Icitetekelo Cesu Citulenga Ukubomba Imilimo Isuma
1 Icitetekelo calengele Noa, Mose, na Rahabu ukucita fimo. Noa akuulile icibwato. Mose asuulile imikalile ya muilemeno iya pa kashita kanono mwi sano lya kwa Farao. Rahabu afishile inengu kabili alyumfwilile ifyo bamwebele, apuswishe aba ng’anda yakwe. (Heb. 11:7, 24-26, 31) Milimo nshi iisuma iyo icitetekelo cesu citulenga ukubomba pali ndakai?
2 Ukushimika Ubunte: Icitetekelo citulenga ukulanda pali Lesa wesu uwawamisha na pa fyo ateyanya pa kuti tube ne nsansa sha pe. (2 Kor. 4:13) Limo limo, kuti twashimunuka ukushimika ubunte. Lelo nga ‘twabika Yehova ku ntanshi yesu pe,’ tulakoshiwa no mwenso ulapwa. (Amalu. 16:8) Lyene icitetekelo cesu cilatucincisha ukushimikila imbila nsuma kuli balupwa lwesu, abena mupalamano, abo tubomba na bo, abo tusambilila na bo, na bonse pa nshita yalinga.—Rom. 1:14-16.
3 Ukulongana: Ukusangwa ku kulongana lyonse na o mulimo usuma uubombwa pa mulandu wa citetekelo. Mu nshila nshi? Ukusangwa ku kulongana lyonse kulanga ukushininwa kwesu ukwa kuti Yesu ali na ifwe ukupitila mu mupashi wa mushilo uwa kwa Lesa ilyo tuli ku kulongana kwa Bwina Kristu. (Mat. 18:20) Ukusangwa ku kulongana kulanga ukuti tulefwaisha ‘ukumfwa ico Umupashi ulesosa ku nkuta.’ (Ukus. 3:6) Tulomfwila ico twasambilila pantu amenso yesu aya citetekelo yalatwafwa ukumfwikisha ukuti uuletusambilisha ni Kasambilisha wesu, Yehova.—Esa. 30:20.
4 Ifyo Tusala: Ukushininwa nga nshi ukuti kwaliba ifintu fya cine ifyo tushimona kutulenga ukubika ifya ku mupashi intanshi mu mikalile yesu. (Heb. 11:1) Ici ilingi line cisanshamo ukuipusulako ifya ku mubili. Ku ca kumwenako, eluda akeene icifulo ca pa muulu ku ncito pantu nga camulengele ukulapuswa ku kulongana, ukulaasha ulupwa lwakwe, no kuleka bupainiya. Shi na ifwe natucetekele nga nshi ubulayo bwa mu Baibolo ubwa kuti Yehova akapeela bonse ‘ababala bafwaya ubufumu . . . no bulungami bwakwe.’—Mat. 6:33.
5 Bambi balamona amaka yene yene ayo icitetekelo cakwata mu mikalile yesu. Cine cine, icitetekelo cesu calishibikwa mu calo conse. (Rom. 1:8) Shi ifwe bonse, natulange ku milimo yesu iisuma ukuti icitetekelo cesu ca mweo.—Yako. 2:26.