Abantu Abaasambilishiwa Ukutemwa
UKUTEMWA kwaba mibele yashimpwa pa kucincimushiwa, ukwangwa bambi, nelyo ukutemwa ifyapalana. Ukutemwa kwaba kuikuminisha kwa cikabilila. Te bukaitemwe, kwa bucishinka, kabili kulangwako ukuti ciwamine bambi. Ukutemwa e bupusano bwine bwine ubwa lupato. Umuntu uukuntwa no lupato atontonkanya fye ifyakwe umwine; uukuntwa no kutemwa atontonkanya pa lwa bambi.
Ukutemwa nelyo ulupato—ni cili kwi citungulula ubumi bwenu? Ici tacili cipusho cabulamo bupilibulo pantu inshita yenu iya ku ntanshi iya muyayaya yashintilila pa kwasuka cene. Ilintu bacili baleikala mu calo icilesambilishiwa ulupato, amamilioni ya bantu balesambilila ukutemwa. Balecite ci ukupitila mu kufwalo buntu bupya. Tabalelanda fye pa kutemwa; balebombesha na maka ukuba aba kutemwa.
Nga ca kuti mwalisangwako ku kulongana kwa Nte sha kwa Yehova, napamo mwalitemenwe cintu mwamwene. Te mulandu ne mishobo yalekanalekana, Inte sha kwa Yehova shalikatana mu kupepa. Baba aba bwananyina ba mwi sonde lyonse aba cine cine. Ici kuti camonwa mu filonganino fyabo na pa mabungano yabo lelo ukucilisha umo beta ati indupwa sha Bethel. Aya yali mabumba ya Nte ababa bakabomba ba kuitemenwa abekala no kubombela pamo, ngo lupwa, ukupulinta no kwananya impapulo sha Baibolo. Mu calo cimo cimo, bamo balangalila umulimo ubomba Inte sha kwa Yehova. Uyu tauli mulimo uunono, apantu ubimbilemo ifilonganino ukucila pali 82,000 mu fyalo 233 ukulingana na lipoti wa 1997. Pa kuti ifi fyonse ifilonganino fisakamanwe, abantu ukucila pali 16,000 babombela mu ndupwa sha Bethel ukushinguluke calo, na pa maofesi yakalamba aya calo conse na maofesi yanono ayalekanalekana mu fyalo 103.
Indupwa sha Bethel ishingi shafulamo abekashi ba mu calo umwabela iofesi line ilyo ilya Sosaite. Lelo te beka fye. Indupwa sha Bethel shimo shapangwa ne Nte ukufuma ku fyalo fyalekanalekana, inko, nelyo imishobo kabili abo kale balepepa ukwalekanalekana. Ku ca kumwenako, ababa mu lupwa lwa Bethel ulwa bantu mupepi na 1,200 ku Selters, Germany, bafuma ku fyalo mupepi na 30. Cinshi cibalenga ukwikala, ukubomba, no kupepela pamo mu mutende na mu kwikatana, mu mibele yabulamo ulupato? Bakonka ukufunda kwa mu Baibolo pa Abena Kolose 3:14, apatila:
“Fwalilenipo no Kutemwa”
Takuba uufyalwa nafwala ifya kufwala bwino bwino, kabili umuntu tafwala ifya kufwala ukupitila fye mu kulandapo. Ukuifwika kusanshamo ukupingulapo mu kulungatika e lyo ukuibikilishako ukucite fyo upingwile. Mu kupalako, takuba uufyalwa ninshi nafwala ukutemwa. Ukulandapo fye na ko takwaafwa kantu. Ukubombesha kulakabilwa.
Ifya kufwala fyabelako imifwaile yafulilako. Filacingilila umubili, ukufisa ifilundwa fya mubili ifya nsoni nelyo ifishimoneka bwino, kabili limo limo filalangisha fye no buntu. E fyaba no kutemwa. Kulacingilila pantu ukutemwa ifishinte fyalungama ne fibusa fyalinga kulenga umuntu ukusengauka ifibusa nelyo ififulo umwingafuma ubusanso. Kulacingilila ukwampana kwa bantunse, ico bonse tufwile twatemwisha. Uwaba no kutemwa cilangukapo ukumutemwa, no uushifwaya ukukalifya bambi cilangukapo ukukanamukalifya.
Kabili ukutemwa kulafimba pa mbali sha buntu bwesu ishishimoneka bwino, ishingapunwisha abantunse banensu. Bushe tatukongamina ku kusuula ukupelebela kunono ukwa bantu ababa no kutemwa ukucila abantu aba cilumba, abomankonso, abaitemwa, kabili abashaba na kutemwa?
Abantu abafwala ukutemwa balangisha imibele yayemba iya buntu bwapala ubwa kwa Kristu. Ilintu ukuyemba kwa ku mubili kuba fye pa nkanda epela, ukuyemba kwa ku mupashi kulandatila ubuntu fye bonse. Napamo mwalishibapo abantu mumona ukuti basuma, te pa mulandu wa kuyemba kwa ku mubili, lelo pa mulandu wa buntu bwa cikabilila cine cine. Lubali lumbi, fwe bengi twalimonapo abanakashi nelyo abaume bayemba abo ukuyemba kwabo kwapwile mu kwangufyanya fye lintu ubuntu bwabo ubwa cine cine bwamonekele. Fintu caba icisuma ukuba pa bantu abafwala ukutemwa!
Ukupyanishapo Ukutemwa pa Lupato
Icishinka ca kuti ulupato kuti lwapyanikwapo no kutemwa kuti calangililwa ku kufwailisha kwaliko mu 1994 pa Nte sha kwa Yehova 145,958 mu Germany.
Ukunwesha, ukubomfya imiti ikola, bumpula mafunde, ifyangalo fya cela mushuke, no butukami nelyo ulukaakala fyonse, mu nshila shalekanalekana, fyaba misango ya bukaitemwe, umufuma ulupato. Lelo amaperesenti 38.7 aya baipushiwe batile pa kuti bafike pa fipimo fya Baibolo ifyasumbuka ifisambilisha Inte, balicimfya ubwafya bumo pali aya nelyo ukucilapo. Ukutemwa Lesa ne fipimo fyakwe ifyalungama ifya myendele e kwabalengele ukucite co. Inte sha kwa Yehova shalibafwilishe mu kutemwa, ilingi line baleafwiwa ukupitila mu kusambilila na umo. Mu myaka yapitapo isano (1992-1996), abantu 1,616,894 mu fyalo 233 balyafwiwe ukwaluka ukucimfya ulupato ukupitila mu kuba no kutemwa ukushifilwa.
Ukupitila mu kuba no kutemwa kwabula bukaitemwe mu fyupo fyabo, Inte sha kwa Yehova balakosha ifyupo. Mu fyalo fimo pa fyupo ifili fyonse fibili nelyo fitatu cimo cifwile ukupwa. Lelo ukufwailisha kulumbwilwe kale ukwa ku Germany kwalangilile ukuti pali nomba maperesenti fye 4.9 aya Nte e baalekana nelyo ukupaatukana na bena myabo. Nangu cibe fyo, twilaba ukuti impendwa ikalamba pali aba balekene ilyo bashilaba Inte sha kwa Yehova.
Apantu Lesa wa kutemwa ni Kasambilisha Wakulisha uusambilisha abamutemwa inshila shakwe, Inte sha kwa Yehova, babalilapo, ukutemwa wene. Ukupusanako na bantu bambi, “abatemwo kwangala ukucisho kutemwa Lesa,” Inte sha kwa Yehova batangishako Lesa. (2 Timote 3:4) Mu kupusanako ne nshila sha ici calo cabule fishinte, Nte umo na umo uwa mu Germany apoosa amaawala 17.5 cila mulungu mu fya mapepo. Ukwabulo kutwishika Inte shangwa ifya ku mupashi. E cibalenga ukuba aba nsansa. Yesu atile: “Ba nsansa abaibukila ulwa kukabila kwabo ukwa ku mupashi, apantu ubufumu bwa mu myulu bwabo.”—Mateo 5:3, NW.
Kalemba we Ilumbo 118 atila, umubomfi wa cine uwa kwa Lesa takabila ukutiina abantunse. “Yehova aba na ine; nshakatiine. Umuntu kuti ancita nshi?” (Icikomo 6) Ukutetekela Lesa umupwilapo kulafumya mu muntu ifilenga ukupata no kutiina abantunse bambi.
Umwina Kristu, pa kwishibo kuti Lesa ‘alakokolo kukalipa, kabili afulo luse ne cishinka,’ akabombesha ku kufumya icipyu mu bumi bwakwe, pantu ni cimo ica filetako ulupato. Ukulundulula ifisabo fya mupashi wa kwa Lesa, ukusanshako ukunakilila no kuteko mutima, kukamwaafwa ukucite ci.—Ilumbo 86:15; Abena Galatia 5:22, 23.
Umwina Kristu wa cine aliicefya kabili taitontonkanishisho kucila ifyo afwile ukutontonkanya. (Abena Roma 12:3) Alalundulula ukutemwa ilyo alebomba na bambi. Mu kupusanako no lupato, ukutemwa “takufiishiwa ku mutima, takulinga cabipa.”—1 Abena Korinti 13:5.
Ee, umwenso, icipyu, nelyo ukukalifiwa kuti fyalenga abantu ukuba no lupato. Lelo ukutemwa, kulacimfya ulupato ukupitila mu kufumyapo ishinte lya lupato. Mu cine cine, ukutemwa e maka yatuninkisha ayacisha fyonse mu kubumbwa konse pantu “Lesa kutemwa.”—1 Yohane 4:8.
Bwangu Bwangu Ulupato Luli no Kufumishiwapo Kuli Pe na Pe
Apantu Yehova tali Lesa wa bukaitemwe no lupato, iyi mibele te kuti itwalilile ukubako. Nangu cibe shani, ifwile ukufumishiwapo no kupyanikwapo no kutemwa, ukukatwalilila umuyayaya. Nga mulafuluka icalo umwabula ulupato, kabili umwaisula ukutemwa, lekeni Inte sha kwa Yehova shimulondolwele muli Baibolo ififwaikwa pa kuti mukeseikalamo.
Ee, kuti cawama ifwe umo umo ukuipusho kuti, ‘Mibele nshi nangisha sana mu bumi bwandi, ukutemwa nelyo ulupato?’ Ici tacili cipusho cabulamo ubupilibulo. Umuntu uukonka icibambe ca kwa Lesa, lesa wa lupato, takatwalilile ukubako. Umuntu uukonka Yehova, Lesa wa kutemwa, akatwalilila kuli pe na pe!—1 Yohane 2:15-17.
[Icikope pe bula 10]
Nangu fye ni pali lelo abantu kuti bafwala ukutemwa