Ukulefye Myando Yesu
1 Ala te pa busuma ukumona uko ukusesema kwa mu Baibolo kulefikilishiwa muli shino nshiku sha kulekelesha. Ukusesema kumo uko twamona ukulefikilishiwa muno Zambia ni kulya kwalembelwe na Esaya uwasobele ati “umunono akabe kana limo, uwacepa akabo luko lwakosa.” (Esa. 60:22) Mu 1989 ilyo umulimo wa bukuule watendeke pa fikuulwa fyesu ifya maofesi ya musambo, kwali bakasabankanya mupepi na 71,000 ne filonganino 1,755. Pali leelo bakasabankanya bali mupepi na 120,000—e kutila mupepi ne miku ibili ukucila ifyo baali mu 1989—e lyo ifilonganino fyena naficila pali 2,000. Uku mwandini kulunduluka kushaikulila!
2 Ukutula apo ifikuulwa fyesu ifya musambo fyakuulilwe no kupeelwa mu 1993, ifilekabila ibala lyesu nafifula apakalamba. Cimo icilelangilila uku kufula ni ci, Ibumba Litungulula lyalibikako amabumba yabapilibula mu ciTonga, mu ciLubale na kiKaonde pa kuti icine cilefika pa mitima ya balefwaya ukusambilila muli ishi ndimi. Pali ino nshita kuli isubilo lya kutendeka ukupilibula mu ciLunda nomba line. Cimbi na co icacitika ukutula 1993 mulimo wa kukuula Amayanda ya Bufumu. Kabili, pali ino nshita tulekabila impapulo ishingi nga nshi ukucila isho twalekabila pa myaka iyapita 10.
3 Pa kuti ukulunduluka konse uku kusakamanwe bwino bwino, amaofesi yesu aya musambo yafwile ukulundwako. Ilembo lya kwa Esaya 54:2 cikuuku cikuuku litucincisha ukuti: “Tangula apa kwikale hema lyobe, ansa ne fipembe fya bwikalo bobe, wishako; lefye myando yobe, ikasha ne mambo shobe.” Mwalatemwa ukwishibo kuti umulimo wa kukusha umusambo wesu watendeke mu May 2002.
4 Umulimo Uulebombwa: Pa kupekanishisha umwa kubombela abapilibula abelebalafula, iciputulwa cimo ica ntunti ya pa muulu iya cikuulwa ca fakitare calikuulwamo amaofesi. Amadipartimenti umo babombela ifya kulungishalungisha baliyafumyamo pa kuti incende ya kukuulapo amaofesi yashala pa ntunti ya pa muulu. Iyi ncende yalicingililwa ukubomfya icibumba ca mabuloko ico babikako na pulasta. Nangu ca kutila ukukuulila amabuloko kulakabila inshita ikalamba no kubombesha, e nshila abakuula babomfya muno calo cesu.
5 Ukupekanishisha bakabomba ba pa musambo umwa kusendama kwalicindama. E ico, icikuulwa ca ntunti shine ica kwikalamo abantu cilekuulwa. Ici cikuulwa ca miputule 32 e cikaba umwa kwikala aba mu lupwa lwa Bethel abakakabilwa ukubomba umulimo pa myaka ikonkelepo 10. Kale, bakuulile “ifibumba fya maiteneke” ifyo balepangila pa nshi, nomba icikuulwa ca kwikalamo icipya cena cilekuulilwa na mabuloko e lyo bakabikeko na pulasta.
6 Ifikuulwa fimbi ifili no kuwamishiwa ni kicini, umwa kuliila, umwa kulungishisha bamotoka no mwa kusungila ifimbayambaya. Ukuwamya kicini e kukalenga umwa kwipikila ukubamo ifipe fipya kabili ifisuma. Bakakusha no mwa kwipikila mwine. Balekuula no mwa kusungila ifipe ne fya kulya na mumbi, pamo pene no kubikako fimashini fya kutalalikila. E cikalenga ulupwa lwa Bethel ukusakamanwa bwino no kukwata lyonse ifya kulya ifyo balekabila.
7 Fimbi ifyo balebombelapo, mwa kupita pa kufuma umwa kusendama umupya no kuya ku kicini nangu umwa kuliila, icikuulwa ca kwimikamo bamotoka ba pa musambo, no kubika ifiibi ku cikuulwa ca kusungilamo ifimbayambaya. Ifi fiibi fya kulaya pa muulu pa kwisuka.
8 Ifyo uyu Mulimo Ulebombwa: Ilyo Imfumu Solomone yapeelwe umulimo wa kukuula itempele, yasontele abaume 550 ku kwangalila umulimo. Aba baume baali abafikapo kabili abacenjela mu milimo. Umo uo twingalandapo ni Hiramu intukushi iyine yine iyalefula golde, silfere, umukuba, amabwe pamo pene no kupike nsalu. (1 Isha. 7:13, 14) Na leelo line bakabomba bacenjela mu milimo abaishiba ukubika imipaipi ya menshi, na baishiba ifya malaiti, aba kukuula na ba kupenta balipeelwa umulimo wa kukusha ifikuulwa fya musambo wesu.
9 Muli dipartimenti wa kukuula nomba muli bamunyinefwe na bankashi 81. Abena Zambia baba 36, abaitemeenwa ukwafwilisha pa nshita inono abafuma ku fyalo fimbi bali 15, e lyo ababomfi bafuma mu fyalo fimbi abaisa ku makuule mpaka yakapwe bena baba 30. (Amalu. 110:3) Abaitemeenwa ukwafwilisha pa nshita inono abatula ku fyalo fimbi bene balailipilila isha kwendela, baafuma ku United States, ku Canada, na ku England no kwisabombako umulimo wa bukuule, bamo milungu iinono babombako, bambi bena myeshi itatu babomba. Abaisa ku kukuula mpaka ukupwa kwa mulimo bena batuminwe na dipartimenti ya Design-Build kabili bafuma mu fyalo 13. Babomba ukufikila ukukuula konse kwapwa nangu ukufikila umulimo baishiba wapwa. Lyonse pa numa ya milungu ibili, icilonganino cimo ica mu Lusaka cilalaalikwa ukutuma abaitemenwa ukubomba umulimo ulekabilwa ukubombwa pa Fibelushi ifitantikwa. Aba na bo balapwishishisha umulimo ukalamba pa nshita besa ku kubomba pa bukuule, kabili lishuko kuli bene ukubombako mu kutanununa ing’anda ya kwa Lesa.
10 Bushe Bonse Kuti Bayafwilishako Shani? Aba bwananyina ba mu Lusaka balikwata ishuko lya kwisabombako, lelo ubwingi bwesu tatwakayekuulako mu kulungatika. Lelo, kuti twayafwilishako mu fingi. Umutumwa Paulo acincishe abasumina banankwe mu Korinti ukulamupepelako pa kuti afishepo bukapyunga bwakwe te mulandu na mafya alepitamo. Ukupalako, kuti twapepela ukuti uyu mulimo ukapwishishiwe bwino bwino. (2 Kor. 1:11) Nangu cibe shani amapepo yenu yakasukwa.—Amalu. 65:2; 127:1.
11 Inshila imbi bonse twingafwilamo, ni mu misangulo yesu. Nge fyo mwingelenganya, amakuule yapala aya yalakabila sana indalama. E ico indalama ishingi shilekabilwa pa kuti ubukuule bupwishishiwe. Bushe kuti twasangula shani?
12 Ilyo umusambo wesu walekuulwa, aba bwananyina baali no mupashi nga ulya wali na Davidi ilyo alombele imisangulo ya kukuulila itempele mu Yerusalemu. Ilembo lya 1 Imilandu 29:9 litila: “Awe abantu balisaminwe pa kupeela kwabo ku kuitemenwa, pantu ne mitima ya cishinka bapeele ku kuitemenwa kuli Yehova.” Aba bwananyina na bo balitumine conse ico bakwete ku kwafwa ukukuula umusambo wesu. Pali ilya nshita, abantu umo umo pamo pene ne filonganino mu Zambia yonse bapeele imisangulo ku kwafwilisha ukupepa kwa cine. Ubupe bwenu ubwa kuitemenwa ubwa kwafwilisha umulimo wa mwi sonde lyonse ukafwa sana ukupwishisha umulimo tuli na o pali ndakai.
13 Tukamwenamo mu nshila ishingi kabili ishalekanalekana. Amaofesi na yambi aya bakapilibula yakalenga icine icipususha ubumi ukusangwa bwangu ku bantu mu ndimi shabo. Umwa kwikala umwalundwako ne fikuulwa fya kale ifilewamishiwa fikaafwa bakabomba ba kuitemenwa aba pa Bethel mu fyo balekabila ilyo balesakamana ukulunduluka kwa mulimo wa kwa Lesa muno calo cesu. Yehova akamupaala nga nshi ilyo mulebombesha ukwafwilisha ubu bukuule. Shi ifwe bonse natwafwilisheko na maka yesu yonse ku ‘kulefya imyando yesu’ ne ci cikaleta ilumbo no bukata kwi shina lya kwa Yehova.—Esa. 54:2.
[Ifikope pe bula 3]
Ici cikuulwa ca miputule 32 e cikaba umwa kwikala aba mu lupwa lwa Bethel abakakabilwa ukubomba umulimo pa myaka ikonkelepo 10
[Icikope pe bula 4]
Balepwisha ukubombela pa maofesi yapya 47
[Icikope pe bula 4]
Balebika amakapuloshi
[Icikope pe bula 5]
Kale, bakuulile “ifibumba fya maiteneke” ifyo balepangila pa nshi, nomba icikuulwa ca kwikalamo icipya cena cilekuulilwa na mabuloko e lyo bakabikeko na pulasta
[Icikope pe bula 6]
‘Ndeipakisha bumunyina bwa pa kati ka nko ubo nalebelengapo fye’
[Icikope pe bula 6]
“Kulaba ukwikatana kwa cine ilyo twabomba pamo na maka no kupwishishisha fimo ifyo ifwe bonse twishibe ukuti te kuti tucite mu maka yesu fwe bene, kano fye mu mupashi wa kwa Yehova”
[Icikope pe bula 6]
“Ukumone fyo icine cikatanya abantu abafuma mu ncende ishalekanalekana kwalikosha icitetekelo cesu”
[Icikope pe bula 6]
‘Uyu mulimo uletupekanishisha ifyo tukalabomba mwi Sonde lya paradaise’