Ukukanshiwa Bwino Bwino

Pa mulungu pa 6 August, 2006, e bushiku baeluda na babomfi batumikila 24 bapwile Isukulu lya Kukansha Ilya Butumikishi ilyalenga namba 33.

Isukulu lisambilisha aba bamunyinefwe ifya kubomba bwino umulimo wa kushimikila, ifya kucema umukuni, no kusambilisha mu cilonganino. Muli ili isukulu ilya milungu 8, abasambi balasambilila sana Baibolo. Balasambilila bwino bwino amafunde ya mu Baibolo pamo ne milimo ya bucemi e lyo ne fya kubomba pa milandu iima mu mikalile ya Bena Kristu. Na kabili balasambilila ifyo Amalembo yasambilisha pa milandu yakuma ubutungulushi, ubupingushi, no kuteyanya. Balakanshiwa bwino ne fya kulanda ku cintubwingi, kabili cila musambi balamwafwa ifyo engatwalilila ukulunduluka lwa ku mupashi.

Pa kulongana kwa muputule, bakangalila ba fitungu balakumana na baeluda na babomfi batumikila abashimbe abali ne myaka 23 ukushinta kuli 50, abafwaya ukuti Yehova abasambilishe imyeshi ibili. (Mika 4:1, 2) Tontonkanyenipo no kupepa kuli Lesa nga kuti mwatemwa ukukanshiwa bwino muli uyu musango pa kuti mukakwate “ululimi lwa basambilila” ulukanonsha bambi.—Esa. 50:4.

Ilyo balelemba buno Ubutumikishi Bwesu Ubwa Bufumu, ikalasi lyalenga namba 34 ilya Isukulu lya Kukansha Ilya Butumikishi ninshi lyalitendeka.