Ifya Kubilisha

◼ Impapulo sha kushalika mu April na May: Ulupungu lwa kwa Kalinda na Loleni! Ilyo mulepempula abapokeleko magazini, na basangilwe ku Cibukisho nangu ku kulongana kumbi lelo abashisangwa lyonse ku kulongana, kuti cawama mwabombesha sana ukubapeela icitabo ca Bushe Cinshi Baibolo Isambilisha? Ico mufwile ukufwaisha ukucita, kutendeka amasambililo ya Baibolo muli ici cine citabo. June: Bushe Cinshi Baibolo Isambilisha? Nga ca kuti abo mwasanga batila balikwata kale ici citabo, kuti mwabapeela icitabo conse ica mabula 192 ica mapepala ayamoneka aya kaaki nelyo icitabo cimbi icafumine ilyo umwaka wa 1992 taulafika. July: Kuti mwashalika broshuwa ili yonse iyakwata amabula 32 iyo mukwete.

◼ Kukaba ukubombesha nga nshi ukusabankanya ukulongana kwa citungu no kwa bakafuma mu fyalo ifingi ukwa mu 2009 ukukabako isonde lyonse. Bakasabankanya bakalashalika utupepala twa kwitilapo abantu mu cifulo cabo ica kubombelamo. Mufwile ukubomba uyu mulimo wa kushalika utupepala ilyo kwashala imilungu itatu pa kutila icilonganino cenu cikasangwe ku kulongana kwa citungu.

◼ Amabaji ya pa kulongana kwa citungu yakatumwa kuli bakasabankanya bonse ukupitila mu cilonganino. Abaitwa ukuyasangwa ku kulongana kwa citungu ukwa bakafuma mu fyalo ifingi na bo bene bakabomfya amabaji yamo yene.

◼ Ukubilisha kwali mu Ubutumikishi Bwesu Ubwa Bufumu ubwa August 2007 kwatile: “Natuleka ukukwata amaBaibolo mu Chichewa, mu Chitonga, mu Cibemba, muli ciKaonde, mu ciLamba, na mu ciLozi. Nga mulefwaya aya maBaibolo kuti mwayashita fye mu mashitolo.” Tucili twalikwata amaBaibolo mu ciLubale lelo kuti mwaibukisha ukubilisha kwali mu Ubutumikishi Bwesu Ubwa Bufumu ubwa January 2008 ukukuma ku maBaibolo ukwa kuti ‘tulingile ukulanga ukuti tulatasha pali ifi fipe . . . ilyo fye tuletwalila abasambi ba Baibolo abalelunduluka kabili ababelenga kabili abasangwa ku kulongana. Te ya kushalika mu mulimo wa mwi bala.’