Baafweni Ukunonkelamo Icine Cine mu fyo Lesa Apekanya
1 Ukwishiba ukubelenga kwalicindama sana mu mikalile. Kwalikuma imikalile ya muntu onse. Ukubelenga kutulenga ukutemwa ifintu na fimbi, kabili icacindamisha ca kuti, kutwafwa ukulundulula amatontonkanyo yesu ne fisumino.—Imil. 17:10, 11.
2 Ifipendo filanga ukuti abantu napamo ukufika ku mapesenti 35 muno Zambia tabaishiba ukubelenga no kulemba. Mu ncende shimo icipendo calikula nga nshi. Ukwabula no kutwishika, pali aba paba ne Nte sha kwa Yehova abakabila ukwafwilishiwa ukubelenga no kulemba. Te kutila aba bashibelenga no kulemba Bena Kristu bacepako iyo, pantu abengi abashibelenga no kulemba balibombela Lesa mu busumino pa myaka iingi, balishipikisha ukupakaswa, kabili balilanga ukuti balitemwa Yehova pa kubaka amafunde yakwe.—1 Yoh. 5:3.
3 Ifya Kwafwa Abantu: Apo ukukula kwa ku mupashi kwashintilila sana pa mibelengele ya muntu, cilekabilwa sana ukwafwa bambi ukwishiba ukubelenga. (Yosh. 1:8) Ifilonganino, maka maka filya fyaba uko abengi bashaishiba kubelenga no kulemba, filekoseleshiwa nga nshi ukupanga amakalasi ya shibukeni, ukubomfya akatabo ka Sambilileni Ukubelenga no Kulemba.
4 Nangula baeluda e bakumona ukuti ikalasi lya shibukeni nalipangwa no kushininkisha ukuti liletungululwa lyonse, ifwe bonse kuti twa-afwa bamunyinefwe na bantu bambi ukupitila mu kubatasha pa kubombesha kwabo ne fyo balunduluka mu cine. (Amapi. 25:11) Bamo bamona kwati teti basambilile ukubelenga pantu ba nsoni nelyo pantu bakalamba sana. Cisuma, tontonkanyeni pali baThout aba ku cishi ca Vancouver abaali kale kale mu myaka ya ba90 ilyo batampile ukusambilile cine. Apo tabaishibe ukubelenga no kulemba, bali-icefeshe no kuleka abakashi babo ukubasambilisha ukubelenga pa kuti balenonkelamo icine cine mu kubelenga Baibolo ne mpapulo shashimpwa pali Baibolo. Bwangu bwangu balishibe ukubelenga, kabili bonse pamo na bakashi balilundulwike lwa ku mupashi no kuipeela kuli Lesa ukupitila mu lubatisho lwa mu menshi. (w94 10/1 23) Kanshi ubukote nelyo insoni tafyaleseshe baThout ukulengela mu cebo ca kwa Lesa pa lwabo.—Yako. 1:25.
5 Ubunonshi: Ukulunda pa kutulenga ukuba no kulamuka ukutwafwa ukusambilila ifingi pali Lesa, ukusambilila ukubelenga no kulemba kwa bunonshi na bumbi. Ku ca kumwenako, tulaicetekela nga nshi mu butumikishi nga fintu twalamona ku fyapitilemo baEdson aba ku Petauke. Nangula balesangwa lyonse ku kulongana, tabalebombako sana mu butumikishi ico tabaishibe ukubelenga. Apo balefwaya ukubombesha no kubelengela abo balesanga mu bunte Baibolo, bapingwilepo ukulembesha shibukeni. Mu myeshi fye ya kupenda balisambilile ukubelenga kabili bafwaile icola ca kusendelamo impapulo sha mu mulimo wa mwi bala. Ukutule lyo balabombesha mu butumikishi kabili ilingi line balabombako bupainiya bwa kwafwilisha.
6 Shi ifilonganino fyonse nafiteyanye amakalasi ya shibukeni ukulingana no kukabila kwa pa mwabo. Kuti twa-afwa abalefwaya ukwishiba ukubelenga no kubafwa ukunonkelamo mu fyaba mu Cebo ca kwa Lesa no kumfwila ukufunda kwa bulesa ukwa kuti: “Uletontonkanyamo akasuba no bushiku.”—Yosh. 1:8.