Mulandu Nshi Tulingile Ukuibakila ku Lwambo?
1 Umulandu ukalamba tushilingile ukukutikila ku lwambo nelyo ukukubanya lwene wa kuti tufwaya ukutemuna Yehova, uwapata ulwambo. Kanshi, nga tulefwaya ukusenaminwa na Lesa, tatufwile ukwamba umuntu mu malyashi yesu.
2 Mwipashanya Satana: Uyu mulwani mukalamba uwa kwa Lesa apeelwe ishina lyalinga ilya kuti “Kaseebanya” (mu ciGriki ni di·aˈbo·los) ilyalola mu kuti “uwa lwambo.” Ilyo Efa akutike ku fyebo fya bufi Satana alandile pali Lesa no kunakilako, abantu babili aba kubalilapo balipaatwilwe kuli Cibusa wabo uwapalamisha. (Ukute. 3:1-24) Shi twikatala atunakila ku mapange ya kwa Satana no kuipoosa mu milandile yabipa iingalenga ukukanasenaminwa na Lesa, no kutupaatulako kuli Cibusa wesu uwapalamisha, Yehova Lesa.
3 Tatufwile ukukutika ku bantu ba lwambo, pantu balapaatulanya ifibusa. Ilingi, aba lwambo balalundako ifyebo, ukubepa, no kulanda ifyebo ifingi ifikalifya. Ukucila ukulanshanya no muntu, bamutepelesha fye mu kutwi. Ici cilenga bambi ukulatunganya ifya bufi. Kanshi, “uwa kantepentepe apaatulanya bacibusa.”—Amapi. 16:28.
4 Tatufwile ukuipoosa nangu fye ni mu lwambo lunono. Mulandu nshi? Pantu amashiwi ayashalandiilwe ku kukalifya umuntu kuti yamukalifya lintu yabwekeshiwapo. Kuti yawaminishiwa nelyo ukubifiwa ukufikila yabifya umuntu wa bukapepa, ukumonawila ishina lisuma. Nga ici calicitike, kuti mwaumfwa shani nga ni mwe mwatendeke ilyo lyashi nelyo nga ni mwe mwalikubenye? Abantu kuti bamumona ngo muntu uwingacena bambi, kabili kuti balamusengauka.—Linganyeniko Amapinda 20:19.
5 Ulwambo Kuti Lwamulenga Ukuba Aba Bufi: “Ifyebo fya wa kantepentepe fili nge misasulo; fyene fitentemukila mu ncende sha mu nda.” (Amapi. 26:22) Ni shani nga mwaumfwa ubufi no kushimikila bambi? Kwena, nelyo fye mulemona kwati ubo bufi bwa cine, nga muleebako bambi ninshi mulebepa. Nga fyaisaishibikwa ukuti fya bufi, kuti mwamonwa aba bufi. Bushe mulefwaya ico cikacitike? Bushe Lesa tapeela bakasambilisha ba bufi umulandu pa bufi bwaba mu mipepele? E fyo acita, kabili akalubulwisha aba lwambo. Yesu asokele ati: “Icebo conse ica cisosesose ico abantu basosa bakacilubulula mu bushiku bwa bupingushi; pantu ku fyebo fyobe ukebelwa, kabili ku fyebo fyobe ukasekwa.” (Mat. 12:36, 37) Apo “ifwe bonse umo umo tukalubulula kuli Lesa,” bushe kuti mwafwaya amupingula ngo wa lwambo kabili uwa bufi?—Rom. 14:12.
6 Nga twayafwa umuntu ukuibaka ku lwambo, ninshi tulemucitila ubusuma. Ipinda lya mano litila: “Uulinda akanwa kakwe e ubako mweo wakwe; uwasamuna akanwa kakwe, litentula kuli wene.” (Amapi. 13:3) Kanshi, twamona ukuti kwaba imilandu isuma tulingile ukuibakila ku lwambo no bukwakwa.