Isukulu lya Shibukeni ku Bantu ba kwa Lesa
1 Kale abantu ba kwa Lesa balishibe sana ukulemba no kubelenga. Mose, Yoshua, Imfumu sha bena Israele, Yesu na batumwa bakwe balishibe ukulemba no kubelenga. Pali lelo, abengi balishiba ukuti ukwishiba ukulemba no kubelenga kubalenga ukwakanamo nga nshi mu kupepa Lesa.—2 Imila. 34:14; Yosh. 1:8; Amala. 17:18, 19.
2 E co cila cilonganino cilekoseleshiwa ukupanga isukulu lya shibukeni ilya bakalamba ilya lyonse ukubomfya akatabo ka kusambililamo akapekanishiwa no musha wa cishinka kabili uwashilimuka. Kuti cawama sana ukusunga apo mulemba amashina ya basangwako lyonse no bushiku balembeshe. Iofeshi linono ilya Nte sha kwa Yehova nelyo kangalila wenda kuti baipusha ifyo mulebomba ukulosha kwi sukulu lyaba pa cilonganino cenu.
3 Yehova Lesa alipeela abantu amaka ya kubelenga no kulemba. Nalyo line, ukubombesha kulafwaikwa pa kwishiba ukubelenga no kulemba. Cilambu nshi cikalamba icaba mu kusambilila ukubelenga no kulemba? Kuti mwabula Icebo ca kwa Lesa no kumfwila ifunde lya bulesa ilitila: “Uletontonkanyamo akasuba no bushiku.”—Yosh. 1:8.
(1) Cincisheni abasambi. Komaileni pa busuma bwaba mu kusambilila ukubelenga no kulemba. Afweni abasambi ukwimika amabuyo ayo bengafikapo.
(2) Tantikeni ukulasambilila imiku iingi cila mulungu. Pekanyeni ifya kuti bayabombela ku ng’anda ilyo mushilaya mwi sambililo limbi.
(3) Lengeni amasambililo ya kubelenga ukuba ayayanguka kabili ayepi—Mwicilamo ukufusha ifya kusambilisha abasambi.
(4) Koselesheni abasambi kabili bafweni ukulunduluka muli fyonse ifyo balesambilila.
(5) Afweni abasambi ukubomfya ifyo balesambilila ubushiku bumo bumo.
(6) Sambilisheni ifilekabilwa—Abakalamba bantu bapamfiwa!
(7) Cindikeni abasambi—Mwibalenga insoni nelyo ukubasaalula.
(8) Ishibeni amafya umo umo akwete—ukukanamwenesha ku musambi mukalamba nelyo ukukanaumfwikisha kuti fyalenga afilwa ukulunduluka bwangu.
(9) Umusambi alingile ukutendekelako ne filembo fya muli alufabeti ifyapulintwa ilyo ashilayamba ukulemba icikulakula (ukusuntinkanya ifilembo).
(10) Ilingi line kulaba ukwishiba bwangu ukubelenga ukucila ukulemba. Mwishingashinga ukukonkanyapo na masambililo ya kubelenga ati pantu fye umusambi alefilwa ukulemba.
(11) Ukusambilila ukulemba na bopeni nelyo pensulo kuti kwapelenganya umusambi. Mwikosela fye pa kuti fyonse fiwamishe!