Bushe Ukufwaya Ukupusuka e Kulenga Inte sha kwa Yehova Ukushimikila Abantu mu Mayanda Yabo?

Awe, iyo. Ilingi line tulashimikila mu mayanda ya bantu, lelo ukufwaya ukupusuka te kulenga ukuti tuleshimikila. (Abena Efese 2:8) Mulandu nshi twalandila ifi?

Natulangilile: Elenganyeni ukuti umuntu uwa cikuuku alaya abantu ukuti nga baisa pa cifulo cimo pa bushiku abeba akabapeela ica bupe ca mutengo. Nga namucetekela ifyo uyu muntu alandile, bushe te kuti mukonke ifyo amwebele? Ukwabula no kutwishika, kuti mwafikonka! Nalimo kuti mwaebako na balupwa ne fibusa pa kuti na bo bengapokako ica bupe. Icikalamba icingalenga mwapoka ica bupe te kukonka ifyo alandile, lelo ni co uwamulaile alefwaya ukumupeela.

Inte sha kwa Yehova, nasho shalicetekela ifyo Lesa alaya ukuti akapeela abamumfwila umweo wa muyayaya. (Abena Roma 6:23) Tulabikako amano ukwebako bambi ifyo twasuminamo pantu twalicetekela ukuti nabo, nalimo kuti batemwa ukwisakwata umweo wa muyayaya uo Lesa atulaya. Lelo, tatwasumina ukuti ukushimikila e kukalenga tukakwate umweo wa muyayaya. (Abena Roma 1:17; 3:28) Takuli ico umuntu engacita ico twingatila e cingalenga Lesa amupeele umweo wa muyayaya. Baibolo itila: “Atupuswishe, te pa mulandu wa milimo iisuma iyo twacitile nakalya, lelo ni ku luse lwakwe fye e ko atupusushishe.”—Tito 3:5.