IFYO FWE BENA KRISTU TULINGILE UKULAIKALA
Ifyo Mwingacita pa Kulaisambilisha Sana Icebo ca kwa Lesa
Bushe kuti mwafwaya ukuba aba cishinka nga Daniele ilyo mwaeshiwa? Daniele aleisambilisha sana Icebo ca kwa Lesa. (Dan. 9:2) Ukusambilila sana Icebo ca kwa Lesa kuti kwamwafwa ukutwalilila aba cishinka. Mu nshila nshi? Kuti kwamwafwa ukukosha icitetekelo cenu mu fyo Yehova atulaya ukuti fikafikilishiwa. (Yosh. 23:14) Kabili kukamwafwa ukutemwa sana Lesa, ne ci cikalenga mukalefwaisha ukucita ifisuma. (Amalu. 97:10) Nomba finshi mufwile ukucita? Natulande pali fimo ifyo mwingacita.
Finshi mfwile ukuisambilisha? Mu kuisambilisha Icebo ca kwa Lesa mwaba na ukupekanya ukulongana kwa pa cilonganino. Mukalanonkelamo sana mu kubelenga Baibolo ukwa cila mulungu nga ca kuti mulefwailikisha pa fishinka ifyo mushumfwikishe. Na kabili, bamo basalapo ukusambilila sana pa masesemo ya mu Baibolo, pa fisabo fya mupashi wa kwa Lesa, pa fyo umutumwa Paulo alebomba umulimo wa bumishonari nelyo pa fintu tumona ifyo Yehova abumba. Nga mwatontonkanya pa cipusho ico mwingafwaya ukwishiba ifyo Baibolo ilandapo, kuti mwacilemba kabili e co mwingaisambilishapo umuku ukakonkapo ilyo mukalaisambilisha Baibolo.
Ni kwisa ningasanga ifyebo? Tambeni vidio iitila Ifya Kumwafwa Ukusanga Icuma Caba mu Cebo ca kwa Lesa pa kwishiba ifyo mwingacita. Pa kuti mumone nga namwishiba ifya kusanga ifyebo, esheni ukufwaya ifyalo fyakwatisha amaka ifyo ifiswango ifyaba mwi buuku lya kwa Daniele icipandwa 7 fimininako.
Ni nshita nshi ningile ukupoosapo pa kuisambilisha? Pa kuti mube abakalamba mu fya kwa Lesa, mufwile ukulaisambilisha lyonse. Pa kubalilapo, kuti muleisambilisha fye pa nshita iinono, lyena kuti mwaya mulelundako inshita ya kuisambilisha panono panono. Ukuisambilisha Icebo ca kwa Lesa kwaba kwati kwimba icuma icashikama; ilyo mwaishibako fimo, mukalafwaya ukwishibilapo na fimbi! (Amapi. 2:3-6) Nga mulecita ifi, mukalafwaisha ukuisambilisha Icebo ca kwa Lesa lyonse.—1 Pet. 2:2.
BUSHE IFISWANGO IFYABA MULI DANIELE ICIPANDWA 7 FIMININAKO FINSHI?
ICIPUSHO MWINGAYIPUSHA:
Bushe Daniele 7:8, 24 yafikilishiwe shani?
IFYO NKAISAMBILISHA UMUKU UKONKELEPO:
Bushe ifiswango ifyaba mu Ukusokolola icipandwa 13 fimininako finshi?