Amasambililo Ayakatwalilila Umuyayaya
Mu 1924, Thomas Tiplady atile: “Baibolo e citabo cawamisha ica butungulushi mu bwikalo bwa muntu.”
TE MALANDA kanwa fye ukulanda ukuti ukusambilila Baibolo kuti kwayalula imikalile ya bantu. Yalenga imikalile ukuwama no kuleta isubilo ku bapita mu macushi yene yene no kupelelwa. Nyina umushimbe uwa ku calo ca Namibia alembele ku maofeshi ya Nte sha kwa Yehova aya ku South Africa ukuti:
“Ndi ne myaka 29 kabili nabelengele icitabo ca Ifipusho Abacaice Bepusha—Ifyasuko Fibomba mu nshiku fye shibili. Calimpitile ku mutima pantu nalitalalilwa icine cine. Umwaume naleikala nankwe afwile mu busanso bwa muli motoka no kunsha na bana abanono babili. Ine pamo na bana tulecula sana. Limo naletontonkanya ukwipaya abana e lyo na ine ukuipaya. Lelo ilyo nabelengele ici citabo, nalilekele ukutontonkanye fyo. Ndelomba ukunsambilishako Baibolo apa fye.”
Baibolo citabo icingatungulula umuntu mu mikalile yonse pano calo, ifya kumfwana na balupwa, aba ku ncito, na bantu twikala na bo. (Amalumbo 19:7; 2 Timote 3:16) Ilafunda bwino ifya kukonkelela ubusuma no kutaluka ku bubi. Citabo icishifisa nelyo kamo pa lwa mikalile ya bantu. Ilyo mulebelenga, mukasangamo amalyashi ya bantu abengi abaliko kale. Mukamona icalengele bamo ukwikala ne nsansa no kusanga ubusuma e lyo bambi na bo mukamona ifyabaletele ukukalipwa ne nkumbabulili. Mukeshiba bwino ifisuma ne fyabipa.
Amasambililo Ayakatwalilia Umuyayaya E ko Yali na Ndakai Line
Baibolo ilakomaila pa kukwata amano yene yene. Itila: “Ukutendeka kwa mano—nonka amano.” (Amapinda 4:7) Ilalanda no kuti abantunse ilingi line balabulwa amano, e mulandu wine ikonkomesesha ati: “Nga umo uwa muli imwe abulwa amano, alombe kuli Lesa uupeela fye kuli bonse.”—Yakobo 1:5.
Ni shani Kalenga wesu, Yehova Lesa apeela amano kuli bonse? Apeelela mu Cebo cakwe, Baibolo, iyo atukoselesha ukubelenga. Lesa atukonkomesha ukuti: “We mwana wandi, nga wapokelele fyebo fyandi, na mafunde yandi wabika, ku kupeepeko kutwi kobe ku mano . . . ; e lyo uleiluka akatiina ka kuli Yehova, no kwishiba Lesa ukakusanga. Pantu Yehova e upeela amano.” (Amapinda 2:1, 2, 5, 6) Ilyo tukonka ukufunda kwa mu Cebo ca kwa Lesa no kumona ifyo kubomba, tuleluka ukuti cine cine mwaba amano ya bulesa.
Ku ca kumwenako, tontonkanyeni pa fyo umuntu engacita nga mupiina. Baibolo icincisha abantu ukuba abakampuka ku milimo kabili isoka no kutaluka ku misango yonaula umuntu ne fikwatwa fyakwe. Kanshi imisango yabipa iyapala ukupeepa fwaka na bucakolwa fyena fyalipusana sana ne funde lya mu Baibolo.—Amapinda 6:6-11; 10:26; 23:19-21; 2 Abena Korinti 7:1.
Ni shani pa lwa fyo imibele ya bantu tubishanya na bo ingatukuma mu mikalile yesu? Baibolo itila: “Enda na ba mano e lyo ukabo wa mano, lelo uucito bunabo ku bawelewele akacula.” (Amapinda 13:20) Bushe mwalimona ukuti ukukonkelesha abakubishanya na bo ilingi line kwalilenga abengi, abaice nelyo fye bakalamba, ukusanguka bacakolwa, ababomfya bubi bubi imiti ikola, nelyo bacilalelale? Cine cine nga tulebishanya na bacita ifi fintu ne fwe bene kuti twaba nga bene, nga fintu fye na Baibolo isosa ukuti: “Ukubishanya kubi konaule mibele isuma.”—1 Abena Korinti 15:33.
Kwena ca cine ukuti bonse tufwaya ukuba ne nsansa. Lelo kuti twakwata shani insansa? Bushe mwalishiba ukuti Baibolo ilanda ukuti icilenga sana tukwate nsansa te fintu twakwata lelo, mibele ya mutima na bucibusa kuli bambi, na kucilisha bucibusa bwesu na Lesa? (1 Timote 6:6-10) Yesu Kristu, mu Lyashi lyakwe ilyalumbuka ilya pa Lupili, atile aba nsansa icine cine bantu “abaibukila ulwa kukabila kwabo ukwa ku mupashi,” (NW) “abafuuka,” “abali ne cilaka ca bulungami,” “aba luse,” “abasanguluke mitima,” na “bacito mutende.”—Mateo 5:1-9.
Nga mwatontonkanya sana pa fisambilisho fya mu Baibolo, mukomfwikisha ifyo fingatutungulula mu mikalile yesu. Apo e mufuma ukupanda amano, Baibolo citabo caibela. Ukufunda kwa iko lyonse kulaleta ubusuma. Te kwa malanda kanwa fye iyo, kabili takutwala ku bubi nangu bumo. Abacita ifyo Baibolo ipanda amano lyonse fye balasangamo ubusuma.
Amasambililo Ayakatwalilila Umuyayaya
Nalyo line, ukulunda pa kusangamo ubusuma pali ndakai, Baibolo itupeela ne subilo lya mweo ku ntanshi. Itweba ukuti kukaba ukusangulula isonde icine cine no kulyalula umushi wayemba nga nshi uwa babombela Lesa. Umfweni aya mashiwi ayasuma nga nshi ayakafikilishiwa ku ntanshi: “Moneni, ubwikalo bwa kwa Lesa buli pamo na bantu, kabili akekalilila pamo na bo; na bo bakaba abantu bakwe, na Lesa umwine akaba pamo na bo: kabili akafuute filamba fyonse ku menso yabo, ne mfwa tayakabeko kabili iyo; takwakabe kabili ukuloosha nangu kukuuta nangu kucululuka; pa kuti ifya ntanshi nafiya.”—Ukusokolola 21:3, 4; Amapinda 2:21, 22.
Shi taleni tontonkanyeni: Takuli na kabili abana abalelwalilila, takuli na kabili ifipowe, takuli na kabili amalwele yatompola abantu mibili, takuli na kabili ukukalipwa! Ifilamba fya kufulunganishiwa, ukulengwe nsoni, no bulanda, fyonse ifi fikapwa, pantu ifilenga ukuti ifi fyonse fibeko fikalulwa nelyo ukufumishiwapo. Apo abantu ababifya ku mufulo bakonaulwa kuli bamalaika ba kwa Lesa, abapuupu, inkomi sha bantu, aba bufi, na bonse abafulunganya imikalile tabakabeko. Abantu bakakuula amayanda yabo no kuikalila na ku matwi tondolo.—Esaya 25:8, 9; 33:24; 65:17-25.
Bushe ifi fyaumfwika bwino kuli imwe? Bushe kuti mwatemwa ukwishibilapo na fimbi pa lwa kukonka amafunde ya mu Baibolo pa kuti mukasangemo ubusuma pali ino nshita na ku ntanshi? Nga kuti mwatemwa, shi ebeni Inte sha kwa Yehova, kabili bakatemwa sana ukusambilila na imwe no lupwa lwenu “amasomo ayakatwalilila umuyayaya” ayalesambililwa mu calo conse.