Bushe Bonse Kuti Baikala Ukwabula Ukulwala?

BUSHE mulafwaya ukuti imwe no lupwa lwenu mwilalwala? Ukwabula no kutwishika e co mufwaisha. Lelo nangu ca kuti fwe bengi tulwalako fye mu nshita mu nshita, abantu abengi nga nshi balalwala icabipisha ica kuti tabapola.

Nalyo line, kuli ukubombesha kwa kucefyanyako amalwele. Nga fintu tulemona akabungwe ka World Health Organization (WHO), akaba United Nations kalebomba. Pa cilonganino ba WHO bateyenye mu 1978, abeminishi ukufuma mu fyalo 134 na mu tubungwe 67 utwa ba United Nations basumine ukuti ukwikala umutuntulu takufwile fye ukupelela pa kukanalwala. Batile, ukuba umutuntulu, “kukanaumfwapo nangu kamo akakukalipa mu mubili, mu muntontonkanya no kwikala bwino na bantu.” Lyene aba beminishi basuminishenye ukubilisha ukuti ukwikala ukwabulo kulwala “ni nsambu shikabilwa ku muntu onse”! Ukukonka pali uku kubilisha ba WHO batile bafwile “ukufika pa cipimo cimo ica kulenga abantu ba mwi sonde lyonse ukukanalwala.”

Ubu buyo busuma kabili bwa mano. Lelo bushe cilemoneka ukuti bukafikwapo? Muli fyonse ifyo umuntu atukuta ukucita, umulimo wa kundapa e wacetekelwa sana no kulumbanishiwa. Ukulingana ne nyunshipepala ya bena Britain iya The European, abantu ba mu fyalo ifikankaala babelesha “ukundapa batila ukwa cisungusho: e kuti ukunwa fye akabulungwa ka muti no bulwele bwapwa.” E kutila ku bulwele bonse, twenekela aba ku fipatala ukwangalapo fye pa bulwele. Bushe incenshi sha fya cipatala kuti shacita icintu ca musango yo?