Ifya Kubilisha

◼ Ulupapulo lwa kushalika mu October: Ulupungu lwa kwa Kalinda na Loleni! Abo mwasanga nga batemwa ifyo mwalanshanya nabo, balangeni no kulanshanya nabo trakiti iitila Bushe Kuti mwatemwa Ukwishiba Icine? Bakasabankanya nga basanga ukuti abo balelanda nabo balikwata iyi trakiti, bafwile ukutendeka ukusambilila nabo Baibolo. November: Bushe Cinshi Baibolo isambilisha? Bakasabankanya nga basanga ukuti abo balelanda nabo balikwata ici citabo, bafwile ukubashiila icitabo icili conse ica mabula 192 ica mapepala ayamoneka aya kaki nelyo icitabo cimbi icafumine ilyo umwaka wa 1995 taulafika. December: Umuntu Wakulisha Uwabalile Abako Uwa Mweo. Nga ca kuti abo mulelanda nabo balikwata abana bashileni icitabo ca Sambilila Kuli Kasambilisha Mukalamba. January: Bushe Cinshi Baibolo Isambilisha? Bakasabankanya nga basanga ukuti abo balelanda nabo balikwata ici citabo, bafwile ukubashiila icitabo icili conse ica mabula 192 ica mapepala ayamoneka aya kaki nelyo icitabo cimbi icafumine ilyo umwaka wa 1995 taulafika.

◼ Umutande wa Malyashi mwi Sukulu lya Butumikishi Ilya Bulesa nomba tawakulaba mu Ubutumikishi Bwesu Ubwa Bufumu. Lelo icilonganino cimo cimo cakulapokelela umutande wa malyashi uwa mwaka onse, kabili umutande umo wa kulaba pa cipampa ca fyebo ica mu Ng’anda ya Bufumu. Umutande umbi wakulaba na kangalila we sukulu uo akalabomfya ilyo alepeela abana be sukulu amalyashi. Bakasabankanya bakatwalilila ukupokelela Ubutumikishi Bwesu Ubwa Bufumu ubwa cila mweshi umwakulaba ukutantika kwa cila mulungu ukwa Isambililo lya Baibolo Ilya pa Cilonganino, Isukulu lya Butumikishi Ilya Bulesa, no Kulongana kwa Mulimo.

◼ Ukutampa mu mulungu wa March 1, 2010, tukalasambilila icitabo ca “Iseni Mulenkonka” pe Isambililo lya Baibolo Ilya pa Cilonganino. Ifilonganino ifilekabila ici citabo fifwile ukuorda pali orda yabo iikakonkapo.