Kalata Ukufuma Kwi Bumba Litungulula
Kuli Bamunyinefwe na Bankashi Batemwikwa:
“ICIKUUKU ca bupe fye no mutende ififuma kuli Lesa Shifwe na kuli Shikulwifwe Yesu Kristu fibe na imwe.” (1 Kor. 1:3) Ala tulafuluka nga nshi ukwisamona uko icipema conse cikalapeela Yehova ubukata alingile ukupokelela! (Amalu. 150:6) Ilyo tulelolela ubo bushiku bukalamba, tutwalilila ukubilisha imbila nsuma iya Bufumu bwa kwa Lesa no kupanga abasambi.
Umulimo wa kubilisha e mulimo ukalamba uwa kwa Yehova uulebombwa pali leelo mwi sonde. (Marko 13:10) Apo twalishiba bwino ifyo Yehova acindamika uyu mulimo, tulapepa kuli wene pa kuubomba, pantu twalishiba ukuti umuntu no muntu kuti amwenamo mu kupekanya kwa cilubula. (Ukus. 14:6, 7, 14, 15) Ca cine ukutila tulapita mu mafya, lelo tulatasha nga nshi pa ‘kupeelwa amaka ukufuma mu muulu’ aya kufishapo uyu mulimo!—Luka 24:49.
Nga twalolesha pa mwaka wa mulimo uwapwa no kutontonkanya pa fyo Yehova acitile ukupitila mu babomfi bakwe aba cishinka, awe kuti twatemwa. Ico bakoshiwa no mupashi wa mushilo, abantu ba kwa Lesa balilanga ukutemwa nga kulya Kristu alangile, no kucimfya ulupato mu calo conse. Ukutemwa kwapala uku e kwali pa mabungano yesu aya citungu. Ukufuma mu mweshi wa June ukufika mu December 2003, amakombe ukufuma mu fyalo 100 ne mpusho baile ku mabungano 32 aya pa kati ka fyalo ayali mu Afrika, ku Asia, ku Australia, ku Bulaya, ku North America, na ku South America. Bamishonari, ababomfi ba pa kati ka Nko abafwilisha mu fya makuule, na babomfi ba pa Bethel ababombela mu fyalo fimbi balipushiwe pa mabungano ya citungu na ya pa kati ka fyalo.
Pali aya mabungano, twapokelele impapulo shaletila, ‘Moneni Icalo Cisuma’ na Sambilila Kuli Kasambilisha Mukalamba. Kabinge, kwali no kubilisha kwa kutila kuli no kuba icitabo capitulukwamo ica Isukulu lya Bupainiya icili no kutendeka ukubomfiwa ku kupwa kwa mwaka wa mulimo uwa 2004. Mu kuya kwa nshita, bapainiya ababomba pa myaka iingi abasangwa kale ku sukulu bakapita mu sukulu pamo na bapainiya abapya.
Ukwafwa kwa kwa Lesa na bukapekape ubwa muntu nafilenga kube ukukuula Amayanda ya Bufumu ayengi nga nshi, maka maka mu fyalo umo bashakwata sana indalama. Pa mulandu wa kukabila kulekulilako mu calo conse ukwa fya kulya fya ku mupashi, kuli ukulundako amaofesi ya musambo mu fyalo ifingi. Broshuwa wa Ipakishe Ubumi pe Sonde kuli Pe na Pe! nomba ali mu ndimi 299, kabili impendwa yonse pamo iya uyu broshuwa ifikile ku mamilioni 139; Impendwa ya citabo ca Ukwishiba Uko Kutungulula ku Mweo wa Muyayaya naicila pa mamilioni 93 mu ndimi 161; kabinge kuli amamilioni 200 ne mpusho aya broshuwa wa Cinshi Cintu Lesa Afwaya Kuli Ifwe? mu ndimi 267.
Tulesengela abalangishe ukuipeela pa kubatishiwa abali 258,845 mu mwaka wa mulimo wapwile! Nangu ca kutila ukutungilila mutungilila ifya Bufumu kulenga mwaba abantu Satana alefwaisha ukulya, ukubombako uyu mulimo kumulenga mwaba abantu baibela abakapaalwa na Yehova no kucingililwa lwa ku mupashi pa nshita mulebutuka ulubilo mwabikilwa. (Heb. 12:1, 2; Ukus. 12:17) Mukwai ishibeni ukuti “uubaka [imwe] te kuti ashipule” iyo.—Amalu. 121:3.
Ilembo lya mwaka llya 2004 ilileti, “Mulelola . . . Na imwe mube abaiteyanya,” nalilinga nga nshi. (Mat. 24:42, 44) Icebo ca kwa Lesa citila Abena Kristu balebeshi muli buno bwikashi bwile bulefwa. (1 Pet. 2:11; 4:7) E ico, tufwile ukwangwa ifya ku mupashi, ukwangusha ubumi bwesu, no kuceeceeta imitima yesu bwino bwino. “Icing’wena cikalamba” cifwaya ukutucibaula, no kutukulila mu bwikashi bwa nomba.—Ukus. 12:9.
Ukubelenga Baibolo cila bushiku kwalicindama pa kutwalilila ukuba abalola. Ukubelenga kuti kwatwafwa ‘ukuleka Ee wesu ukuba Ee’ pa kuti tufishepo ukuipeela twaipeela no “kwikatisha nga nshi ukucetekela uko twakwete pa kutendeka ukuti kube ukwaikashiwa ukufika na ku mpela.” (Yako. 5:12; Heb. 3:14) Ukubelenga Baibolo cila bushiku kuti kwatucinkulako ifyo icalo cipaaswike ku fipimo fishaluka ifya kwa Lesa. (Mal. 3:6; 2 Tim. 3:1, 13) Ukwishiba Baibolo kuti kwatwafwa ukutaluka “imilumbe ya bufi iyashikwa ku bucenjeshi” no kutwalilila aba busumino kuli Yehova.—2 Pet. 1:16; 3:11.
Mwe bafyashi, bushe muleafwa abana benu ukwimika amabuyo ya ku mupashi no kuba ‘abalola’ ilyo mulebakusha mu kusalapula no kukonkomesha kwa kwa Yehova? (Efes. 6:4) Bushe mulebafwa ukutontonkanya pa bumi bwa ku ntanshi nga filya umuntu wakwatishe amano uwabalile aba pe sonde aletontonkanya pa bumi bwakwe ubwa ku ntanshi? Yesu afwaya nga alicilile bonse mu fya kubasa, mu kwelenganya ifya kupangapanga, nelyo mu kundapa, lelo ukucila ukucite co abombele umulimo wa nshita yonse. Shi lekeni ici cilangililo cimulenge ukwafwa abana benu ukucindamika sana ifya Bufumu mu bumi bwabo.
Ibumba lya musha wa cishinka, ilimininwako ne Bumba Litungulula, liletasha nga nshi “ibumba likalamba” pa kwafwa batwafwa ukufishapo umulimo wesu uwa kulenga ‘mbila nsuma iyi ya bufumu ukushimikilwa pano isonde ponse ku kubo bunte.’ (Ukus. 7:9; Mat. 24:14, 45) Kuli imwe mwe batemwikwa, Yehova atila teti alabe “umulimo wenu no kutemwa uko mwalangile kwi shina lyakwe, apo mwalipyungila aba mushilo kabili muletwalilila ukupyunga.” (Heb. 6:10) Ilyo mulebelenga ifya kukumanya fya kucincimusha ne fyafuma mu kubombela pamo mu filembelwe muli 2004 Yearbook, mukwai ishibeni ukuti mwalibomba umulimo ukalamba icine cine mu kushimikila ubunte mu calo conse.
Shi akuyeni ku ntanshi no kushipa ilyo muletwalilila ‘ukutonta amenso ku kupoka icilambu,’ kabili mwipanya ishuko lya kupoka ici cilambu pa mulandu fye wa muntu nelyo pa mulandu wa cibanda. (Heb. 11:26; Kol. 2:18) Shi twalilileni ukutetekela Yehova, no kuba abashininwa ukuti akaafwa bonse abamutemwa ukukwata ubumi bwapwililika.—Yoh. 6:48-54.
Ala tulaipakisha nga nshi ukubombela pamo na imwe mu kulumbanya ubukata bwa kwa Yehova.
Ni fwe bamunyinenwe,
Ibumba Litungulula Ilya Nte sha kwa Yehova