‘Iseni Mulenkonka’
1. Tukanonkelamo shani mwi Sambililo lya Baibolo ilya pa Cilonganino mu myeshi ileisa?
1 Amalyashi ayalanda pali Yesu ilyo aali pe sonde, ayalembwa mu Malandwe yalangilila bwino ifyo Umwana wa kwa Lesa aali. Apo Abena Kristu balingile ‘ukukonka sana mu ntampulo shakwe,’ kanshi na ifwe tulingile ukulapekanya bwino ilyo tukalasambilila icitabo ca kuti ‘Iseni Mulenkonka.’ Tukatendeka ukusambilila ici citabo pe Sambililo lya Baibolo Ilya pa Cilonganino mu mulungu wa March 1. (1 Pet. 2:21; Marko 10:21) Yesu alecita ifintu ifyacindama sana ilyo ali pe sonde, kanshi ilyo tukalasambilila, tukalepoosa sana amano ku fyo alecita pa kuti fikaletukoselesha ilyo tuleshimikila.
2. Bushe ica kumwenako ca kwa Yesu ica kushipikisha citwafwa shani?
2 Ica Kumwenako ca kwa Yesu: Bushe balitala abamwasukapo ububi ilyo mwaleshimikila ku ng’anda ne ng’anda? Nga ca kuti batwasuka bubi bubi, tulingile ukwibukisha amashiwi ya kwa Yesu ayatila: “Nga bacushishe ine, na imwe bakamucusha.” (Yoh. 15:20) Kwena, te lyonse twingalanda ati nga batwasuka ifyo ninshi baletucusha. Icalengele Yesu ukushipikisha amesho yalekanalekana nico alishibe ukuti ku ntanshi kwali no kuba ifintu ifisuma. Na ifwe bene tulingile ukubika amano ku kusekesha Yehova na pa kupokelela icilambu pa mulandu wa kuba ne cishinka kuli wena. Ukucite fi kukatwafwa nga nshi ‘ukukananaka no kutompoka.’ (Heb. 12:2, 3; Amapi. 27:11) Ilyo tuleshipikisha mu mulimo, kuti twacetekela no kuti Kristu Yesu akalatutungilila.—Mat. 28:20.
3. Bushe kuti twapashanya shani Yesu pa kushimikila imbila nsuma mu kucincila?
3 “E Co Natuminwe”: Ico Yesu acindamike sana pali fyonse, mulimo wa kushimikila pa Bufumu. (Luka 4:43) Ilyo aleshimikila imbila nsuma aliipeeleshe. Alishibe ukuti inshita ya kubila imbila nsuma yalicepele, e ico lyonse alefwaya inshila ya kwebelamo abantu pa Bufumu. Apo tuli basambi ba kwa Yesu, bushe ukukonka ica kumwenako cakwe kuti catutungulula kwi? Ilyo tulebomba imilimo yesu iya lyonse, bushe kwalibako abantu twingashimikila imbila nsuma? Kanshi ukutemwa kwa kwa Kristu nakutucincishe ukubila imbila nsuma ukufika apo twingapesha!—2 Kor. 5:14.
4. Bushe kuti twacita shani pa kuti tuleshimikila bwino?
4 “Takwatala Akuba Nangu Umo Uulanda Ngo Yu Muntu”: Inshila Yesu alesambilishishamo yalepapusha abalemukutika. (Yoh. 7:46; Mat. 7:28, 29) Cinshi calengele ukuti apusaneko na bakasambilisha bambi? Alitemenwe icine ico alesambilisha, alitemenwe abantu alesambilisha, kabili alebomfya inshila shalekanalekana pa kusambilisha. Nga tulepashanya Kasambilisha Mukalamba, na ifwe kuti twatendeka ukulashimikila bwino.—Luka 6:40.
5. Ilyo tukalasambilila icitabo ca kuti ‘Iseni Mulenkoka,’ cinshi tukalafwaisha ukucita?
5 Ifi twalandapo ni fimo fimo fye pa fyo Yesu acitile ilyo ali pano calo. Fisuma nshi na fimbi mwingasanga? Ilyo mukalasambilila pali Yesu mwi Sambililo lya Baibolo Ilya pa Cilonganino, mukale-esha “ukwishiba ukutemwa kwa kwa Kristu” pa kupashanya ifyo alelanda ne fyo alecita.—Efes. 3:19.