Ukwipusha Ifipusho Ifingalenga Mwaishiba Ifyo Umuntu Aletontonkanya

ICO CACINDAMINA: Nga ca kuti “amano ayaba mu mutima wa muntu yaba nga menshi mu cishima icitali,” ninshi ifipusho fyaba kwati ni mbeketi iya kutapilamo ayo amenshi. (Amapi. 20:5) Ifipusho filalenga uo mulelanshanya nankwe ukulalandapo. Ifyasuko ku fipusho ifisuma kuti fyalenga kasambilisha ukwishibako fimo pa muntu alesambilisha. Yesu aleipusha bwino ifipusho. Bushe kuti twamupashanya shani?

IFYO MWINGACITA:

• Muleipusha ifipusho ifingalenga umuntu alanda ifyo aletontonkanya. Yesu alipwishe abasambi ifipusho ifingi pa kuti eshibe ifyo baletontonkanya. (Mat. 16:13-16; be ibu. 238 amapara. 3-5) Fipusho nshi twingepusha ifingalenga uo tuleipusha alanda ifyo aletontonkanya?

• Muleipusha ifipusho ifingalenga uo muleipusha aishiba icishinka. Pa kwafwa Petro ukwishiba icishinka, Yesu alipwishe ifipusho ifyalengele Petro ukutontonkanya kabili fyalimwafwile no kwishiba icishinka. (Mat. 17:24-26) Fipusho nshi twingepusha ifingalenga uo tuleipusha ukwishiba icishinka?

• Muletasha uo mulelanshanya nankwe. Ilyo kalemba ‘ayaswike na mano,’ Yesu alimutashishe. (Marko 12:34) Kuti twatasha shani umuntu uwayasuka bwino icipusho?

TAMBENI ULUBALI LWA KUBALILAPO ULWA VIDIO ITILA MULEBOMBA UMULIMO UO YESU ABOMBELEKO—MULESAMBILISHA, LYENA ASUKENI IFI FIPUSHO:

• Bushe cinshi uku kusambilisha kushacibela bwino nangu ca kuti ifyebo fyaciba fya cine?

• Cinshi tushifwile ukulalondolwela fye ifyebo ilyo tulesambilisha?

TAMBENI ULUBALI LWA BUBILI ULWA VIDIO ITILA MULEBOMBA UMULIMO UO YESU ABOMBELEKO—MULESAMBILISHA, LYENA ASUKENI IFI FIPUSHO:

• Bushe kasabankanya acilaipusha shani ifipusho ifyacilenga uo acilasambilisha ukulanda ifyo aletontonkanya?

• Finshi mwacitemwa muli vidio ifyo mwingatemwa ukubomfyako ilyo mulebila imbila nsuma?