Abacaice Bepusha Ukuti . . .

Kuti Ndecita Shani Ilyo Balempumya?

ABACAICE abacita ifintu nelyo abafwala ifyapusana na banabo pambi kuti babapumya nga nshi. Ifi e fyo caba ku bacaice Abena Kristu, ababa ne mibele iipusana ne ya bambi ilingi. Bushe Kristu talandile pa lwa bakonshi bakwe ukuti: “Nga bapakese ine, bakapakasa na imwe”?—Yohane 15:20.

Bushe ici cambukila shani abacaice Inte sha kwa Yehova? Bamo balabapumya pa mulandu wa kukanasefyako amaholide yamo yamo; bambi balabalengulula pa mulandu wa kukanapika sulupu ku mendela. Abengi balabatiinya pa mulandu wa kuti balakaana ukubomfya bubi bubi imiti ikola, pa kuba abafumacumi, na pa kukonka ifipimo fya mibele ifya mu Baibolo.

Ici cintu te cipya. E mulandu wine no mutumwa Petro aebele Abena Kristu ba mu mwanda wa mwaka uwa kubalilapo ukuti: “kabili [abena fyalo] bapapa imwe apo mwakaano kuwilamo pamo na bo . . . , kabili balamupontela.” (1 Petro 4:4) AmaBaibolo yambi yatila, “balamwinika amashina ya musaalula,” (muli Knox) nelyo ukuti, “Balamutuka.”—Muli Today’s English Version.

Bushe balikupumyapo pa mulandu wa fyo wasuminamo uko upepa? Nga balakupumya, shipa. E ko baba bambi abengi abo bapumya! Kabili walatemwa ukusambilila ifyo wingacita nga balekupumya pa mulandu wa fintu wasuminamo.

Icilenga Balepumya

Mulandu nshi bamo bapumisha abakwata ifisumino ne myendele ifyapusanako ne fyo bena bakwata? Inshita shimo abapumya ukupala abacusha, tabaicetekela. Kuti bakupumya pa mulandu wa kufwaya baleilanga ku banabo. Ilingi line aba musango yo nga bali beka kuti bafilwa nelyo kuti batiina ukukupumya.

Lubali lumbi, abapumya bamo baba nga filya fyalandile Petro ukuti, ‘balapapa.’ Ca cine kuti bapapa sana imibele yobe. Ku ca kumwenako, nga uli Nte ya kwa Yehova, bafwile balapapa kabili balafilwa ukwishiba ico ukaanina ukucitako fimo ifyampana na maholide yamo. Napamo balibabepaika fye na kuli bamo abapata Inte sha kwa Yehova.

Te mulandu ne cilenga, nga umo akweba amashiwi ayabi sana, kuti wasumina ifilanda ipinda lya mu Baibolo ilitila: “Kuli akapuuka ka kusosa ngo kulasaula kwa lupanga.” (Amapinda 12:18) Lelo ibukisha ukuti abalekupumya napamo tabalecitila ico pa mulandu wa kuti cine cine ni we bapata. Icilelenga napamo ni cilya cine ipinda lya mu Baibolo lyalandapo, “akapuuka ka kusosa.”

Nalyo line, ukupumiwa kuti kwakucena kwati bakulasa no mwele. Nalimo kuti watontonkanya na pa kusha icitetekelo pa kuti bengaleka ukukushobaula. Ni shani kanshi wingacita nga balekupumya pa mulandu wa fyo wasuminamo?

Ukuisosela

Umutumwa Petro akonkomeshe Abena Kristu ukuti: “Mube abaiteyanya pe ku kuisosela kuli onse uwingamulubulwisha pa kucetekela ukuli muli imwe, lelo asukeni no bufuuke na katiina.” (1 Petro 3:15) Ukuisosela kwa musango yo pa citetekelo cobe kupinda ukuti usambilile ukwishiba kwalungika no kumfwikisha umulandu wasuminina muli fyo fisambilisho.

Nalyo line, ufwile wasambilila ifya kulanda kuli bambi “na katiina” nelyo nga fintu Baibolo wa The Bible in Basic English alanda, “ukwabula icilumba.” Ukwishiba icine ca mu Baibolo ne fyo isambilisha takufwile kwakulenga ukuituntumba. Lelo ufwile watukuta ukuba ne mibele Paulo akwete, uwalembele pa lwa butumikishi bwakwe ati: “Naiteko busha kuli bonse, ukuti ngwikishe abengi.”—1 Abena Korinti 9:19.

Nga ulomfwa insoni sha kuisosela ifyo wacetekela, wifuupulwa. Inte sha kwa Yehova ishacaice ishingi e fyo shumfwa. Jamal atile: “Ilyo nali ku praimari, nshaishibe ifya kulondolwela bambi ico nalekaanina ukusefyako amaholide, ico nshalepikila sulupu ku mendela, nelyo fye ico nalebombela ubutumikishi bwa ku ng’anda ne ng’anda.” Cinshi camwafwile? Atila: “Batata tabalekele ukungafwilisha mpaka fye nasukile natendeka ukulondolola bwino ifi fintu, ico canengele ukwaluka apakalamba.” Nga walikwata ubwafya bwa kulondolwela bambi ifyo wasuminamo, napamo kuti waebako abafyashi nelyo umo uwakosoka mu cilonganino ca Bwina Kristu, kuti bakwafwa ukumfwikisha Icebo ca kwa Lesa.—Abena Efese 3:17-19.

Nte wa myaka 16 atile isambililo lya Baibolo ilya pa lwakwe lyalimwafwile ukupama no kutendeka ukuisosela pa sukulu. Alandilapo ati: “Kale, ilyo abo nalesambilila na bo balempumya pa mulandu wa kube Nte, nshaishibe ifya kwasuka, nomba ino nshita apo ndashimikila lyonse no kusambililako sana Baibolo, nalishiba ifya kwasuka. Ukubelenga ifipande fyonse ifipya muli bamagazini ba Ulupungu lwa kwa Kalinda na Loleni! kwalingafwa ukulaebako abanandi ba pa sukulu ifisumino fyandi.”

Ca cine, imibele ilapusanapusana. Ifilecitika nga nafipusana no kwasuka kwine kulapusana. Lelo, ilyo umo akushoba, te kuti cibe bwino ‘ukubwesesho bubi pa bubi.’ (Abena Roma 12:17-21) Nga wabwekeshamo, nangu wacenjela shani mu kwasuka, ukasonkeleshapo fye inkuni pa mulilo no kulenga balundapo ukukupumya. E mulandu wine bamo bamwena ukuti cilawamapo ukusuulako fye ilyo bakushoba.

Limo nga balanda fye ifya kusekesha, kuti caba bwino na iwe wasekako ukucila ukufulwa. (Lukala Milandu 7:9) Uulekupumya nga amona ukuti taulefulwa, nalimo kuti aleka ukukupumya.—Linganyako Amapinda 24:29; 1 Petro 2:23.

Ukusosa

Nalyo line, kuti kwaba inshita shimo ilyo mano mano wingalondololako ifyo wasuminamo. Umukashana wa myaka 13 alyesesheko ukulanda, ne fyafuminemo fyaliweme nga nshi. Ashimika ati: “Ilyo naleya ku kalasi, abana be sukulu abengi batendeke ukupumya Inte sha kwa Yehova. Natile fye kwena apa nalabebako fimo, lelo balifuminepo fye balenseka. Umukashana umo fye e washelepo, ishina lyakwe ni Jaimee. Alipilibwike no kunjeba ukuti alikwata icitabo ca Kuti Waikala Kuli Pe na pe muli Paradise Pe Sonde.a Atile alibelengamo sana muli cilya citabo kabili alefwaya ukwishibilapo na fimbi pa lwa fisumino fyesu. Nalitendeke ukusambilila nankwe Baibolo.” Apo alikoseleshiwe kuli ici cacitike, ulya mukashana Nte atendeke ukushimikilako na bambi abacaice banankwe. Atile: “Lyonse ndatandalila abana be sukulu banandi bane abafwaya ukusambilila icine kabili ndesuubila bakaba amasambililo nomba line.”

Ici nacipalanako ne cacitike imyaka imo iyapitapo ku mwana we sukulu wa ku Liberia, muno Africa. Kasuba kamo ilyo balesambilila mu kalasi, mu mucinshi alondolwele ukuti apo ni Nte ya kwa Yehova, asumina mu bubumbo, te mu kusanguka. Pa kutendeka, abasambi banankwe balemusuusha nga nshi. Lelo kafundisha amusuminishe ukulondolwela bonse mu kalasi ifyo asuminamo, lyene kafundisha alipokeleko icitabo ca Life—How Did It Get Here? By Evolution or by Creation?b

Ilyo abelengele icitabo, kafundisha aebele ikalasi ukuti: “Takwaba icitabo icingalingana ne ci. Pa fitabo fya sayansi ifyawamisha ifyo nabelengapo, ici na co cisuma sana.” Lyene kafundisha aebele ikalasi ukuti mu ciputulwa ca masomo icikakonkapo akalabomfya icitabo ca Creation capamo ne citabo balesomamo mu kalasi, kabili aebele bonse ukuti bakapokeko ifitabo ifya pa lwabo kuli ulya mwana we sukulu Inte. Alishalike ifitabo ifingi, kabili abana be sukulu abengi nomba balishibe bwino ifyasuminamo Inte sha kwa Yehova!

Icitetekelo Nga Caeshiwa E lyo Cikosa

Ca cine ukuti inshita shimo kuti watitikishiwa icibi ku mulandu no bwingi bwa balengulula nelyo ukukaanatesekesha ifya mu Baibolo fintu usambilila. (Linganyako Amalumbo 3:1, 2.) Kanshi kuti cawama ukubishanya na basumina mu fyo wasuminamo. (Amapinda 27:17) Lelo ni shani nga ca kuti pa sukulu pa mobe nelyo pa cipanda tapaba abacaice abatetekela mu fyo watetekela?

Nga cabe fyo, wilaba ukuti Cibusa obe uwakulisha ni Yehova Lesa, kabili akakutungilila. Satana Kaseebanya alyesha ukuseebanya Yehova pa mintapendwa ya myaka. E mulandu wine twingashininkishisha ukuti umutima wa kwa Yehova ulasamwa nga wabakilila icitetekelo cobe. Nga wacite co, akaasuka Satana ‘uulemuseebanya.’—Amapinda 27:11.

Ufwile waenekela ukuti inshita shimo icitetekelo cobe cikalaeshiwa. (2 Timote 3:12) Lelo umutumwa Petro atukoselesha ukuti bucishinka bwa citetekelo cesu ‘bwalifinisha ukucila golde uonaika nelyo waeshiwa ku mulilo.’ (1 Petro 1:7) Kanshi, ilyo balekupumya pa fyo wacetekela, shukila ako kashita ku kukosha icitetekelo cobe kabili shipikisha. Umutumwa Paulo alembele ukuti ‘ukushipikisha kucite mibele ya cishinka.’ (Abena Roma 5:3-5) Cine cine, ukufwaisha ukusenaminwa kuli Yehova kuti kwalenga wapampamina pa kushipikisha ilyo balekupumya pa mulandu wa fintu wacetekela!

[Amafutunoti]

[Icikope pe bula 29]

Bushe kuti waisosela ifyo wacetekela?