“Ifwe Twalileka, Na Imwe Kuti Mwaleka!”

KU ULEMBA LOLENI! MU JAPAN

Bamo bashimika ukuti ku kupwa kwa ba 1500, lintu ingalaba sha bena Bulaya umwali abalepeepa shafikile, abena Japan balisungwike ilyo bamwene abalendo balefutumuna icushi kwati “bakoseshe umulilo mu tufumo.” Ukusunguka kwabalengele ukufwaisha ukwishiba, kanshi pa kufika muli ba 1880, ninshi kale kale abena Japan abengi balitendeka ukupeepa. Ni nani aelengenye ukuti abana ba balya bena Japan abalesunguka, bakesaba bakapeepa ba fwaka abene bene pano isonde?

AKIYO, Osamu na Yoko batile: “Twalefwaya ukuilanga ukuti natukula, ukuba fintu abakalamba abapeepa baba.”

Tsuya atile: “Nalefwaya ukoondako.”

Toshihiro atile: “Nalefwaisha ukumfwa fintu ukupeepa kwaba.”

Ryohei, Junichi na Yasuhiko, batile: “Tatwaishibe ukuti mu kupeepa mwaliba ubwafya ubuli bonse.”

Chieko atile: “Nalepeepa ku kucefyako umuseluselu uumfwika ulucelo, lintu nali ne fumo lya bubili.”

Tatsuhiko atile: “Mwali e mwa kuleseshe citendwe ilyo twalekumana na babomfi ku ncito.”

Ifi e fyayaswike ibumba lya bena Japan ilyo babepwishe icalengele ukuti batendeke ukupeepa. Te kuti tupape pali ifi bayaswike, pantu bamo batila icalo ca Japan ni paradise wa bakapeepa. Nomba ico mwingapapa ca kutila aba bonse mwabelenga muno balileka ukupeepa. Kuti mwaumfwikisha fintu babombeshe pa kuleka nga mwaishiba fintu ukupeepa kwaseeka ku mwabo. Bushe kuti mwatemwa ukwishiba fintu balekele? Lekeni pa kubala tumone ifyo ukupeepa kwayanana mu Japan pali ndakai.

Fintu Ukupeepa Fwaka Kwaanana

Abaume abena Japan abakalamba nakalimo amaperesenti 56 balapeepa, ukulinganya ku maperesenti 28 fye aya baume abena Amerika abapeepa, aba myaka 15 no kucilapo. Pali bakapeepa 34,000,000 abena Japan, amaperesenti 22 ni banamayo, e lyo abengi bakashana. Ukukonkelesha abakalamba no kumfwila fintu abasabankanya amakwebo balumbanya fwaka, kwalilenga abaice abengi ukutendeka ukupeepa. Ukucila pa myaka 20 iyapitapo, ukusabankanya amakwebo ya fwaka pa televishoni na mu filimba, balileseshe mu Amerika. Na mu Japan nomba balilesha.

Ukulundapo, imishanga yaba fye mbwee mu matuuka ya mu misebo iya mu Japan. Kulila umuntu ashita icipaketi, tali na kumfwila fintu balembapo, ifisosa fye buyefya buyefya ati: “Mulenashako ukupeepa; kulonaula.” Ukulundapo no mulandu wa kuti abena Japan abengi tabaishiba amafya yaba mu kupeepa, ica kumwenako cabipa ica bantu balumbuka calilenga abengi ukutendeka ukupeepa, e calenga abengi ukutumpikwa, ukulamona fye kwati tamwaba ubwafya.

E mulandu wine abasoka pa mafya yaba mu kupeepa babela aba bulanda pa fyo abena Japan balekelesha abekala calo ukutwalilila fye ukulundulula icibelesho ca kupeepa. Ukuba kwena, shino nshiku ababa mu milimo ya kufunda abekala calo, nabeluka ukuti cikankaala nga nshi ukufunda abantu ifyo ukupeepa kwingabalwalika no kubepaisha. Abapeepa ku Japan balwala amalwele yamo yene ayo abapeepa ku fyalo fimbi balwalako, umuseluselu, ukufilwa ukupeema bwino, inkoola, ukukalipwa mu nda, ukulwala icifine libili libili, ukufiita ku mukoshi, na mu kuya kwa nshita, limbi ukufwa bwaice bwaice ku mulandu wa kansa wa ku libu, ukulwala umutima, nelyo amalwele yambi.

Pa April 1, 1985, ubukwebo bwa fwaka bwalifumine mu minwe ya buteko, ifunde lyaliko pa myake iingi lya kutila ubuteko fye e bufwile ukushitisha fwaka lyalifumishiwepo. Nomba kwena ubuteko bucili bulabombako amakwebo ya fwaka, e mulandu wine kushabela na mapange yene yene aya kulesha ukupeepa. E calenga no kuti abasoka pa mafya ya kupeepa mu Japan basondwelele abati Japan pali ndakai e mushi wa bakapeepa. Na kabili e mulandu wine ipepala lya lyashi ilya The Daily Yomiuri lyasosele ukuti badokota ba ku Japan bali no bulanda pa fyo “abena Japan balelundulwilako fye icibelesho ca kupeepa.”

Pa kuti muyumfwile ifyo bamo batunguluka mu kuputuka kuli fwaka, moneni umukululo uleti: “Ifyo Twalekele.”

Kuti Mwaleka Shani?

Abatemenwe ukupeepa kale, nga balya balandilwepo mu mukululo, batwebe fishinka ifya kutupanda amano pa kuleka abati: Mufwile ukwishiba umulandu mulefwaila ukulekela. Ukutemwa Lesa no kufwaya ukumutemuna e mulandu wine wine. Ukutemwa abantu banenu na o mulandu usuma. Mwiesha kubwelelako ilyo mwaleka. Sabankanyeni ku bantu bonse ukuti namuleka, ebeni abanenu bonse, na balupwa pa kuti bamukoseleshe. Landeni fye ati naleka, no kuleka apo pene. Lyene bombesheni lyonse ukusengauka ukuba apalesangwa icushi ca fwaka.

Nga mulesambilila Baibolo, ilingi line muleba pamo ne Nte sha kwa Yehova. Nga muleba na bo lyonse, mukalabako bwangu ku kupeepa. Lubali lumbi, nga muli umo uwa Nte sha kwa Yehova uulesambilila Baibolo na kapeepa, tamufwile ukumusuula. Mwaafweni ukutemwisha Yehova ukucila pali ici cibelesho cishaibipila.

[Akabokoshi ne Fikope pe bula 16, 17]

“Ifyo Twalekele”

Mieko: “Ilyo natendeke ukusambilila Baibolo ne Nte sha kwa Yehova, naishibe ukuti ukupeepa kwena nshakaleke. Apo naiminine pa kusambilila ni pa kutila, te mulandu ne fyo naba, abana bena bakasambilile inshila ya ku mweo. Nomba bwangu bwangu nailwike ukuti umufyashi afwile ukuba e ca kumwenako, kanshi natendeke ukupepa kuli Yehova Lesa ukwabula ukuleka, ukuti anjafwilishe. Nalipoosesheko amano ku kusengauka ukupeepa, nomba pa nshita imo naleumfwa kwati nkafilwa. Lelo nshakatale ndaba fintu natemenwe ilyo kampingu wandi asangulwike lintu nasukile naleka cilya cibelesho cishaibipila.”

Masayuki: “Pa numa ya kuba kapeepa wa fipaketi fitatu cila bushiku no kweshaesha na maka yonse, nalisukile nashimya umushanga wa kupelako no kweba fwaka ati shalapo. Ulupwa lwandi, Inte sha kwa Yehova shinandi na Yehova Lesa e bangafwilishe ukuleka. Bonse abo tubomba na bo ku banki baalemona kwati ndebepa fye. Pa kuti tulelangulukilako abantu, naipwishe abo tubomba na bo ukuti ababombela mu ncende ye banki umwisa abantu abengi belapeepa pa kubomba. Fyalibombele nangu ca kutila amaperesenti 80 aya bantu tubomba na bo balapeepa. Ili funde lyalifika na mu mabanki yesu 260 aya mu ncende shimbi.”

Osamu: “Ilyo nalesambilila icine mu Cebo ca kwa Lesa Baibolo, nalilwike nati mfwile ukuleka ukupeepa. Nalelwisha fye nalimo pa mwaka umo. Ilyo nalekele nalyo line, papitile imyeshi 6 nali ndecula fye no bwafya bwa kufwayo kupeepa. Nalibombeshe mpaka fye nasukile naleka.”

Toshihiro: “Nalyumfwikishe nga nshi icilubula ca kwa Yesu ica kuti natontonkenye nati na ine wine kuti nabombako akamulimo kanono aka kuipusula fye ukupeepa.”

Yasuhiko: “Ukupingulapo ukumfwila Yehova Lesa no kuleka ukupeepa e kwampuswishe. Kasuba kamo, umo nalebombela mwaiswile umwela wambuka bwangu ku mulilo uwapropane uwafumiine apatulike. Nga ni kale, nga wansangile na fwaka ku kanwa, kanshi nga kwalipuulike umulilo. Ninshi papitile fye inshiku sha kupenda apo nalekeele ukupeepa, pano tulelanda nga mwalinshiika kale.”

Akio: “Ilyo natendeke ukumfwa umuseluselu inshita shimo, natungenye nati ni fwaka alengonaula. Nomba nshalekele ukupeepa. Umukashi wandi uwabele umo uwa Nte sha kwa Yehova e wabalilepo ukunondolwela ubonaushi bwa fwaka. Bwangu bwangu natendeke ukusambilila Baibolo, kabili nalisambilile ukufuma mu mpapulo sha Watch Tower Society ukuti umuntu uupeepa alayonaula umwine no lupwa lwakwe. Nalilekele ilyo line fye!”

Ryohei: “Abakashi bandi e balenshitila fwaka, ukunshitila libela ifipaketi 20. Nomba lintu batendeke ukusambilila Baibolo ne Nte sha kwa Yehova, balilekele ukunshitila pantu balishibe ukuti fwaka yalengonaula. Lyene naiswile ituuka lyandi ilya kushitishamo fwaka. Cila bushiku nalepeepa ifipaketi fitatu na hafu. Lyene natendeke ukusambilila Baibolo ne Nte sha kwa Yehova. Ilyo line nalefwaisha ukuba kalanda musuma uwa malyashi ya mu Baibolo. Pa kuti nsuminishiwe ukulanda amalyashi mwi Sukulu lya Butumikishi bwa Teokrasi, nalilekele ukupeepa.”

Junichi: “Umwana wandi umukashana, umo uwa Nte sha kwa Yehova, alyangilweko nga nshi ku bumi bwandi. E wanengele ukulaya ukuti nkaleka ukupeepa, cine cine nalilekele.”

Tsuya: “Umuku wa kubalilapo lintu naile ku Ng’anda ya Bufumu, pa kwingila fye, naipwishe ukuti bampeele machisa no mwa kupoosa imito no tushiki. Nalisungwike nga nshi ilyo banjebele abati takwali nangu umo uupeepa kulya. E po nailukiile ukuti mfwile ukuleka. Ifyo naculile pa nshiku 8 mu cipatala fyanengele ukwiluka ukuti nshifwile kubwelela ku kupeepa, nalilapiile ku fyo naculile pa kuleka.”

Yoko: “Nabelengele pa lwa kupeepa muli bamagazini na mu mpapulo shimbi ishasabankanishiwa ne Nte sha kwa Yehova, e mo nabelengele na pa fyo Yesu akeene ukunwe fikola fintu bamupeele lintu bali mupepi no kumupoopela pa cimuti ca kucushiwilwapo. Nalipepele kuli Yehova Lesa, ukumulondolwela ukuti nalefwaisha ukuba kalumbanya wasanguluka uwe shina lyakwe. Ukufuma fye apo pene, nshatalile mpeepapo. Lintu nalesangwa apali abalepeepa, naleba fye mupepi no kutendeka ukuipakisha icena ca fwaka, nomba nalebutukapo, pantu nshalefwaya icibelesho ukubukuluka.”

Bonse aba abalepeepa kale balipingulapo ukuti tabakatale abapeepa na kabili. Bushe mulapeepa nomba mulefwaya ukuleka?

Mieko

Osamu

Yasuhiko

Akio no mukashi, Sachiko

Junichi no mwana wakwe Meri

Yoko