Icipelebesha Cakulisha Ne Cacepesha
WILLIAM BLAKE (1757-1827) atile: “Te kwesha ukwipaya icipelebesha ca bushiku nelyo icipelebesha.”
BUSHE mwalitala amutambapo icipelebesha cilepululuka? Muntu fye uushipoosako mano e ushitala aiminina no kutendeko kutambo busuma bwa ici cishishi cayemba icishakosa. Fyaba fye mpanga yonse mu misango yalekanalekana ubukulu ne mipangilwe kabili batila fyaba nalimo imisango 15,000 ukufika kuli 20,000!
Cipelebesha nshi icakulisha ico mwamonapo? Nga mwikala ku Papua New Guinea, ninshi napamo mwalimonapo icipelebesha cakulisha mwi sonde icitwa ati Queen Alexandra’s birdwing, icalepa amapindo nalimo amasentimita 28. Nga mwikala ku North America nelyo Central America, napamo mwalimonapo icipelebesha citwa Homerus swallowtail, icalepa amapindo nalimo amasentimita 15. Icipelebesha cakulisha mu Afrika citwa African giant swallowtail, icalepa amapindo ukucila pa masentimita 23.
Lelo fipelebesha nshi fyacepesha? Ni kwi fisangwa? Icitabo ca The Illustrated Encyclopedia of Butterflies, icalembwa na Dokota John Feltwell citila “napamo icipelebesha cacepesha mu calo citwa North American Pygmy blue . . . icalepa amapindo mupepi na mamilimita 15 ukufika kuli 19. Small blue e cipelebesha cacepesha ku Britain icalepa amapindo amamilimita 24.
Mu ncende ishingi mwi sonde, mwaliba mayanda baatekamo ifipelebesha muntu mwingendauka no kuleka ifi fishishi fyayemba ifya mapindo ukumwikala. Kuti mwasambilila ifingi nga nshi pa lwa ifi fibumbwa fyawamo kutamba na pa bumi bonse ubwa fiko, ukutula pa fyo fitotwa mu lini no kusanguke fishimu no kube fyana ukufikila fyabe fipelebesha ifikulu. E co bushiku bumo ilyo mukamona icipelebesha cilepupuka, mukatale mukeminine no kucitamba no kusunguka pa lwa cene. Cintu mukalatamba cipapwa icikulu atemwa icinono.
[Icikope pe bula 24, 25]
Icipelebesha cakulisha icitwa “Queen Alexandra’s birdwing” ne cacepesha icitwa “North American pygmy blue” (ifi fine e fyo fimoneka ubukulu)
[Abatusuminishe]
Ifipelebelesha: Allyn Museum of Entomology, Florida Museum of Natural History