Ifingatwafwa Ukulashimikila Bwino—Ukusambilisha Abasambi Ifya Kukwata Isambililo lya pa Lwabo

Ico Cacindamina: Pa kuti abasambi bengalunduluka mu fya kwa Lesa, bafwile ukulasambilila na fimbi ifyaba mu Cebo ca kwa Lesa. (Heb. 5:12–6:1) Pa kuti bengeshibilapo na fimbi, bafwile ukubombesha. Pa kuti beshibe ifyo balesambilila, bafwile ukulalinganya ifyo balesambilila ku fintu baishiba kale no kwishiba ifyo bengalafibomfya. (Amapi. 2:1-6) Abasambi nga baishiba ifya kufwaya ifyebo kuti calenga balaifwaila abene ifyasuko muli Baibolo ukubomfya impapulo shesu. Nga balebelenga sana no kulakonka ifyo balesambilila, kuti cabafwa ukushipikisha amesho ku ntanshi.—Luka 6:47, 48.

Ifyo Mwingacita:

Komaileni pa bucindami bwa kupepa ukuti Yehova abafwe ilyo bashilatendeka ukusambilila.—Yoh. 14:26; 1 Kor. 2:10.
Ilyo mwatendeka isambililo no musambi, mukoselesheni ukulapekanishisha libeela isambililo. Mulangeni icitabo cenu ico mubomfya pa kusambilila, kabili musambilisheni ifya kupekanya no kushila elyo ne fya kwishiba ifishinka ifikalamba.
Sambilisheni umusambi ifya kwasuka mu mashiwi yakwe. Mwilaleka isambililo lileba ilya fipusho ne fyasuko fye, umo umusambi alebelenga fye ifyasuko ifili mu citabo.
Muleyafwa abasambi ukulabelengako Icebo ca kwa Lesa cila bushiku. Mulangeni pa Webu saiti ya jw.org apaba umutande uo engalakonkamo pa kubelenga Baibolo nelyo Ulupungu lwa kwa Kalinda ulwa August 1, 2009, pe bula 15, apo balangilila inshila isuma iya kukonka pa kubelenga Baibolo. Mwafweni alemona ukuti ukubelenga Baibolo cila bushiku kwalicindama, lelo pa kuti alebelenga cila bushiku afwile ukulaibikilishako.—Amalu. 1:2, 3.
Sambilisheni umusambi ukubomfya Watchtower LAIBRARE IYA PA INTANETI nelyo Icitabo ca Kwafwa Inte sha kwa Yehova Ukusanga Ifyebo pa kusanga ifyasuko mu Baibolo ku mepusho ayo abantu bepusha. Mwafweni ukwishiba ifishibilo fya mpapulo isho tubomfya sana nga tuli mu kulongana.

Esheni Ukucita ifi uno Mweshi:

Pa mpela ya kamutwe akanono nelyo icipandwa, ebeni umusambi ukulandapo ifishinka ifinono pa fyo asambilila. Nga ca kuti tamwakwata umusambi, esheni ukulanda ilyashi limo ilyalembwa mu Baibolo nelyo ifyebo ifili mu paragrafu imo mu Ulupungu lwa kwa Kalinda mu mashiwi fye ayanono pa kuti muleisambilisha ukumfwikisha ifishinka.