Kalata Ukufuma kwi Bumba Litungulula

Kuli bamunyinefwe na bankashi:

“Lyonse tutootela Lesa ilyo tulemulumbula bonse mu mapepo yesu, pantu lyonse twibukisha umulimo mubomba pa mulandu wa citetekelo cenu ne fyo mubombesha pa mulandu wa kutemwa kwenu, e lyo ne fyo mushipikisha pa mulandu wa kusubila Shikulwifwe Yesu Kristu pa ntanshi ya kwa Lesa wesu kabili Shifwe.” (1 Tes. 1:2, 3) Ala aya mashiwi yalelondolola bwino sana ifyo tumfwa pali imwe! Tulatootela Yehova pali imwe na pa mulimo uusuma uo mubomba. Mulandu nshi?

Umwaka wapwile mwali abacincila mu ‘mulimo uo mubomba pa mulandu wa citetekelo cenu’ na pa mulandu wa ‘kutemwa kwenu.’ Mwe bengi mwalifwaya inshila na shimbi isha kulundulwilamo umulimo wenu. Bamo balikuukila ku ncende shimbi na ku fyalo fimbi ukwaba ukukabila kwa bakabila ba Bufumu. Bambi balilundulula umulimo wabo pa kulashimikila ku cintubwingi. Abengi baliitemenwe ukubombako bupainiya bwa kwafwilisha mu nshita ya Cibukisho, mu mweshi kangalila wa muputule alebombela icilonganino cabo, na lintu kwali kampeni yaibela mu August 2014. Nangu ca kuti ifyo mupitamo filapusanapusana, tulamutasha nga twamona ifyo mulebombela Yehova ne mitima yenu yonse. (Kol. 3:23, 24) ‘Umulimo wenu uwa citetekelo’ e ulenga tuletasha Yehova!

Tulamutasha sana na pa ‘fyo mubombesha pa mulandu wa kutemwa kwenu’ ilyo muleipeelesha ukulakuula ifikuulwa ifya kubomfya mu kupepa kwa cine isonde lyonse. Ifi fikuulwa filekabilwa sana pantu abantu ba kwa Yehova baleya balefulilako fye. (Esa. 60:22) Taleni tontonkanyeni, icipendo ca bakasabankanya muli uyu mwaka wapwile cafikile kuli 8,201,545, amasambililo ya Baibolo ayaletungululwa cila mweshi nayo yafikile 9,499,933. Pa mulandu na uku ukulunduluka, amaofeshi ya misambo yalingile ukuyakusha nelyo ukuyawamya. Ici calola mu kuti Amayanda ya Bufumu na yambi yalefwaikwa! Na kabili, Amaofeshi ya Bakapilibula yalefwaikwa mu ncende ishapusanapusana, pa kuti bakapilibula baleikala no kubombela uko kwine balanda ulo ululimi.

Kanshi kuti twayipusha atuti, ‘Finshi ningacita pa kuti ndetungilila aya amakuule?’ Bamo kuti twabombako umulimo wa kukuula. Nampo nga twalishiba ukukuula nelyo iyo, bonse twalikwata ishuko lya kusangwilako kuli aya amakuule ayacindama. (Amapi. 3:9, 10) Ilyo abena Israele balekuula icikuulwa ca mushilo, balisangwile ifingi ica kuti babaleseshe fye ukuletelapo na fimbi. (Ukufu. 36:5-7) Ukwabula no kutwishika, ifyo tubelenga mu Malembo ya musango uyu filatufika pa mutima no kutucincisha ukulasangwilako. ‘Ifyo mubombesha pa mulandu wa kutemwa kwenu’ muli iyi milimo iyacindama, na fyo filalenga tuletootela Yehova!

Na cimbi icacindamisha icilenga ukuti tulesekelela, kumona ifyo aba bwananyina baletwalilila ukushipikisha. Ku ca kumwenako, natulande pali bamunyinefwe aba ku South Korea. Ukutula mu 1950, bamunyinefwe abacaice balibakaka pa mulandu wa kukanaitumpa mu fikansa fya calo pantu Bena Kristu. Bamunyinefwe abengi balishipikisha kabili tabanenuka. Ifyo bashipikisha filakosha icitetekelo cesu!

Mu Eritrea, bamunyinefwe batatu balibakaka ukucila pa myaka 20. Bambi balibakaka pa nshita inono. Pali aba paba abanakashi pamo na bana babo. Kwaliba ukwesha sana ukuti bengabafumya, lelo na nomba bacili mu cifungo. Aba bamunyinefwe tabanenuka, balitwalilila fye aba cishinka nangu ca kuti balabacusha sana. Lyonse tulapepelako aba bamunyinefwe aba cishinka.—Rom. 1:8, 9.

Ca cine ukuti mwe bengi tabamukakapo pa mulandu ne fyo mwasuminamo. Na lyo line, mulakwata amafya pa mulandu wa bukote, amalwele ayashipola, ukumucusha ku bena mwenu na balupwa abashipepa, e lyo na mafya yambi aya kuti ni mwe fye mweka mwayeshiba. Nangu ca kuti mwalikwata aya amafya yonse, mwalitwalilila ukubombela Yehova ne cishinka! (Yako. 1:12) Ala tulamutasha. Ifi mutwalilila ne citetekelo na fyo filalenga twalatootela Yehova.

Imilimo yenu iya citetekelo, ukutemwa kwenu, no kushipikisha kwenu e filenga ukuti ‘tuletootela Yehova pantu musuma.’ (Amalu. 106:1) Ala, twalimutemwa nga nshi, tulapepa ukuti Yehova alemukosha, alemwikasha, kabili alemupaala pa kuti mulemubombela inshiku shonse.

Ni fwe bamunyinenwe,

Ibumba Litungulula Ilya Nte sha kwa Yehovaa