Ukulingana na Baibolo

Umupashi wa Mushilo uwa kwa Lesa Cinshi?

“Awe, Abantu Bonse Pa Kubatishiwa, Kabili Ilyo Yesu Abatishiwe, No Kupepa Alepepa, Umuulu Waliceneme, No Mupashi Wa Mushilo Waliikilile Pali Wene Mu Mimonekele Ya Nkunda; Ne Shiwi Lyafumine Mu Muulu, Aliti, Ni We Mwana Wandi, Uwatemwikwa; MULI IWE E MO MBEKELWA.”—Luka 3:21, 22.

LINTU alelanda na ba mano ya ku calo ku Greece wa pa kale, umutumwa Paulo aitile Lesa ukuti “Mwine muulu na pano nse.” Paulo atile e uyu wine Lesa “uupeela bonse umweo, no kupema, na fyonse.” (Imilimo 17:24-28) Lesa abomba shani fyonse ifi? Abomfya umupashi wakwe uwa mushilo, nelyo amaka yabomba.

Na kabili Baibolo ilondolola ukuti Lesa “afulisho kukosa na maka ayengi.” (Esaya 40:26) Cine cine, Lesa apangile ububumbo bonse, ubulangilila ukukosa kwakwe na maka.

Amaka Ayabomba

Te kuti ubupilibulo bukumanine ukusoso kuti umupashi wa mushilo maka fye ya kwa Lesa, apantu amaka kuti yaba ayashibomba, nelyo kuti yabapo lelo tayalebomba mu muntu nelyo mu cintu cimo, kwati maka yaba mwi batiri ilishilebomfiwa. Lelo Amalembo yalangilila umupashi wa mushilo nga uulebomba, kwati malaiti yalebomba mwi batiri ililebomfiwa. (Ukutendeka 1:2) E co umupashi wa kwa Lesa maka yabomba aya kwa Lesa.

Baibolo ilanda pa mupashi wa mushilo ngo ulebomba umulimo umo nelyo ngo uli ku cifulo cimbi ukutaluka kuli Lesa. (Mateo 28:19, 20; Luka 3:21, 22; Imilimo 8:39; 13:4; 15:28, 29) Ababelenga aya amalembo ya musango yo kuti batungo kuti umupashi wa mushilo waliibela ukufuma kuli Lesa. Mulandu nshi aya mashiwi yabomfiwa mu Malembo? Bushe umupashi wa mushilo waliibela na o Lesa aliibela?

Lesa wa maka yonse alipusanininako fye sana no bubumbo bwakwe ubo tumona. Lesa mupashi, uo tushingamona. (Yohane 4:24) Baibolo itila Yehova Lesa ekala ku muulu kabili e ko amwena pa bantunse. (Ilumbo 33:13, 14) Cili icaumfwika pantu Kabumba afwile ukucila ifintu apanga. Alafyangalila, ukufibomfya mu kulamuka, ukufipanga, e lyo no kufilama.—Ukutendeka 1:1.

Mu muulu ekala umushimoneka, Lesa kuti alenge fintu ukubako pa nshita iili yonse kabili ukuli konse. E co takabila ukuba ku ncende kuntu amaka yakwe yabomba yalebombela. Kuti atuma umupashi wakwe ukubomba umulimo. (Ilumbo 104:30) Abantu aba muno nshiku ababomfya ifya kwashishako akatalamukila pa kwasha ifibombelo fya mu ng’anda tacingabafya ukumfwikisha ici. Ilelo twalishiba amaka ayashimoneka pamo nga amalaiti nelyo imyengelele iishimoneka. E fyo na Lesa engabomba imilimo iili yonse alefwaya ku maka yakwe aya mushilo, nelyo umupashi ukwabulo ukuya kuli co cifulo.—Esaya 55:11.

Mu nshita sha Baibolo iyi mfundo napamo yalyafishe ukuyumfwikisha. Ukulanda pa mupashi wa mushilo ngo waibela ukufuma kuli Lesa kwalyafwile bakabelenga ukumfwikisha fintu Lesa abomfya amaka yakwe nangu cingati tabako ku cifulo uko umupashi wakwe ulebombela. Baibolo nga yatila umupashi wa mushilo naucita icintu cimo, ninshi calola mu kuti Lesa nabomfya amaka yakwe mu bantu nelyo pa fintu ku kucita ukufwaya kwakwe.

Imibombele ya Mupashi wa Mushilo Iyapusanapusana

Yehova abomfeshe umupashi wa mushilo pa kupanga ifipeema ne fishipeema. (Ilumbo 33:6) Kabili Lesa aubomfeshe ku konawilako abantu aba lukaakala abashilapila ku lyeshi. (Ukutendeka 6:1-22) Ni aya yene maka yabomba Lesa abomfeshe pa kukusha ubumi bwa mutengo ubwa Mwana wakwe ukubuleta mwi fumo lya mwanakashi nacisungu umuYuda, Maria.—Luka 1:35.

Inshita shimo, umupashi walikoseshe abantu ukushimike cine ku balwani mu kushipa kabili ukwabulo mwenso, kabili ilingi baleibika mu kapoosa mweo. (Mika 3:8) Kabili kwalibako inshita ishingi mu Baibolo lintu aya maka yapeele abaume na banakashi ukumfwikisha kwaibela, maka maka ukukuma ku kusesema. Apo takuli umuntunse uwingasobela inshita ya ku ntanshi mu kulungika, iyi mibombele yaibela iya mupashi wa mushilo.—2 Petro 1:20, 21.

Kabili umupashi kuti wapeela abantu amaka ya kucite fipesha mano. Ku ca kumwenako, kuli aya maka, Yesu alelama ifilengwa na Lesa, ukundapa amalwele, no kubuusha fye abafwa. (Luka 4:18-21; 8:22-26, 49-56; 9:11) Umupashi walibombele ku kuteyanya no kukosha Abena Kristu ba mu kubangilila ku kubomba nge Nte sha kwa Lesa ku mpela she sonde lyonse.—Imilimo 1:8; 2:1-47; Abena Roma 15:18, 19; 1 Abena Korinti 12:4-11.

Ifyo Amaka ya kwa Lesa Yabomba Kuli Ifwe

Bushe ababomfi ba kwa Lesa ilelo kuti babomfyako aya maka ayakulisha? Ee! Lesa alapeela abantu bakwe umupashi wa mushilo ku kubaafwa ukumfwikisha no kucita ukufwaya kwakwe. Alapa umupashi wakwe ku balomba mu bufumacumi mwi pepo, abakwata ukukuntwa kusuma ukwa mutima, kabili abakonka fintu afwaya. (1 Abena Korinti 2:10-16) Uyu mupashi kuti wapeela abantu bashapwililika “ukucishamo kwa maka,” no kubaafwa ukubombela Lesa mu busumino te mulandu na mafya. Cine cine, abantu bonse abatiina Lesa bafwaya ukupokelela umupashi wa kwa Lesa no kutwalilila ukuba na wene.—2 Abena Korinti 4:7; Luka 11:13; Imilimo 15:8; Abena Efese 4:30.

Lesa akabomfya aya maka yakulisha nomba line ku kupwisha ulufyengo no kucula muli ici calo cabipa, muli ifyo ukushisha ishina lyakwe ilikalamba kabili ilya mushilo. Umupashi wa mushilo ukaleta ubusuma mwi sonde lyonse, kabili ifisabo fya uko fikamoneka kuli bonse, kabili ico cikapeela ubukata ku Mwine.—Abena Galatia 5:22, 23; Ukusokolola 21:3, 4.