Peeniko Bambi Ifyo Balekabila
1 Yehova atuteyanishisha ifyo tukabila lwa ku mupashi ukupitila mu “musha” wa cishinka. (Mat. 24:45-47) Pa fingi ifyo atuteyanishisha paba ne fitabo, amaBaibolo, amabaundi volyumu, amavidio, amatepu, na madisiki ya muli kompyuta aya kubomfya pa kusokota ifya mu Baibolo. Yehova lyonse atupeela ifyalinga pa kuti takuli fya konaula. Atwenekela ukupeelako bambi, alashininkisha ukuti bonse bamwenamo ukwabula umuncishanya.
2 Ukuteyanya konse uku kusanshamo indalama ishingi. Ishi ndalama shifuma ku ba bwananyina baba mwi sonde lyonse. E fyo caba maka maka ukutula apo ukuteyanya kwatendekela imitantikile ya kwananya impapulo ukwabula ukulipilisha, ukucetekela umupwilapo ukuti indalama sha kubomfya shakulafuma mu misangulo ya kuitemenwa. Kabili, imisambo iingi ilapokelela ishi mpapulo ukufuma ku Sosaite pa mutengo ulenga bamunyinefwe ukukwata ifyo balekabila pa kulongana konse na mu mulimo wa mwi bala nangu line balipelebela mu fintu.
3 Ifyo Twingafwilishako: Kuti twaumfwila ukufunda kwa kwa Paulo ukwa kupeelako bambi “mu kukabila kwabo.” (Rom. 12:13) Ilyo twasangwilako indalama ku mulimo wa mwi sonde lyonse, ninshi tulepeelako bamunyinefwe baba mwi sonde lyonse mu kulungatika. Ukulaibukisha ico kwalenga bamo ukulapaatulapo indalama shimo isha kusangwila ku mulimo wa mwi sonde lyonse cila mweshi, nga filya fine basangwila ku ndalama shibomfiwa ku Ng’anda ya Bufumu. Balishiba ukuti ishi ndalama shilabomfiwa ku kupulinta impapulo e lyo na kuli fimbi ifikumine umulimo. Tontonkanyeni pa fyo bamunyina mu calo conse bengamwenamo sana nga ca kutila abafulilako balesangwilako lyonse muli iyi nshila.
4 Na kabili, kuti twapeelako bambi nga ca kutila lyonse tatuleipusha ukutupeelako impapulo isho twakwata kale. Ukuorda fye ifyo tulekabila kulenga bamunyinefwe kumbi ukupokelela ifya ku mupashi ifyo na bo balekabila pa kutwalilila abakosa kabili pa kuti bengalatwala pa ntanshi umulimo wa kushimikila imbila nsuma uko bekala.—Heb. 13:16.
5 Tulingile maka maka ukwibukisha ici ilyo tuleipusha ifintu ifyo Sosaite ipoosapo indalama ishingi pa kufipanga. Ifi fisanshamo amavidio, ama CD-ROM ya mu kompyuta, ifitabo fikalamba ifya kuloshako, na mabaundi volyumu. Ukucila ukuordela cila muntu mu lupwa ifi fintu, bushe bonse mu lupwa te kuti babomfye fye cimo? Nga twacefyako ifyo tulesenda, bambi na bo kuti basendako ifyo fine fintu ifisuma ifyo tuipakisha.—Fil. 2:4.
6 Indalama shipooswa ku mpapulo tushalika mwi bala shimo shifuma mu misangulo tupeela ku Ng’anda ya Bufumu isha mulimo wa mwi sonde lyonse uwa Sosaite e lyo shimbi shifuma ku balefwaya ukusambilila kabili abasumina ukusangwilako. Na lyo line, ilyo twaipusha ukuti batupeeleko impapulo tubomfya, kumo ne fitabo fya nyimbo, amaYearbook, amaBaibolo ya nkupo yanaka, ne mpapulo shimbi, teti twenekele aba ku nse ukutusangwilako. Ku babomfi baipeela aba kwa Yehova e kufuma sana ishi ndalama. Ilyo bakasabankanya abengi baleibukisha ico, balatunganya umutengo uo ifi fintu fingashitwa nga cali bukwebo, lyena balasangwilako ifyo fine. Ku ca kumwenako, Baibolo wa nkupo yanaka uubeka mu mbali kuti ashitwa K80,000.00 no kucilapo, icitabo ca kuloshako kuti cashitwa pali K160,000.00 no kuya pa muulu, kalenda wa fikope fyabalabata uwa pa cibumba nalimo kuti ashitwa ukucila pali K20,000.00, encyclopedia ya muli CD-ROM ishitwa ukutendekela pali K200,000.00 ukufika kuli K400,000.00 nelyo ukucilapo, amadisiki ya nyimbo ilingi line yashitwa mupepi na K80,000.00, na mavidio yamo ilingi line yashitwa pa mutengo uukulu. Ukufilwa ukusangwilako ishalinga ku kusakamana ifipooswa cine cine kukalenga ukuteyanya ukuleka ukupanga fimo ifyo fingaba fya kwafwa ku kufishapo no kutwala umulimo wa mwi sonde lyonse pa ntanshi.
7 Yesu alandile ati abasambi bakwe aba cine bakeshibikilwa ku kutemwana. (Yoh. 13:34, 35) Bukapekape bwesu mu kupeela ifintu no kukanaba na kaso ilyo tulepeelako bambi ifyo balekabila cine cine ni nshila shisuma isha kuishininkishishamo ukuti tuli Bena Kristu bene bene.