Ukubomba Umulimo wa Kushimikila Ukwabula Akapaatulula

¹ Petro atile: “Lesa taba na kapaatulula, lelo . . . umuntu uumutiina no kubomba ubulungami alapokelelwa kuli wene.” (Imil. 10:34, 35) Mu nshiku shesu tubomba uyu mulimo ukulingana sana na mashiwi ya cine ayalandile Petro. E ico calicindama ukweshaesha ukupwisha ubwafya bonse ubwingalenga twafilwa ukushimikila umuntu onse imbila nsuma.

² Ilyo tushimikila ku ng’anda ne ng’anda mu ncende shimo, tulasangamo abantu abashilanda no kuumfwa ululimi tulanda mu cilonganino twaba. Ukukanaumfwa ululimi lumbi kulalenga bambi ukufilwa ukunonkelamo mu bukombe bwa Bufumu ubo tushimikila abantu. Bamo pa bo tushimikila ni bankomamatwi, abomfwa fye nga mwabomfya ifishibilo. Cinshi cingacitwa ku kwafwa ukupwisha ubwafya ubwingalenga twafilwa ukushimikila aba bantu mu kufikapo?

³ Mu mwaka wa 2000 Sosaite yatumiine ifilonganino fyonse amaformu ya S-43 ayatila Twapaapata Fwayeni Uyu Muntu. Ubufwayo bwa uyu formu bwa kushininkisha ukuti abekala mu ncende umo icilonganino cesu cibombela abashilanda ululimi lwesu, ukubikako na bantu abalanda ululimi lwa bankomamatwi, bapeelwa ishuko lya kuumfwa ubukombe bwa Bufumu mu lulimi lwabo lwine.

⁴ Nga mwasanga nkomamatwi mu ncende yenu nangu umuntu umbi uushumfwa ululimi mulanda, mulingile ukulemba uyu form bwino bwino. Mulingile ukucite fyo nangu ca kuti umuntu alemoneka ukukanafwaya ukupokelela icine. Nalimo te lyonse mwingalemba ishina lya muntu, lelo mulingile ukulemba akeyala kakwe no lulimi alanda. Kuti mwabika uyu formu mu kabokoshi umo mupoosa amalipoti ya mulimo wa mwi bala pa Ng’anda ya Bufumu. Kalemba akabuula aya amaformu, no kumona nga nayalungama kabili nga ca kuti ifilembelwepo kuti fyabelengwa bwino, kabili akayatuma ku cilonganino ca mupepi nangu kwi bumba ilisakamana abantu abalanda ululimi lulembelwe pali formu.

⁵ Limo limo limbi ici te kuti cikabilwe. Ku ca kumwenako, ifilonganino fya ciTonga ifingi mu Zambia bafwile balishiba incende ukwikala abalande ciTonga. E lyo limbi na lyo, abantu abalanda ululimi lumbi kuti baaba fye umo umo. Icilonganino nelyo ibumba abalanda ulo ululimi limbi kuti bakabila ukulabomba ukufika ukutali sana kabili kuti batasha ukwafwa ukusanga bantu abo bengaba na maka ya kwafwa.

⁶ Nga ca kuti takuli icilonganino nangu ibumba mu ncende yenu abengashimikila mu lulimi lulekabilwa, limbi kuti kwaba kasabankanya uwaishiba ululimi mu filonganino fyaba mupepi uwingayako. Nga takuli nangu umo uwaishiba ulo lulimi nangu fye pa numa ya kwipusha kangalila wa musumba, aba bwananyina ba kuli iyo ncende balingile ukubombesha apapelele amaka yabo ukushimikila kuli abo bantu. Casangwa ukuti broshuwa wa kuti Ipakishe Ubumi pe Sonde Kuli Pe na Pe! alafwilisha nga nshi mu mibele ya musango yu.

⁷ Kasabankanya onse alingile ukwibukila ukubomfya formu wa kulondwelapo abantu nga cakabilwa. Nga ca kuti pa cilonganino tapali amaformu ya S-43, ifyebo filekabilwa kuti fyalembwa pa kapepala kanono no kutumwa nge fyo tulondolwele pa muulu. Nga twabikishako amaka ku kushimikila abantu bonse imbila nsuma ukwabula ukusakamana ululimi balanda, tukalalanga ukutemwa kwa kwa Lesa wesu, “uufwaya ukuti abantu ba misango yonse bakapusuke no kufika ku kwishiba bwino bwino icine.”—1 Tim. 2:4.