Kalata Ukufuma kwi Bumba Litungulula

Ku Nte sha kwa Yehova Ishibombela Pamo na Ifwe,

Ala natutemwa nga nshi pa kumulembela ino kalata bamunyinefwe! Tuleumfwa fye kwati mutumwa Yohane, uwasosele ukutila ‘alitemenwe icine cine’ abasumina banankwe no kuti alisekelele pa kumfwa ukuti “bale-enda mu cine.” (2 Yoh. 1, 4) Ala mwandini twalipaalwa nga nshi ukwishiba icine! Ici icine calitulubula muli Babiloni Mukalamba na ku fisambilisho fyakwe e lyo na ku ntambi shakwe, ishisaalula Lesa. Ukulakonka ifyo Baibolo isambilisha kwalenga ukuti tube no kutemwa, ne cikuuku, no kulaelela bambi. Kabili pa mulandu wa cine, Lesa alatumona nga bantu abasanguluka kabili twalikwata ne subilo lya mweo wa muyayaya.

Na kabili tulatasha nga nshi pa mupashi Yehova atupeela, uututungulula cila bushiku no kutukosha! Tatuletwishika ukuti mwali-ipakishe ukukutika ku malyashi yalandile pa nshila shalekanalekana isho Yehova atutungulwilamo no kutukoseleseshamo ukubomfya umupashi wa mushilo, pa kulongana kwa citungu ukwaleti “Ukutungululwa no Mupashi wa kwa Lesa.” Ilyo ifintu mu calo filebipilako fye, nacicindama ukuti tuleke umupashi wa maka uwa kwa Yehova uletutungulula muli ishi nshiku shileya shileafishako fye.

Natushininkisha ukuti ifyo mwabelengele muli Yearbook ya mu 2008 pa fyo bamunyinefwe bashipikishe amacushi ayengi pa mulandu wa citetekelo, fyalimufikile pa mutima. Kabili ca kupapa ukwishiba ukuti abengi pali aba bamunyinefwe tapapitile inshita iitali ukutula apo babatishiwe ilyo aya mafya yatendeke kabili bambi nalimo ninshi no kubatishiwa tabalabatishiwa. Twalibatemwa pa mulandu wa citetekelo cabo na pa fyo bafwaisha ukucita icalungama! Cine cine, imibombele yabo iisuma ilatukosha ukuti tutwalilile ukuba aba cishinka ku Bufumu te mulandu na mafya ayengatuponena.—1 Tes. 1:6-8.

Natwishiba ukuti bamunyinefwe na bankashi mulepita mu mafya ayengi nga nshi pa kuti fye ulupwa lwenu lutwalilile ukuba ulwaikatana mu kutemwa. Bamo pali imwe, cilamwafya fye no kulabombako lyonse umulimo wa kushimikila e lyo no kulasangwa lyonse mu kulongana. E mulandu wine twayalwiliile ukulongana kwesu ukutendeka pa January 1, 2009. Twalilanshenyepo sana no kupepelapo amapepo ayengi pa kwalula ukulongana. E ico, tulesubila ukuti mukashukila iyi mitantikile iipya pa kuti mukalekwata inshita iikalamba iya kuisambilisha mwe bene e lyo ne ye sambililo lya lupwa.

Pa kulongana kukalamba ukwalekanalekana ukwaliko uyu mwaka wapwile, twalitemenwe nga nshi ukumona ababatishiwe. Pali aba pali na bana abanono. Tulemutasha mwe bafyashi pa kusambilisha abana benu ukutemwa icine na pa kubakoselesha ukuti baipeele kuli Yehova no kulamubombela ilyo bacili abaice. Twalishiba ukuti ku masukulu aba baice baya kwaliba amesho ayengi, lelo te mulandu ne fyo, balifikilepo ukubatishiwa. Tatuletwishika ukuti mwe bafyashi mwalibikileko amano ukubasambilisha.—Amalu. 128:1-6.

Tulemutasha na kabili pa fyo mwabombeshe mu mulimo wa kutungulula amasambililo ya Baibolo—kabili tatulelaba ukutasha bamishonari na bapainiya baibela abali pa ntanshi muli uyu mulimo. Ifwe bonse fwe baba mwi Bumba Litungulula tulatasha nga nshi pa mulimo wacindama uo bamunyinefwe na bankashi babomba, uwa kwita abantu abafumacumi ukuti “Iseni!” kabili uwa kweba bonse abali ne cilaka ukuti ‘nwenipo amenshi ya mweo aya bupe fye.’ (Ukus. 22:17) Tuli ne nsansa nga nshi ukusengela abantu 289,678 mu cilonganino ca kwa Lesa ica pano isonde, abatulangile ukuti bali-ipeela ilyo babatishiwe uyu mwaka wapwile!

Cisuma ukulaibukisha amashiwi ya mutumwa Yohane, uwalembele ati: “Icalo cileya pamo no lunkumbwa lwa ciko, lelo uucita ukufwaya kwa kwa Lesa akekalilila umuyayaya.” (1 Yoh. 2:17) Kabili ni nomba line fye cino calo ‘calapita!’ Kanshi nacicindama ukuti tubike amano ku kucita ukufwaya kwa kwa Lesa no kuba ‘abalola.’ (Mat. 24:42) Nga twacita ifi, tatwakatale atulanguluka atuti cinshi nasalilepo ukucite ifi, kabili Yehova uwaba ne cikuuku akatupaala nga nshi.—Esa. 63:7.

Tulesubila ukuti amalyashi ya mu fyalo fyalekanalekana ayali muli Yearbook ya 2009 yakamukoselesha bonse ukubika amano ku fya Bufumu mu mikalile yenu. Ishibeni ukuti tulamutontonkanyapo lyonse no kumupepelako kabili twalimutemwa nga nshi. Shi Yehova namupaale nga nshi.

Ni fwe bamunyinenwe,

Ibumba Litungulula Ilya Nte sha kwa Yehova