Mulepashanya Bakasesema—Amose
1. Finshi twingasambilila kuli Amose?
1 Bushe mwalitala amumfwapo ukuti te kuti mushimikile imbila nsuma pa mulandu wa kuimona ukuti muli ba pa nshi? Nga ca kuti e fyo caba, ninshi mulingile ukupashanya Amose uwali uwashipa. Nangu ca kuti aleteka fye impanga kabili alebomba fye inshita shimo shimo mu mwaka, Yehova amupeele amaka ya kubila imbila yacindama. (Amose 1:1; 7:14, 15) Na lelo line, Yehova abomfya abantu abamoneka aba pa nshi. (1 Kor. 1:27-29) Finshi fimbi twingasambililako kuli kasesema Amose ilyo tuleshimikila?
2. Mulandu nshi tulingile ukutwalilila ukushimikila nangu baletukaanya?
2 Muleba Abashipa Ilyo Balemukaanya: Ilyo Amasia, shimapepo uwalepepa umwana wa ng’ombe uwali ku bufumu bwa mikowa 10 ubwa Israele aumfwile ukusesema kwa kwa Amose, ayaswike ati: ‘Kabiye ku mwenu! Tuleke fwe bene! Twalikwata imipepele yesu!’ (Amose 7:12, 13) Amasia alinyongenye amashiwi ya kwa kasesema ilyo alelomba Imfumu Yeroboamu ukukanya umulimo walebomba Amose. (Amose 7:7-11) Lelo Amose tatiinine iyo. Na muno nshiku mwine, bashimapepo bamo balabomfya bakateka ku kucusha abantu ba kwa Yehova. Lelo Yehova alitulaya ukuti icanso conse ico batupangila tacakabombe umuyayaya.—Esa. 54:17.
3. Fintu nshi fibili tulandapo ilyo tulebila imbila nsuma?
3 Bileni Ubupingushi bwa kwa Lesa na Mapaalo Akaleta: Nangu ca kuti Amose alebila pa bupingushi bwali no kwishila ubufumu bwa mikowa 10 ubwa bena Israele, pa mpela ye buuku alembele ilyakwata ishina lyakwe, alekeleshe ukulemba pa bulayo bwa kuti Yehova akababwesha cipya cipya no kubapaala nga nshi. (Amose 9:13-15) Na ifwe bene tulabila ‘imbila nsuma ya bufumu’ iilanda na pa “bushiku bwa bupingushi” ubwa kwa Lesa. (2 Pet. 3:7; Mat. 24:14) Tulabila ukuti Yehova akonaula abantu babipa pa Armagedone, no kulenga isonde ukuba paradaise.—Amalu. 37:34.
4. Cinshi calenga tucetekele ukuti Yehova akalatwafwa ukucita ifyo afwaya?
4 Pa mulandu wa kuti twali-ipeela kuli Yehova kabili tulafwaisha ukucita ukufwaya kwakwe, tulacula ilyo tulebila imbila ya Bufumu mu calo umwaba sana abatukaanya. (Yoh. 15:19) Na lyo line, twalicetekela ukuti Yehova akatwalilila ukutwafwa pa kuti tulecita ifyo afwaya, nga filya fine aafwile Amose.—2 Kor. 3:5.