Bushe Kuti Mwa-asuka ici Cipusho?

Mulandu nshi cawamine ifi Yehova asuminishe abena Israele ukutuula ifipeele nangu inkunda?

MU MAFUNDE ayo Yehova apeele abena Israele, alibasuminishe ukutuula ifipeele ne nkunda. Amafunde ayalelanda pa kutuula amalambo yalisuminishe umuntu nga takwete inkunda ukutuula icipeele. (Lebi 1:14; 12:8; 14:30) Mulandu nshi ukucitila ifi kwawamine? Umulandu umo wa kuti limo ifipeele tafyalesangwa. Cinshi calelenga ukuti filasangwa?

Mu lusuba, ifipeele fyalesangwa mu Israele monse. Lelo cila mwaka mu October mu Israele mulatendeka ukutalala, e ico ifipeele filakuukila ku fyalo fyabela ku kapinda ka ku kulyo aka Israele pantu kwena ninshi nakukaba, kabili fitendeka ukubwelela mu Israele nga kwakaba. (Ulwimbo 2:11, 12; Yer. 8:7) Mu nshita balelemba Baibolo, caleafya ku bena Israele ukutuula ifipeele mu nshita ya mpepo pantu ninshi fyalikuuka.

Nomba apo ilingi inkunda tashikuuka, shalesangwa mu Israele umwaka fye onse. E lyo kabili abantu baleteeka inkunda. (Linganyeniko Yohane 2:14, 16.) Icitabo ca Bible Plants and Animals, citila: “Mu Palestine abantu bonse, aba mu mishi na mu matauni baleteka inkunda. Pa ng’anda yonse paleba icitele ca nkunda nelyo icipunda ico balepanga mu cibumba umwaleikala inkunda.”—Linganyeniko Esaya 60:8.

Ifi Yehova asuminishe abena Israele ukutuula ifyuni ifyo bengakwata calelanga fye ukuti aliba no kutemwa kabili tapampamina fye pa cintu cimo.