Icibukisho Cileisa Cikatupeela Ishuko lya Kulanga Ukuti Tulatasha

1. Lishuko nshi tukakwata mu inshita ya Cibukisho?

¹ Icibukisho ico tukakwata pa 14 April, cikatupeela ishuko lya kulanga ukuti tulatasha Yehova pa busuma bwakwe. Pali Luka 17:11-18 paba ilyashi ililanga ukuti Yehova na Yesu balitemwa abantu abatasha. Ili ilyashi lilanda pa bantu 10 abalwele ifibashi abo Yesu aposeshe. Ku ca bulanda, umo fye pali aba, e wabwelele mu kutasha. Pa mulandu wa cilubula ico Lesa atupeela, ukulwala kukafumapo kabili tukaba no mweo wa muyayaya. Ilyo ifi fikacitika, tukalatasha Yehova cila bushiku pali aya mapaalo. Nomba kuti twalanga shani ukuti tulatasha pa fyo Lesa atupeela icilubula mu milungu ileisa?

2. Kuti twalanga shani ukuti tulatasha pa cilubula?

² Ifingamwafwa Ukulatasha: Icilenga umuntu ukutasha pa fyo bamupeela nelyo ukumucitila fintu atontonkanya. Kanshi pa kuti tuletasha sana pa cilubula, tulingile ukubelenga amalembo yalya batutantikila ukubelenga mu nshita ya Cibukisho. Kuti mwasanga aya malembo muli Kalenda, e lyo na mu katabo ka Ukubebeta Amalembo Cila Bushiku. Kuti cawama ukulabelengela aya malembo pamo no lupwa. Ukucita ifi kukalenga tukaletasha nga nshi pa cilubula. Ici cikalenga tukabe ne mibele isuma.—2 Kor. 5:14, 15; 1 Yoh. 4:11.

3. Ni nshila nshi twingalangilamo ukuti tulatasha pa cilubula mu nshita ya Cibukisho?

³ Tukalange Ukuti Tulatasha: Ifyo umuntu acita e filanga ukuti alatasha nelyo iyo. (Kol. 3:15) Ilyo uwa fibashi amwene ukuti Yesu amundapa, alibwelelemo ku kuyafwaya Yesu pa kuti amutashe. E lyo uwa fibashi afwile aleya aleshimikilako bambi pa fyo Yesu amundepe. (Luka 6:45) Inga ifwe, bushe ukutasha pa cilubula kukatulenga ukubombako sana kampeni ya kwita abantu ku Cibukisho? Ukubombako bupainiya bwa kwafwilisha ni nshila imo iyo twingalangilamo ukuti tulatasha. Lyena pa bushiku bwa Cibukisho, ukutasha pa cilubula kukalenga tukapokelele bwino abakesa ku Cibukisho no kwasuka amepusho yonse ayo bakakwata.

4. Finshi tufwile ukucita pa kuti twikomfwa ububi Icibukisho nga capita?

⁴ Bushe Icibukisho cileisa e cikaba ica kulekelesha ninshi Armagedone yaisa? (1 Kor. 11:26) Kwena te kuti twishibe iyo. Lelo ico twishibe fye ca kuti, ici Cibukisho nga capita ninshi ishuko lya kulanga ukuti tulatasha pa cilubula lyapita. Bushe mukabombesha mu mulimo wa mwi bala pa kulangilila ukuti mulatasha Lesa pa cilubula? Shi amashiwi yesu aya kutasha ne fyo imitima yesu itontonkanyapo filesekesha Yehova uwatupeele icilubula.—Amalu. 19:14.