Ifya Kubilisha

◼ Ulupapulo lwa kushalika mu March: Bushe Cinshi Baibolo Isambilisha? Bakasabankanya bafwile ukutampa isambililo lya Baibolo nga bashalika ici citabo nelyo nga basanga ukuti abo balelanda na bo balikwata kale ici citabo. April na May: Ulupungu lwa kwa Kalinda na Loleni! Ilyo mulepempula abafwaya ukusambilila Baibolo, na basangilwe ku Cibukisho nangu ku kulongana kumbi ukukalamba lelo abashisangwa lyonse ku kulongana kwa pa cilonganino, kuti cawama mwabapeela icitabo ca Bushe Cinshi Baibolo Isambilisha? Ico mufwile ukubapeelela ici citabo, kutendeka amasambililo ya Baibolo. June: Bushe Cinshi Baibolo Isambilisha? Bakasabankanya nga basanga ukuti abo balelanda na bo balikwata kale ici citabo, bafwile ukubashiila icitabo icili conse ica mabula 192 ica mapepala ayamoneka aya kaki nelyo icitabo cimbi icafumine ilyo umwaka wa 1995 taulafika.

◼ Ilyo mwapokelela fye Ulupungu lwa kwa Kalinda na Loleni, mufwile ukwangufyanya ukupeela bakasabankanya pa kuti babelenga no kwishiba ifilimo ilyo bashilaya mu kushalika mu mulimo wa mwi bala.

◼ Icibukisho cikaba pali Cibili pa 30 March, 2010. Pa Cibukisho tukalabomfya inyimbo namba 8 na 109 ishaba mu citabo ca nyimbo ishipya. Nga ca kuti mulongana pali Cibili, mufwile ukufwaya ubushiku bumbi mu kati ka mulungu ubwa kulonganapo. Nga ca kutila pa Ng’anda ya Bufumu paba ifilonganino ifingi kabili mwafwilwa ukusanga ubushiku bumbi ubwa kulonganapo, ninshi uyo mulungu ilyo kukaba icibukisho tamwakalongane. Lelo ifyo muli no kusambilila mu Kulongana kwa Mulimo muli uyo mulungu nga fyebo ifikumine sana icilonganino cenu, kuti mwaisafilandapo mu Kulongana kwa Mulimo kumbi ukukakonkapo.