Bushe Kuti Mwa-asuka Ici Cipusho?
Finshi bashimapepo pe tempele mu Yerusalemu balecita no mulopa wa nama isho baletuula pa ciipailo?
CILA mwaka bashimapepo mu Israele baletuula inama ishingi sana pa ciipailo icali pe tempele. Kalemba wa lyashi lya kale umuYuda Josephus, alembele ukuti pa bushiku bwa Cakucilila, impaanga isho bashimapepo baletuula shalecila pali 250,000. Ici calelenga apo baleipaila impaanga paleba umulopa uwingi nga nshi. (Lebi 1:10, 11; Impe. 28:16, 19) Bushe umulopa onse uyu baleutwala kwi?
Abashula ifya mu mushili balisanga umufoolo uo baimbile pe tempele lya kwa Herode ilyo abaYuda balepepelapo ukufika mu mwaka wa 70 ninshi Yesu alibwelelamo ku muulu. Muli uyu mufoolo mufwile e mwalepita umulopa ukufuma pe tempele.
Natulandeko pa fintu fibili ifyalelenga pa ciipailo pelaba umulopa:
Pe samba lya ciipailo pali ifilindi: Mu citabo ca kale umo balemba amafunde ne ntambi sha baYuda ico balembele pa numa ya mwaka wa 200 ninshi Yesu alibwelelamo ku muulu, balilondola ifyo bacitile pa kuti umulopa na menshi filefuma pa ciipailo. Ici citabo citila, pa kona imo iya ciipailo pali ifilindi fibili. Umulopa uwalefuma pa ciipailo na menshi ayo balebomfya pa kusamfya iciipailo, fyalepongolokela muli ifi filindi, kabili fyaleya ku Mupokapoka wa Kidrone.
Na bashula ifya mu mushili muno nshiku balisumina ukuti kale baleimba ifilindi pe samba lya ciipailo umwalepongolokela umulopa. Icitabo citila The Cambridge History of Judaism calilanda pa filindi ne mifoolo ifyali mupepi ne tempele. Citila: “Muli ifi ifilindi ne mifoolo nalimo e mwalepita amenshi ya mulopa ayalefuma pe Tempele.”
Amenshi ayengi: Bashimapepo balingile ukulakwata amenshi ayengi aya kusamfisha panshi ya ciipailo na ya kulenga umulopa ulepita mu mufoolo. Amenshi ayo bashimapepo balebomfya yalefuma mu musumba. Aya amenshi yalepita mu mifoolo ukufuma mu fishima na mu fishiba ifyali mu musumba. Joseph Patrich uushula ifya mu mushili atile pali ilya nshita, takwali itempele limbi ilyakwete inshila iisuma iya kukwatilamo amenshi pe tempele, ne ya kufumishamo amenshi ya fiko pe tempele nge fi itempele lya kwa Herode lyakwete.