Ukubilisha

◼ Ulupapulo lwa kutambika mu January: Icitabo icili conse icasabankanishiwa pa ntanshi ya 1988 ico icilonganino cikwete kuti catambikwa. Nga ca kuti tamukwete ifi fitabo, moneni ifilonganino fimbi ifya mupepi nga nafikwata ifitabo ifituuleme ifya kale ifyo mwingabomfya. Ifilonganino ifishikwete ifitabo fya kale kuti fyatambika icitabo ca Ukusapika Lesa Ukwa Mutundu wa Muntu. February: Icitabo ca Palameni Kuli Yehova. Nga ca kuti tamukwete ulu lupapulo, kuti mwabomfya icitabo ca Akalume ka Ukusokolola. March: Ukwishiba Uko Kutungulula ku Mweo wa Muyayaya. Kukaba ukubombesha kwa kutendeka amasambililo ya Baibolo. Nga ca kuti abantu balikwata kale ulu lupapulo, kuti mwatambika icitabo ca Angweniko ku Kusesema kwa kwa Daniele! April: Tambikeni bamagazini ba Ulupungu lwa kwa Kalinda na Loleni! Ilyo mulebwelela ku balefwaya ukwishibilapo na fimbi, bweleleni na kuli balya abakasangwa ku Cibukisho nelyo ku kulongana kumbi ukwa cilonganino lelo abashibishanya sana ne cilonganino. Bikeni amano ku kutambika icitabo ca Pepeni Lesa. Bombesheni ku kutendeka amasambililo ya Baibolo, maka maka nga ca kuti abantu bamo bamo balisambilila kale icitabo ca Ukwishiba na broshuwa wa Cintu Lesa Afwaya.

◼ Ukutendeka umulungu wa March 15, 2004, tukalasambilila icitabo ca Palameni Kuli Yehova pe Sambililo lya Citabo pa Cilonganino.

◼ Ukutendeka mu February, no kufika pa March 7, ilyashi lya ku cintubwingi ilipya ilya bakangalila wa miputule likalati “Fishinte fya Bani Mwacindamika?”

◼ Ifilonganino fifwile ukupekanya bwino pa kuti fikasefye Icibukisho uno mwaka pa Mulungu, pa April 4, cilya akasuba kawa. Nangu ca kuti ilyashi kuti lyatendeka bwangu, ukupishamo ifimpashanya kufwile ukucitwa cilya akasuba kawa. Ipusheni ababombela ku fya miceele uko mwabela bamwebe inshita akasuba kakawa mu ncende yenu. Apo takwakabe ukulongana ukuli konse kano ukukumana kwa kuya mu mulimo wa mwi bala pali bulya bushiku, kufwile kwaba ukufwaya inshita imbi iye Sambililo lya Ulupungu lwa kwa Kalinda. Bakangalila wa miputule bakakabila ukuteulula ukutantika kwabo ukwa kulongana muli uyo mulungu ukulingana ne mibele. Nangu kuti cawama ukuti icilonganino cimo na cimo caikwatila Icibukisho, ici te lyonse cingacitika. Uko ifilonganino ifingi fibomfya Ing’anda ya Bufumu imo, nalimo icilonganino cimo nelyo ifyafulilako kuti fyafwaya ukubomfya icikuulwa cimbi ico cungulo. Uko cingacitwa, tuletubulula ukuti pafwile ukupita amaminiti 40 no kucilapo ukutula apo icilonganino cimo capwila ukusefya pa kuti abasangilweko benganonkelamo sana pali aka kashita. Mufwile ukusakamana no mwa kupita bamotoka na pa kwimika, pamo na pa kwishisha no kusendela abantu. Ibumba lya baeluda lifwile ukusala imitantikile ingabomba bwino kuli iyo ncende.

◼ Kangalila wa kutangilila afwile ukubebeta capamo na kalemba ifyakonkapo: Bushe kuli bakasabankanya abakuukile mu cilonganino nomba line? Bushe kalata alitumwa kuli baeluda ba ku filonganino uko aba bakasabankanya baya pa kuti bengasengelwa no kwaafwiwa na bamunyinabo kulya? Bushe kuli bakasabankanya abakuukila mu cilonganino cenu nomba line? Bushe kalemba alilembeshanya na kalemba wa cilonganino ico bafumineko? Bushe ifyalembwa fya bukasabankanya fyalitumwa?

◼ Lipoti wa mulimo wa mwi bala uwa September, 2003 nabwelela pa nshi mu mpendwa ya bakasabankanya. Kabili ni pa mulandu wa kuti ifilonganino 57 tafyatumine amalipoti kwi ofesi lya musambo. E co, tulecinkulako bakalemba ukulonganika amalipoti bapokelela kuli bakasabankanya ukufika pa bushiku bwa 6 cila mweshi ukwabula ukulolela amalipoti yacelelwe. Amalipoti yafuma kuli bakasabankanya pa numa ya bushiku bwa pa 6 cila mweshi yalingile ukulundwa ku mweshi wakonkapo.