‘Imbila Nsuma iyi Ikabilwa’!
1. Twaishiba shani ukuti takuli ifingalesha umulimo wa kushimikila?
1 Kwena takwaba nangu cimo icingalesha Yehova ukufikilisha ubufwayo bwakwe. (Esa. 14:24) Nangu ca kutila Umupingushi Gideone na bashilika bakwe 300 bali no kulwa na balwani abena Midiani 135,000 abalemoneka kwati te kuti bacimfiwe, Yehova aebele Gideone ukuti: “Ukapususha Israele mu minwe ya bena Midiani. Pantu nine nkutumine.” (Abapi. 6:14) Bushe mulimo nshi Yehova afwilisha sana pali ino nshita? Yesu atile: “Imbila nsuma iyi iya bufumu ikabilwa ku bantu bonse aba pe sonde.” (Mat. 24:14) Takuli nangu umo uukalesha umulimo wa kushimikila ukuti ufike apo Lesa umwine afwaya ukuti ufike!
2. Mulandu nshi twingacetekela ukuti Yehova kuti atwafwa umo umo ilyo tuleshimikila?
2 Yehova Alatwafwa Umo Umo: Twalishiba ukuti Yehova kuti ayafwa abantu bakwe bonse ukubomba bwino umulimo wa kushimikila, lelo bushe Yehova kuti atwafwa umo umo? Ilyo umutumwa Paulo ali no bwafya, Yehova alimwafwile ukupitila mu Mwana wakwe Yesu. (2 Tim. 4:17) Kuti twacetekela ukuti na ifwe bene Yehova akatwafwa ilyo tulebombesha pa kuti tubombe bwino umulimo wakwe.—1 Yoh. 5:14.
3. Ni mu fintu nshi ifyapusanapusana umo Yehova atwafwa?
3 Bushe incito isho mubomba cila bushiku shilamulenga ukunaka ica kuti mwafilwa no kubomba umulimo wa kushimikila? “Lesa alapeela amaka ku wanaka.” (Esa. 40:29-31) Bushe kuli abalemucusha nelyo ukumukaanya? ‘Pooseni icisendo cenu pali Yehova, Na o akamukosha.’ (Amalu. 55:22) Bushe limo limo mulafilwa ukuicetekela? Yehova aebele Mose ukuti: “Kabiye, na ine nkaba na iwe kabili nkakusambilisha ifyo ufwile ukusosa.” (Ukufu. 4:11, 12) Bushe ukulwalilila kulamulenga ukufilwa ukulabomba bwino umulimo wa kushimikila? Yehova alatasha ifyo mubomba kabili kuti amupaala nga mulebomba no mutima wenu onse te mulandu ne fyo umulimo mulebomba wingacepa.—1 Kor. 3:6, 9.
4. Bushe ukucetekela muli Yehova kuti kwatwafwa shani?
4 Ukuboko kwa kwa Yehova ‘kwalitambalikwa [takuli] uwingakubwesha’? (Esa. 14:27) Apo natwishiba ukuti Yehova akulatupaala lintu tulebomba umulimo wa kushimikila, natutwalilile ukulashimikila ‘ukwabula umwenso pantu Yehova alatupeela amaka.’—Imil. 14:3.