Amasanso

Amasanso ayengi ayaleta imfwa yalishimikwa mu misebo yesu. Limo limo aya masanso yalakuma na babomfi ba kwa Yehova. Nangu fye ni ku ncito atemwa ku ng’anda kuti kwaba ubusanso bwingaleta imfwa. Amalembo yafwilisha Abena Kristu ba cine ukumfwikisha ukuti umweo untu washila kabili bafwile ukucitako fimo ifikabilwa ku kucincintila amasanso. Ici kuti caba kusunga bamotoka besu abatuntulu no kushininkisha ukuti amayanda yesu yali bwino. Ku kukomaila pa fyo uyu mulandu ucindeme, twabwekeshapo “Ifipusho Ukufuma ku Babelenga” ifyali mu Ulupungu lwa kwa Kalinda ulwa mu ciNgeleshi ulwa August 15, 1963 amabula 510-11. Ifi fyebo ficili filebomba kabili ifishinte fyabamo filafwilisha baeluda ukwishiba ifyalinga ukukonka ilyo kwaba ubusanso ubwaleta imfwa. Tacili icakumanina ukushintilila fye pa fyo baKapokola nelyo bainshuwalansi bengatweba ifishingasanshamo ifishinka fyonse.

¹ Nga ca kutila Umwina Kristu aleensha motoka e lyo kwaba ubusanso bwa pa musebo na bantu bafwa, cinshi icilonganino ca Bwina Kristu cilingile ukucita nga ca kutila pali umulandu wa mulopa? Ni shani nga ca kutila namutekenya atoba ifunde lya kwa “Kaisare” nelyo ukubutusha sana motoka nelyo ukuba no mulekelesha?

² Mu milandu ya kwipaya umuntu umo nelyo abengi mu masanso ya pa musebo, nga kuli umulandu wa mulopa, uyo mulandu ulingile ukulandwapo na komiti wa bupingushi wa mu cilonganino ico namutekenya abamo. Nangu line icilye catila namutekenya takwete umulandu, kuti cawama komiti wa bupingushi wa mu cilonganino ukuceeceeta namutekenya no kumona nga cine cine, kuti aba no mulandu wa mulopa. Ici calicindama pantu icilonganino tacilefwaya bonse ukukumwako ku mfwa ya muntu iyafuma bu busanso, ku mulandu wa mulekelesha wa Mwina Kristu nelyo ku mulandu wa kusuula amafunde ya pa musebo aya kwa “Kaisare.”

³ Nga ca kutila namutekenya asangwa mu busanso bwa pa musebo umwafwa no muntu mubomfi wimininako icilonganino kabili apeelwa umulandu wa mulopa, te kuti ciwame uyu ukutwalilila ukuba umubomfi. Nga ca kutila umulekelesha e walenga, namutekenya umwine e ukashingamwa no mulandu wa mulekelesha wakwe nelyo ukukanakonka amafunde ya pa musebo.—Gal. 6:5, 7.

⁴ Nga ca kutila palya umusebo wacilinganya inyanji tapali amalaiti ya kusoka, indibu nelyo impongolo, nalyo line namutekenya alingile ukupoosako amano ukulolekesha ilyo ashilapita pa nyanji. Nga kashishi kamupumfyenye, namutekenya alingile ukwimika motoka no kukafumya. Nga ca kutila uwaikele ku numa e o balelanshanya nankwe, namutekenya wena alingile ukulolesha pa musebo, talingile ukwensha no kulolesha uuli ku cipuna ca ku numa. Nga ca kutila imiceele tayali bwino, namutekenya alingile ukupoosako amano sana. Nga aleshipula, alingile ukupeela umbi e waensha, nelyo alingile ukwimika motoka no kutuusha ukufikila utulo twapwa.

⁵ E ico, kuti cawama komiti wa bupingushi wa mu cilonganino ukufwailisha uyu mulandu no kumona nga ca kutila namutekenya alicitileko fimo ifyalengele ukuti kube ubusanso bwa pa musebo ubwaletele imfwa. Cisuma ukwibukisha ukuti kale uwaipayo muntu mu kuluba mu Israele no kubutukila ku mushi wa kushinamo alelubulula intanshi ku balashi ba mu mushi ilyo ashilasuminishiwa ukwikala mu mushi wa kushinamo, pa kuti engacingililwa kuli kalandula wa mulopa.—Impe. 35:6-25.

⁶ Nga ca kutila ubusanso bwacitike pa mulandu wa kuti namutekenya takwete ca kucita ku kucincintila ubo busanso, lyene, alingile ukwelelwa kabili tafwile ukupeelwa umulandu nelyo umo uwingabifya ishina lyakwe, nga ca kuti mubomfi mu cilonganino. Lelo nga ca kuti kuliko icilubo cimo ico namutekenya apangile, lyena kuti cawama ukumupoka umulimo wakwe no kulolela papita umwaka umo e lyo engabebetwa na kabili nga nalinga ukupeelwa umulimo mu cilonganino. Ici cikalenga ukwishibikwa ukuti komiti wa bupingushi talefwaya icilonganino conse ukupeelwa umulandu wa kwipaya umuntu pa kuleka uyo namutekenya uuli no mulandu wa mulopa ukutwalilila ukuba ne cifulo icikalamba, ukuba umwiminishi, nelyo ukubomba imilimo ikalamba mu cilonganino. Nga ca kutila namutekenya wapeelwa umulandu tali mubomfi mu cilonganino, uyo muntu tafwile kuba umubomfi mpaka papitako inshita pa numa ya ici. Apo namutekenya tali ca kumwenako cisuma ku mukuni, abali muli komiti bafwile ukuba abashilimuka no kulolelako inshita yalinga ilyo bashilatendeka ukumupeelako imilimo ya kusambilisha icilonganino.

⁷ Nga ca kutila namutekenya ali no mulekelesha, kuti cawama ukuti komiti amufunda no kumwafwa ukulaibukisha ukuti na o alishingamwa. Komiti kuti yapima nampo nga naishibe ci no kulapila kabili nalomba ubwelelo kuli Yehova Lesa ukupitila muli Yesu Kristu.

⁸ Pa numa ifyalemulenga ukukanafikapo fyapwa, pa mulandu wa kuti alemoneka ukuti namwenamo mu kufunda kabili alelanga umupashi usuma kabili nalapila icine cine, kuti asontwa na kabili ukubomba umulimo mu cilonganino nga ca kutila uyo mulimo e ko uli kabili kuli ukukabila.

⁹ Nalyo line, nga ca kutila namutekenya, atwalilila ukuba no mulekelesha nelyo taleumfwila amafunde ya pa musebo aya kwa “Kaisare,” ninshi te kuti alangulukwepo ukuba umubomfi mu cilonganino. Namutekenya tafwile ukubutusha motoka ukucila pa fipimo “Kaisare” abika mu misebo yakwe iikalamba ne inono. Nga Mwina Kristu waipeela kabili abutusha motoka ukucila pa cipimo capeelwa ukubutushishapo, ninshi afilwa ukupeela Kaisare ifya kwa Kaisare, kabili kuti aponena mu busanso bwa pa musebo, no kulenga imfwa.—Mat. 22:21.

¹⁰ E co bonse abakwata imilimo mu cilonganino bafwile ukuba fya kumwenako fisuma mu myenseshe yabo. Bushe kangalila kuti aba ca kumwenako ca musango nshi ku mukuni nga ca kuti aba no mulekelesha ku mafunde ya pa musebo aya kwa “Kaisare”? (1 Pet. 5:3) Bushe kuti caba shani ku balumendo ba mu cilonganino nga ca kutila bamona kangalila aba ni kalapashi mu kubutusha motoka? (Tito 2:6, 7) Apo twamona ukuti ukwensha motoka cintu cakakala, abafyashi ba Bwina Kristu abasuminisha bana babo abalumendo ukwensha motoka wabo bafwile ukushininkisha ukuti babasambilisha bwino ukwensha no kubapa amafunde. Maka maka balekabila ukusokwa pa fyo bashingamwa kuli “Kaisare” na kuli Lesa, na pa lwa kukanapashanya imyenseshe ya bacaice ba ku calo abo ilingi line basangwa mu masanso ya pa musebo, nalimo pa mulandu wa kubutusha sana. Nga ca kutila Umwina Kristu waipeela aleyensha bubi bubi nelyo aletoba amafunde ya myenseshe no konaula ifintu fya bene nelyo ukucena bambi, lyena komiti wa bupingushi mu cilonganino afwile ukumusalapula ukusalapula kwalinga.

¹¹ Na kabili, ilyo Abena Kristu balebomba imilimo ya cilonganino nelyo mu mibombele yabo na Bena Kristu bambi, tabafwile ukulenga bambi ukwiminina pa ncende imo pa nshita bashingakumanisha ukufika ukwabula ukutoba amafunde ya kwa “Kaisare” ayalanda pa cipimo ca kubutushishapo. Umuntu alingile ukwebelwa kabela inshita pa kuti aleensesha pa cipimo casuminishiwa ne funde. E ico nga ca kutila umuntu alefwaya Umwina Kristu ukuya ku ncende imo mu nshita alefwaya kabili ukucite fyo kulelenga namutekenya ukutoba amafunde ya kwa “Kaisare” aya kukanabutusha, lyena Umwina Kristu akapingulapo ukumfwila ifunde lya kwa “Kaisare,” te mulandu nangu engakandwa pa mulandu wa kumfwila ilyo ifunde. Ku ca kumwenako, Umwina Kristu alingile ukwebela libela umwine wa ncito ukuti, kampingu wakwe talemusuminisha ukutoba amafunde ya pa musebo.

¹² Nalyo line, ilingi line, nampo nga namutekenya naishiba nelyo iyo, icifwaikwa fye kutila atendekako bwangu nelyo ukutelula ifyo ateyenye pa kuti akwata inshita iikulu iya kwenda. Lyene Umwina Kristu takapupumine ukuti nacelwa nelyo ukutunkwa ukubutusha sana ukucila pa cipimo alingile ukwenseshapo. Ukumfwila amafunde ya pa musebo aya “bakateka bacilamo” kukacingilila namutekenya ku masanso ya pa musebo ayengamuletela umulandu wa mulopa kabili kukamulenga ukuba na kampingu musuma, uufwaikwa sana pa kwisapusuka.—Rom. 13:1, 5; 1 Pet. 3:16.