Ifyo Mwingacingilila Ubumi Bwenu

Ukuisunga aba busaka kwalicindama sana. Ing’anda yesu ne fifulo tulonganinamo tufwile ukufisunga ifya busaka.—Amala. 23:10-14.

Ukupoosa ubusali: Mu busali mwaliba sana utushiishi utuleta amalwele. Utu tushiishi nga twaya mu menshi na mu fya kulya nelyo ku minwe, kuti twatulila kumo ne fya kulya kabili kuti twalwala. Tufwile ukupoosa ubusali bwa bantu mu fimbusu ifya kukumpa nelyo ifya kwimba. Lyonse mulepipa ubusali bwa nama. Mulewamya mu fimbusu libili libili. Lyonse mulefimba pa fimbusu fya kwimba no kukumpa ifimbusu fya kukumpa.

Mulesamba ku minwe: Mulesamba ku minwe lyonse. Mulesambila na sopo nelyo imitoyi pantu filepaya utushiishi. Ukusamba fye ku minwe ukwabula ukubomfya sopo nelyo imitoyi takwipaya utushiishi. Calicindama ukusamba ku minwe nga mwafuma ku cimbusu nelyo mu kupipa umwana. Na kabili mulesamba ku minwe ilyo mushilatendeka ukupekanya ifya kulya, ilyo mushilatendeka ukuliisha umwana, na lintu mwafuma mu kwangasha ifiteekwa. Mulesambilisha abana ukulasamba ku minwe no kulataluka ku fimbusu nelyo ukuya ubusali. Bushe lyonse nga mulelongana pa Ng’anda ya Bufumu mulepekanya ifya kubomfya pa kusamba ku minwe?

Mulebomfya amenshi ayasuma: Abantu tabalwalalwala nga balebomfya amenshi ayasuma. Nga mutapa amenshi mu fishiba, mu mimana, mu fishima, na mu matanki ayo bashafimbapo ninshi mulingile ukuyepika. Mulefimba pa fishima. Libili libili mulesamfya ifyo musungilamo amenshi, intambo ne cikopo mutapilamo amenshi mu cishima no kufisungila umwa busaka. Mwilaleka inama shilepalama uko mutapa amenshi. Nga ni mu ng’anda kuti cawama mwakwata imbeketi iyakwata pompi. Mwilaikata ku menshi ya kunwa nga tamusambile ku minwe.

Mulecingilila ifya kulya ku tushiishi: Kuti mwaipaya utushiishi nga muleipikisha ifya kulya. Utushiishi tulasanda bwangu mu fya kulya fya cifulefule. E co, mulelya ifya kulya pa numa fye ya kufipika. Nga mulefwaya ukusunga ifya kulya pa ma-awala ukucila yabili, mulefisungila umwakaba nelyo umwatalala. Na kabili, nga mulefwaya ukusunga ifya kulya ifyaipikwa pa kuti mwise mufilye pa nshita imbi, mulefimbapo. Ukucita ifi kulacingilila ifya kulya kutushiishi na balunshi. Ilyo mushilalya ifya kulya muletala mwakafyako. Mulesamfya imisalu ne fisabo mu menshi ayasuma. Calicindama ukucita ifi maka maka nga mulepeela utunya na baice.

Mwilasunga ifisooso mu ng’anda: Balunshi, impemfu, na bakoswe fyonse filakwata utushiishi utuleta amalwele. Ifi fintu fisanda sana ukuli ifiko. Nga tabakusa ifisoso uko mwikala, mulefipoosa mu mukanda no kushikapo nelyo ukoca cila bushiku. Mulesunga ing’anda iya busaka, mulepoosa ifisoso, no kwitila amenshi ayalamba.

Nga mulekonka ifi fintu, mukacingilila ubumi bwenu no bwa ba mu ng’anda yenu.