Mulebombesha pa Kuti Muletendeka Amasambililo ya Baibolo

Ukutendeka mu January mu 2009, ifilonganino fyonse bafikoseleshe ukusalapo ubushiku bumo mu mweshi pa Cibelushi nelyo pa Mulungu ukuti bube ubwa kutendekapo amasambililo ya Baibolo. Finshi fyacitika? Bakasabankanya abengi balapapa pa fyo basanga, kabili balaba ne nsansa sana pantu basanga ukuti ukulanga abantu ifyo tusambilila Baibolo kwalyanguka sana ukucila ifyo baletontonkanya kabili baliba ne nsansa pa mulandu wa kuti abantu abapusanapusana balasumina ukusambilila Baibolo mu citabo ca Bushe Cinshi Baibolo Isambilisha? Bakangalila abenda balanda ukuti ifilonganino fyaliba ne nsansa sana pali iyi nshila ipya iya kushimikililamo, kabili kale kale natumona ifisuma ifilecitika. Ku ca kumwenako, mu myeshi isano iya kubalilapo aba bwananyina aba ku Italy batendeke amasambililo ya Baibolo ukucila pali 8,000.

Bakasabankanya abashatala abatungululapo amasambililo ya Baibolo nomba balabwelela kubo bashimikile kabili baletendeka na masambililo. Ba Carolina, aba ku Peru, batile: “Ilyo kushilaba iyi nshila ipya, nshakwete amasambililo ya Baibolo ayali yonse, nomba ukutula apo twakwatila ubushiku bumo mu mweshi ubwa kutendeka amasambililo ya Baibolo nalimona ukutila calicindama ukuti ndebombesha ukutendeka isambililo lya Baibolo. Nomba ndalanga abo nsanga pa mayanda ukuti ukusambilila Baibolo kwalyanguka kabili takupoosa ne nshita. Ndatasha sana Yehova, kabili pa mulandu wa kuti ndakonka inshila shisuma isho atupeela, abantu abengi balakutika ilyo ndebashimikila; nomba ndatungulula na masambililo ya Baibolo yabili.”

Kangalila umo uwa muputule uwa ku Peru atile: “Ukutula fye apo iyi inshila isuma yatendekele, amasambililo ya Baibolo yalifula. Aba mu cilonganino cimo balitendeke amasambililo ayapya 25 mu mweshi umo, kabili bambi nabo batendeke amasambililo ya Baibolo ayapya 24.”

Bakasabankanya abaice nabo bene balalanga abantu ifyo tusambilila Baibolo. Giovanna uwa myaka 11 uwikala mu São Paulo, ku Brazil, atile: “Bushiku bumo pa Cibelushi mu nshita ya kasuba, ine na bamayo twaleshimikila ku ng’anda ne ng’anda, ukwipusha abantu nga kuti batemwa ukusambilila Baibolo mu citabo ca Bushe Cinshi Baibolo Isambilisha? Pa ng’anda ya kubalilapo, naipwishe abene ba ng’anda, bashimakwebo abaishibikwa sana nga ca kuti balisumina ukuti Baibolo yafuma kuli Lesa. Balisumiine. Lyena nabalangile ilembo lya 2 Timote 3:16. Batile balipapile sana ukumona umukashana umunono alelanda ifintu ifisuma nga nshi, kabili balipokele icitabo.

“Ilyo nabwelele kuli balya bashimakwebo, naile na bashikulu pantu balishibana. Balya baume balitwingishe mu ng’anda kabili nalibebele ukuti basale umutwe bengatemwa ukuti tulanshanyepo mu citabo ca Bushe Cinshi Baibolo Isambilisha? Basalile icipandwa 11 icitila, ‘Cinshi Lesa Asuminishisha Ukucula?’ Pa numa ya kubelenga amaparagrafu ya kubalilapo yabili, aba baume pamo na bena mwabo batendeke ukwipusha ifipusho ifingi. Balitemenwe sana ukusanga ifyasuko fyonse muli Baibolo, kabili balisumiine ukulasambilila Baibolo lyonse. Ala mwandini nalitemenwe ukutendeka isambililo lya Baibolo ilyo nalanshenye no muntu pa muku wa kubalilapo twatandele!”

Lelo kwena, te bonse abakulasumina ukusambilila Baibolo, e lyo te bonse abatendeka ukusambilila Baibolo abakatwalilila. Nomba apo tubombela pamo na Lesa, tulatwalilila ukulanga abantu ifyo tusambilila Baibolo ukufika apo twingapesha, pantu twalishiba ukuti Yehova alekula abapala impaanga ukuti bese mu kuteyanya kwakwe ilyo cino calo ca kwa Satana tacilaonaika.—Yoh. 6:44; 1 Kor. 3:9.