‘Bapeele Icawamisha’

Umulimo wesu lyonse utungililwa ne misangulo ya kuitemenwa kabili ukatwalilila ukutungililwa ne yi yine misangulo. Inshila yayanguka iya kushalikilamo impapulo ikomaila pa cishinka ca kuti te ndalama tufwaya ilyo tuleshimikila imbila nsuma. Tatuli “nga ba cinabwingi, abenshe cebo ca kwa Lesa ku kumwenamo; lelo nga ba bufumacumi, nga ba kwa Lesa” tubilisha imbila nsuma ya Bufumu. (2 Kor. 2:17; Mat. 24:14) Pa kufwaya ukutasha pali fyonse ifisuma, shikulu bantu umo no mukashi wakwe ababombela Lesa pa myaka iingi nga nshi bashitishe ing’ombe no kutuma indalama ku ofeshi lya Nte sha kwa Yehova. Muli kalata wabo balandile ne fyaba pali 1 Imilandu 29:14, ukusosa ati: “Tulemona ukuti nacilinga ukupeela Yehova icawamisha ico kale kale akwata.”

Mulandu nshi tushifwile ukupelela fye pa kupeela utunono, ilyo natwishiba no kutila kuti twapeela icisuma nelyo icawamisha? Pantu lyaba lifunde lyabikwa pa Bena Kristu ukufuma mu Cebo ca kwa Lesa, kabili twalikwata ne fya kumwenako fya bacitile ici, nga fintu fye twamona pano. Kabili, kulaba ukumfwa bwino ukwishiba ukuti natucimfya iyi mibele ya bukaitemwe iyo twafyalwa na yo no kuti natupeela ukulingana napo tukwatile. Kabili, icacila na pali ci, kwaliba ne cishinte ca mu Malembo icilanda pa fya musango yu, icilondolola ifitumbuka mu fyo tucita aciti: “Uutanda aleceefya, akaseepe fyaceepa; kabili uutanda alefusha, akaseepe fyafula.” Ukuseepe nshi? Te cibwesha ca ku mubili lelo ca ku mupashi, ukulingana na mashiwi ya kwa Yesu aya kuti: “Ukupeela ce shuko ukucilo kupokelela.”—2 Kor. 9:6; Imil. 20:35.