Umukululo wa Mepusho

Bushe bakapyunga kuti ba-afwilisha shani abafyashi ukusunga abana babo pa kutila kube umuyano pa kulongana?

Ilingi line abana balitemwa utwa kucitacita, kabili tababelela ukwikala pamo pene pa nshita iitali. Pa numa ya kulongana, abaice kuti balafwaya fye ukulabutauka e lyo no kulapepekana mu Ng’anda ya Bufumu nelyo pa fifulo fimbi ifyo tulelonganinapo, kuti balapepekanina no ko twimika amamotoka e lyo no mwakupita abantu. Ipinda lya mu Baibolo lya cine ilitila: ‘Kalume uo balekelesha alenga abafyashi insoni.’—Amapi. 29:15.

Ku ca bulanda, bamunyinefwe bamo na bankashi abakalamba bali-icena ububi pa mulandu wa kuti abaice balebutauka e lyo babaponya. Ici calileta amafya ku bafyashi ne cilonganino kabili calilenga no kuti bapoose indalama isho bashali no kupoosa. Kanshi tatufwile ukuleka abana ukulabutauka no kwangalila mu Ng’anda ya Bufumu nelyo pa nse pantu limbi kuti baicena no kucena bambi.

Baibolo yalilanda ukuti mulimo wa bafyashi ukukansha abana babo pa kuti balecindika ififulo fya kupepelapo. (Luk. Mil. 5:1a) Pa kulongana kwesu konse ukwa Bwina Kristu nampo nga kwa pa cilonganino nelyo ukulongana kukalamba, bakapyunga balapeelwa umulimo wa kumona ukuti “fyonse filecitika bwino bwino.” (1 Kor. 14:40; Kol. 2:5) Ilyo tulelongana, bakapyunga bafwile ukulamona ifilecitika pa nse na mu kati inshita fye iili yonse. Nga ca kuti umwana alebutauka nelyo alepumfyanya abantu, kapyunga kuti alesha umwana ifyo alecita no kumulondolwelela umulandu ifyo alecita fibipiile. Kapyunga afwile no kweba abafyashi ba uyo mwana umulandu cacindamina ukubika amano ku mwana pa kuti ebaletela amafya e lyo elapumfyanya na bantu bambi. Abafyashi bafwile ukumfwila ifyo babeba ukucita.

Twalishiba ukuti inshita shimo shimo abana abanono sana kuti balila nelyo ukupumfyanya bambi ilyo kuli ukulongana. Bakapyunga nga balefika bwangu, nalimo amamineti 20 ilyo ukulongana kushilatendeka, kuti bashilako abafyashi abali na bana banono ifipuna fya ku numa. Bonse tufwile ukumfwila bakapyunga ilyo baletulanga apa kwikala.

Nga ca kuti umwana alepumfyanya, abafyashi bafwile ukucitapo cimo. Nga tabacitilepo nangu cimo kabili umwana atwalilila fye ukupumfyanya abantu, kapyunga afwile mu cikuuku ukweba abafyashi ukutwala umwana pa nse. Nga twalalika abapya na bana babo abanono ku kulongana, tufwile ukwikala nabo no kubaafwako ukusakamana abana nga batendeka ukulila nelyo ukupumfyanya bambi.

Cilawama ukumona abana ba mishinku yonse pa Ng’anda ya Bufumu no kumona imibele yabo iisuma mu ng’anda ya kwa Lesa. (1 Tim. 3:15) Ilyo balecindika ififulo fya kupepelapo Yehova, balanga ukuti balimucindika kabili aba mu cilonganino bonse balatasha abana ba musango uyu.