Bushe Mulebafwa Ukuba “Abalimbwa” no Kuba ne “Citetekelo Icakosa?”

Cinshi imiti ikwatila imishila? Imishila, e ilenga icimuti ukulimbwa bwino mu mushili kabili e mupita amenshi ne fintu fimbi ififuma mu mushili ifilenga icimuti ukukula bwino. Ku mishila imo kulapuuka no tu miti utuya tulekula mpaka twasanguka imiti iikulu. Ifyo imiti ikula, fyalipalana sana ne fyo abasambi balunduluka. Apo tubombela pamo na Lesa, nga tuleshimikila ninshi tuletanda no kutapilila imbuto sha Bufumu. E lyo Yehova umwine ‘e umesha’ imbuto.—1 Kor. 3:6.

Nga filya fine icimuti icilekula cikabila ukuba ne mishila iyakosa, abo tusambilisha Baibolo nabo balingile ukusambilila ifingalenga baba abakosa mu cine. Bafwile ‘ukulimbwa’ muli Kristu e lyo no “kuba ne citetekelo icakosa” pa kuti ilyo bakalakwata amesho bakaleshipikisha. (Kol. 2:6, 7; 2 Tim. 3:12; 1 Pet. 5:8, 9) Na kabili, pa kuti bakalesambilisha bambi bwino, bafwile “ukwishiba bwino bwino icine.” (1 Tim. 2:4) Icitabo ca Ico Baibolo Isambilisha cilaafwa abasambi ukwishiba amasambililo yacindama aya mu Baibolo, e lyo icitabo ca Ikalilileni cilabafwa ukulatontonkanya pa mafunde ya kwa Lesa ne fishinte fyaba mu Baibolo. Icitabo ca Ikalilileni bacilembele ukuti ciletwafwa ukulalanshanya bwino na basambi ba Baibolo abalelunduluka pa fintu pamo nga imifwalile, ubusaka, ifya kutambatamba ne fya kuleseshamo icitendwe e lyo na pa fya kusala bwino ifibusa.—lv amabu. 50-73.

Bamo abo tusambilisha Baibolo balalunduluka bwangu sana no kubatishiwa pa numa fye ya kupwa icitabo ca Ico Baibolo Isambilisha. Bushe tulingile ukuleka ukula-afwa aba basambi abapya? Iyo. Tufwile ukutwalilila ukulasambilila nabo mpaka bapwisha ifitabo fyonse fibili, Bushe Cinshi Baibolo Isambilisha? e lyo na “Ikalilileni mu Kutemwa kwa kwa Lesa.”—Moneni Umukululo wa Mepusho mu Ubutumikishi Bwesu Ubwa Bufumu ubwa November 2011 no bwa March 2009, ibula 2.

Kwena ilingi imishila ya cimuti taimoneka, lelo yalicindama nga nshi pantu e ilenga icimuti ukulimbwa bwino mu mushili e lyo no kucipeela amenshi ne fintu fimbi ifilenga cilekula bwino. E fyo ciba na ku balesambilila Baibolo, pa kubala te kuti tumone ukuti ifyo basambilila pa mibele ya kwa Kristu e lyo ne fyo alesambilisha, nafibafika pa mutima na mu matontonkanyo. Nomba panono panono balatendeka ukwaluka no kukosha icitetekelo cabo. Mu kuya kwa nshita, balaipeela kuli Yehova no kutwalilila ukulaenda mu cine. Ici cilatusansamusha nga nshi.—1 Pet. 2:21; 3 Yoh. 4.