Ubushininkisho bwa Citetekelo Cakosa
1. Fintu nshi ifishaibipila ifyo Yesu asobele?
1 Abatumwa balekutikisha ilyo Yesu alelanda pa kubapo kwakwe na pa nshita ya ku mpela iya calo. Atile kukaba ifintu ifishaibipila ifikaponena abantu pamo nga inkondo, ifipowe, ifinkukuma, ne fikuko. E lyo Yesu alandile no kuti abakonshi bakwe bali no kubapata, ukubacusha, no kubepaya. Asosele no kuti bakasesema ba bufi bakema no kulufya abengi. Kabili atile ukutemwa kwa bengi kukafubalila.
2. Mulandu nshi cibelele icaibela ukuti imbila nsuma ileshimikilwa mwi sonde lyonse?
2 Pa numa ya kulanda pa fintu fyabipa umusango yu, abatumwa bafwile balipeshiwe amano ilyo Yesu akonkenyepo ukusoso kuti imbila nsuma iya Bufumu bwa kwa Lesa ikabilwa pano isonde ponse. (Mat. 24:3-14) Ilelo tulamona uko kulya kusesema kulefikilishiwa bwino nga nshi. Nangu ca kutila twikala mu nshita iyayafya, Inte sha kwa Yehova balicincila mu kubila imbila nsuma. Ilyo ukutemwa kwa bantu muli ici calo kuleshibantukila, ifwe ukutemwa kwesu kwena kulebilima fye ngo mulilo. Nangu ca kutila “inko shonse” shalitupata, nomba ifyo tushimikila kwena, kushala fye panono ukuti tushimikile mu nko shonse fye.
3. Fipendo nshi ifya kukoselesha ifili muli Lipoti ya mwi Sonde Lyonse?
3 Ifyo cili ica kukoselesha ukubebeta imibombele ya Nte sha kwa Yehova muli uyu mwaka wa mulimo uwapwile nge fyo tulemona pali charti iili pa mabula 3 ukufika ku 6! Pa myaka nomba 16, tupoosa ama-awala ukucila pali bilioni umo cila mwaka mu mulimo wa kushimikila no kupanga abasambi. Mwandini ubu bwaba bushininkisho bwa citetekelo cakosa! Kwali ukwingilishiwako ukwa mapesenti 5.8 mu mpendwa ya bapainiya, amapesenti 3.1 mu mpendwa ya bakasabankanya, na mapesenti 4.4 mu mpendwa ya masambililo ya Baibolo. Impendwa ya babatishiwe yalicilile pa ya uyu mwaka wapwile pantu yafikile ku mapesenti 20.1. Ala te pa busuma ukumona ukuti abantu nalimo amamilioni 7 balebombela Yehova ne cishinka—iyi mpendwa naicila pa mpendwa ya babombelapo kale Yehova mu fiputulwa fya nshita ifya ku kale! Ilyo mulebebeta charti, fintu nshi mulemonamo ifilemukoselesha nga nshi?
4. Mafya nshi umuntu umo acimfishe ilyo ashilabatishiwa?
4 Nangu ca kutila ifi fipendo fili ifikalamba nga nshi, tatufwile ukulaba ukuti ababombele uyu mulimo bantu ba citetekelo nga nshi. Moneni ica kumwenako fye cimo. BaGelyemo bakuliile ku Bolivia. Bafyelwe mu 1935, kabili batampile ukubomba mwi bala lya koko ilyo bali fye ne myaka 9. Ukutula ku bwaice, balesheta amabula ya koko pa kuti balelabako ku bucushi bwa ncito yakosa iyo balebomba. Umuya inshiku batampile ukunwensha ubwalwa no kupeepa sana fwaka. Ilyo batampile ukusambilila ifyo Yehova afwaya abantu ukulacita, BaGelyemo balilekele ukupeepa fwaka kabili balilekele no kunwensha ubwalwa. Lelo akantu kaali pa kuleka akamusango kabo aka kusheta amabula ya koko ako batampile ninshi bali fye abaice. Batwalilile ukupepa no mukoosha kabili basukile baleka aka kamusango. Apo nomba balilekele ifyabipa fyonse ifyo balecita, balibatishiwe. Basosa abati: “Pali ino nshita, naliba uwa busaka kabili uwa nsansa nga nshi.”
5. Cinshi mufwaisha?
5 Cine cine Yehova alitemwa abantu. Ico afwaya ca kuti bonse bengalapila. (2 Pet. 3:9) Na ifwe bene e fyo tufwaya. Shi imitima yesu itulenge ukutwalilila ukubombesha ukwafwa aba mitima yafumaluka ukwishiba no kutemwa Yehova nge fyo ifwe twamwishiba no kumutemwa.