Mulecetekela Ukuti Mukacingililwa Ilyo Cino Calo Cikonaulwa

Yehova takatwalilile ukutekanya, kanshi nomba line ali no konaula cino calo. Nomba line ukupepa kwa bufi kwalaonaulwa, inko ishaumana akapi shikemina abantu ba kwa Lesa, na Yehova akonaula ababipa pa Armagedone. Abena Kristu balafwaisha ukuti ifi fintu ifyacindama fikacitike.

Kwena tatwaishiba fyonse ifikacitika mu bucushi bukalamba. Ku ca kumwenako, tatwaishiba bwino bwino ilyo bukatendeka. Tatwaishiba ifyo amabuteko yakalalanda pa kulenga cikamoneke ukuti cili fye bwino ukusansa imipepele. Tatwaishiba ubutali bwa nshita iikapitapo ukutula apo inko shikatendekela ukusansa abantu ba kwa Lesa nelyo ifyo shikalacita pa kubasansa. Na kabili tatwaishiba bwino ifyo Yehova akabomfya pa konaula ababipa pa Armagedone.

Na lyo line, Amalembo yalitweba fyonse ifyo tulingile ukwishiba pa kuti tukashipe pa kuti twikaba no mwenso pa fikacitika ku ntanshi. Ku ca kumwenako, twalishiba ukuti tuleikala ku mpela ya “nshiku sha kulekelesha.” (2 Tim. 3:1) Twalishiba ukuti inshiku bakasansa imipepele ‘ikepifiwa’ pa kuti ukupepa kwa cine kwi konaulwa. (Mat. 24:22) Twalishiba no kuti Yehova akapususha abantu bakwe. (2 Pet. 2:9) Na kabili twalishiba ukuti uo Yehova asala ukonaula ababifi no kupususha ibumba likalamba pa Armagedone wa mulinganya kabili wa maka.—Ukus. 19:11, 15, 16.

Ifikacitika ku ntanshi fikalenga abantu ‘bakalefwa umutombo pa mulandu wa mwenso.’ Lelo nga tulebelenga no kutontonkanya sana pa fyo Yehova alepususha abantu bakwe ku numa na pa fyo atweba ukuti e fyo akacita, ‘tukeminine no kwinuna imitwe yesu,’ pantu ninshi ukulubuka kwesu nakupalama.—Luka 21:26, 28.