Lipoti ya Mulimo wa mwi Bala

Ifisuma ifyacitike uno mwaka: Umweshi wa May wali mweshi umwacitike ifintu ifisuma nga nshi ku Nte sha kwa Yehova mu Zambia. Muli uyu mweshi kwali ukupeela Amaofeshi ya Bakapilibula ayo bakuulile ku Kabompo, mu citungu ca northwestern. Pali aya maofeshi e po bamunyinefwe abapilibula impapulo mu ciLuvale babombela no kwikala. Bamunyinefwe balibombeshe pa myaka itatu no kucilapo ukushila amapulani e lyo no kukuula aya maofeshi. Bamunyinefwe abengi aba muno calo e lyo na bambi 30 ukufuma mu fyalo fyalekanalekana 5 e bakuulile aya maofeshi pa myeshi ukucila pali 15.

Natutemwa ukumwishibisha ukuti muli uyu wine mweshi, Baibolo ya Amalembo ya Calo Cipya yalifumine mu ciLuvale. Ukwabula no kutwishika bamunyinefwe aba Luvale nabatemwa sana ukukwata Baibolo iyakwata ishina lya kwa Lesa, iyapilibulwa bwino, iyayanguka ukumfwa, kabili iyayanguka ukubomfya mu mulimo wa kushimikila. E ico ifwe bonse natutwalilile ukulabombela pamo ukulenga “abantu na bantu ne ndimi” ukwishiba Yehova no Bufumu bwakwe.—Ukus. 7:9; Mat. 24:14.