kuorda mu kuibela ilyo kuli abalefwaya aba kulungatika.

Pali uyu mulandu, Sosaite nailanshanya na bapulinta amaBaibolo mu ndimi sha cikaya ukuti yakulashita amaBaibolo pali K13,000.00 imo. Aya maBaibolo yakulapeelwa kuli bakasabankanya ukupitila mu nshila ipya iya kushalikilamo impapulo ukwabula ukulipilisha. Kuti yapeelwa na ku basambi ba Baibolo abalelunduluka, abaishiba ukubelenga kabili abasangwa ku kulongana. Lelo, tayafwile ukushalikwa mwi bala.

Ilyo tulepokako amaBaibolo mu ndimi sha cikaya, tatulingile ukupoka ayengi nga nshi. Kwena, tabakatwebe ukulipila indalama apa kupokela impapulo, lelo, ifwe bonse tulingile ukumona ukuti mulimo wesu ukusangwilako. Abalefwaya ukusangwilako mu kuitemenwa balingile ukubika ubupe bwabo mu tubokoshi twalembwapo ukuti “Imisangulo ya Kwafwilisha Umulimo wa Mwi Sonde Lyonse uwa Sosaite.—Mateo 24:14.” Nga ca kuti umusambi wa Baibolo uulelunduluka uwapokako Baibolo takwete indalama sha kusangwilako, kasabankanya alingile ukumona ukuti mulimo wakwe kabili lishuko lyakwe ilya kucindika Yehova ku fyuma fyakwe.—Amapi. 3:9.

Cili icacindama ukuti tubombe ne yi mitantikile mu nshila ya kuti abantu tabamwene kwati tuleshalika amaBaibolo ayo tushipulinta ukwabula ukulipilisha nangu panono. E ico, bamunyina abalebombela ku fitabo bafwile ukuba abaibukila ukumona maka maka abalefwaya impapulo ishingi umulesansha amaBaibolo ya mu ndimi sha cikaya nga ca kutila kale tabalesenda ifitabo ifingi. Aba musango yu balekabila ukubebetwa bwino bwino. Mwipeela aya maBaibolo ku bantu bambi nangu panono nangu ca kutila bamulomba ukuti mubapeko. Napamo kuti mwabakoselesha ukuishitila amaBaibolo mu ndimi shalekanalekana mu mashitolo bashitisha ifitabo.