Ukuba ne Mibele Isuma na Katiina Kuti Kwalenga Abena Mwenu Basambilila Icine

Nga ca kuti umwanakashi asambilila icine ninshi alyupwa kale, imibele yakwe iisuma kuti yalenga umwina mwakwe nao asambilila icine. Na lyo line, kuti atwalilila ukuba na mafya ayo engashipikishako pa myaka iingi. (1 Pet. 2:21-23; 3:1, 2) Nga ca kuti balamucusha ku bena mwenu, twalilileni ukucimfya ububi pa kucita icisuma. (Rom. 12:21) Imibele yenu iisuma kuti yalenga abalume benu basambilila icine ukucila na pa fyo amashiwi mwingabeba yengabafwa.

Finshi fimbi ifyo mulingile ukucita? Mulemona ifintu nge fyo abena mwenu bafimona. (Fil. 2:3, 4) Muleba ne cikuuku kabili mulebalangulukilako ilyo mulebomba imilimo iyo abakashi balingile ukubomba. Mulekutikisha ilyo balelanda. (Yako. 1:19) Muleba abatekanya kabili mulebalanga ukuti mwalibatemwa. Mwilatwishika ukuti Yehova alatasha pa fyo mwaba ne cishinka nangu ca kuti abena mwenu tababa ne cikuuku kabili tabamucindika nga fintu imwe mucita kuli bena.—1 Pet. 2:19, 20.

TAMBENI VIDIO ITILA YEHOVA ALATUKOSHA PA KUTI TUSHIPIKISHE AMAFYA, LYENA ASUKENI AYA MEPUSHO:

• Bushe ifintu fyali shani ilyo ba Grace Li baupilwe fye?

• Cinshi calengele batendeke ukusambilila Baibolo?

• Finshi nkashi Li acitile pa kuti ashipikishe amafya alekwata pa numa ya kubatishiwa?

• Finshi nkashi Li alandile pa bena mwakwe ilyo alepepa?

• Mapaalo nshi nkashi Li aipakisha pa mulandu wa kuba ne mibele iisuma e lyo na katiina?