Shimapepo Alisangile Amasuko

Bushiku bumo ilyo ba Eliso, Inte ya kwa Yehova, balesambilisha umwanakashi Baibolo mu ng’anda mu mwakwe, kwalishile abantu babili abo uyu umwanakashi ashale-enekela. Abaishile ni shimapepo no mwina mwakwe. Ba Eliso balyumfwile ukuti tapakokwele ukufuma apo umwana umwaume uo uyu shimapepo no mwina mwakwe bakwete fye afwilile.

Ilyo ba Eliso balandile ukuti balyumfwile sana ububi pa fyacitike, shimapepo no mwina mwakwe balitendeke ukulila. Lyena shimapepo alandile ninshi nakalipa ati: “Nshishibe ico Lesa asuminishishe ica musango uyu ukutucitikila! Cinshi asendele umwana wandi umwaume uo nakwete fye? Nalibombela Lesa pa myaka 28 kabili ndacita ifintu ifisuma ifingi, nomba bushe ifi e fyo Lesa engacita pa kunambula? Cinshi Lesa aipaile umwana wandi?”

Ba Eliso balilondolwelele shimapepo no mwina mwakwe ukuti Lesa te waipeye umwana wabo. Lyena balibebeleko na pa fintu pamo nga icilubula, isubilo lya kuti abafwa bakabuuka, e lyo ne co Lesa asuminishisha ifyabipa ukulacitika. Shimapepo no mwina mwakwe baebele ba Eliso ukuti ifyo balondolwele fyalengele basanga amasuko ku mepusho balepepelapo.

Umulungu wakonkelepo, shimapepo no mwina mwakwe balisangilweko ilyo ba Eliso balesambilisha ulya umwanakashi Baibolo. Ba Eliso balesambilisha ulya umwanakashi mu cipandwa citila “Isubilo Line Line ku Batemwikwa Benu Abafwa,” mu citabo citila Bushe Cinshi Baibolo Isambilisha? Shimapepo no mwina mwakwe balelandapo sana ilyo balesambilila.

Lyena pa numa shimapepo no mwina mwakwe balisangilwe ku kulongana kwa citungu ukwaibela ukwa Nte sha kwa Yehova ukwabelele mu Tbilisi, mu Georgia. Kabili balitemenwe sana ilyo bamwene ifyo aba bwananyina batemwana ne fyo baikatana. Pantu iyi imibele e yo shimapepo no mwina mwakwe bale-esha ukusambilisha aba mwi calici balepepako, lelo aba muli ili icalici tabasambilile ukuba ne yi imibele.