Kalata Ukufuma kwi Bumba Litungulula

Kuli Bakabomba Banensu, Inte sha kwa Yehova:

Lishuko nga nshi ukuba Inte sha kwa Yehova uwaba Kateka wa mu Kubumbwa konse! Ili ishina lya muyayaya, te kuti lilobe, kabili takwaba ishina ilingalingana na lyo. Uwatupeele ili shina ni Yehova umwine kabili ukutula fye mu 1931 abantu batwishiba ukuti ni fwe twakwata ili shina ilyaibela. (Esa. 43:10) Kanshi, ukwishibikwa ukuti Inte sha kwa Yehova kulatuletele cilumba icine cine.

Kaseebanya alabombesha ukwesha ukulofya ishina lya kwa Lesa. Alilenga ne nko shonse isho atungulula ukulasuusha ishina lya kwa Yehova. Babiloni Mukalamba e kutila imipepele ya bufi yonse iyaba mwi sonde, alipata ishina lya kwa Lesa kabili alilifumyamo na mu maBaibolo ayengi. Nomba Yesu ena alicindika sana ishina lya kwa Wishi, ica kuti na mwi pepo lyakwe ilya cilangililo ilyo asambilishe abasambi bakwe e lyo abalilepo ukulumbula. Atile: “E ico imwe mufwile ukupepa ifi, amuti: “‘Shifwe wa mu muulu, ishina lyenu libe ilya mushilo.’” (Mat. 6:9) Pa numa ya ico apepele kuli Wishi ipepo lya kufuma ku mutima, atile: “Nalenga ishina lyenu ukwishibikwa ku bantu abo mwampeele ukufuma mu ba muli ici calo.” (Yoh. 17:6) Apo tufwaya ukukonka ica kumwenapo kwa kwa Yesu icisuma, twalipampamina pa kubilisha ishina lya kwa Yehova na maka yesu mwi sonde fye lyonse.

Ilembo lya mwaka wa mu 2009, ilyaleti ‘Ukulabila sana imbila nsuma,’ lyalengele twabombesha mu mulimo wesu uwa kushimikila. (Imil. 20:24) Kanshi Yehova alitupaalile icine cine mu mwaka wa mulimo uwapwile. Cine cine umulimo wa kushimikila ubunte isonde fye lyonse waletele ilumbo no mucinshi kwi shina lya kwa Yehova. Impendwa ipya iya bakasabankanya yafikile kuli 7,313,173 ababombele pamo mu kushimikila imbila nsuma ku bantu bonse, e lyo no kusambilisha bonse aba mitima isuma abafwayafwaya inshila sha kupwishishamo amafya bakwata cila bushiku. Impendwa ya basangilwe ku Cibukisho ca mfwa ya kwa Kristu abali 18,168,323 ilelangilila ukuti abengi nga nshi kuti pambi baisa mu kwita pe shina lya kwa Yehova ilyo impela ya buno bwikashi ishilafika.

Apo fye Yehova acili alesuminisha cino calo ukutwalilila, tukalashimikila imbila nsuma iya Bufumu mu kucincila, no kwesha inshila shalekanalekana pa kuti tulelanda na bantu mu cifulo umo tushimikila. (Mat. 24:14; Marko 13:10) Shi natulenge ishina lya kwa Yehova ukwishibikwa nampo nga ni ku ng’anda ne ng’anda, ukushimikila mu musebo, ukulemba kalata, ukushimikila pali lamya nelyo mu bunte bwa mu lyashi.

Tatuletwishika ukuti nomba line Yehova akonaula isonde no kulenga ishina lyakwe ukuba ilya mushilo. (Esek. 36:23) Inshita ya kuti Yehova akonaule bonse abaseebanya ishina lyakwe ileya ilepalama. Mwandini iyo ikaba ni nshita iisuma kuli bonse ababombela Yehova mu cishinka, abalenga abantu abengi ukwishiba ishina lya kwa Yehova e lyo no kuti e walinga ukuteka umuulu ne sonde!

Pa kulongana kwa Citungu no Kulongana kwa Pa Kati ka Nko ukwali no mutwe wa kuti “Mulelola,” ukwacitike mu mwaka wa 2009 mu ncende ishingi isha calo, e po Yehova alangishe sana ukutemwa kwakwe ku bantu bakwe. Kulya kulongana na ko kwali pa fintu ifyacindama ifyacitika mu kuteyanya kwesu, kabili kwalengele ifwe bonse ukulola ukucila ifyo twaba lyonse ilyo ubushiku bwa kwa Yehova bulepalamina.—Marko 13:37; 1 Tes. 5:1, 2, 4.

Cine cine Yehova musuma, alatulenga ukusekelela. Alatulenga ukulambalala mu mulemfwe uuteku kabili atutungulula ku fifulo fya kutuushako ukwaba amenshi.—Amalu. 23:1, 2; 100:2, 5.

Ishibeni ukuti nangu cibe shani Yehova akatwalilila ukumupaala ilyo mulebombesha mu mulimo wa Bufumu mu myeshi ya ku ntanshi!

Twamuposha umutende wa Bwina Kristu imwe bonse bamunyinefwe ba mwi sonde lyonse,

Ni fwe bamunyinenwe,

Ibumba Litungulula ilya Nte sha kwa Yehova