“Ubushiku Tusansamuka Sana mu Bumi Bwesu”
INSHITA ya bwinga ni nshita ya kusekelela. Abengi abaupana balisosa ati: “E bushiku twasansamwike sana.” Lelo, bukabila no kubombesha. Nabwinga na shibwinga, pamo na balupwa wabo kuti bafunshika nga nshi pa mulandu wa fya kupingulapo ne fya kupekanyapekanya ifikabilwa, na pa mulandu fye wa bantu abengi abo baba nabo pali bulya bushiku.
Ubwinga ni ntendekelo ya mikalile ipya ku baupana. Lelo, te baalula fye imikalile. Apo umwana mwanakashi, no mwana mwaume, inkashi, nelyo munyina nga aupwa nelyo ukupa, ilingi atendeka ukuikalila, aba mu lupwa balatemwa no kumfwa ububi pa nshita imo ine.
Ificitwa pa bwinga filapusanapusana ukulingana ne fyalo, kabili te kuti tukumemo ukulanda pali fyonse. Ifi fipande fyalalanda sana pa ficitwa mu Fyalo fya basungu na mu fyalo fimbi ifyapalako. Kulya pa kuupwa nelyo ukuupa palapooswa indalama ishingi. Bamo bapoosa indalama ishingi nga nshi pa fikabilwa pa bushiku bwa bwinga, ukusanshako ne sha kwashimina icikuulwa umwa kusefesha ubwinga no kupekanya ifya kulya. Batila mu Italy pa bwinga kuti papooswa indalama napamo ukucila pali K38,000,000. Mu Japan, nga mu fyalo fimbi, indalama shilacila pali ishi. Ilingi shibwinga na nabwinga te balipila ishi ndalama. Bafyashi babo.
Aba makwebo balamwenamo indalama ishingi sana mu menga. Utwampani utwingi tucincisha abantu ukupisha ubwinga “ubushaiwamina,” apashibulila nangu cimo. Basosa ati “ubu e bushiku bwa kusansamuka sana mu bumi bobe!” E co basabankanya ifingi ifyo bafwaya mwashita, pamo ne fya kumucitila kabili batila filakabilwa nga ulefwaya ubushiku bobe ubukalamba ukuwama sana. Kuti kwaba amakardi ya kulalikilapo abantu ku bwinga, ica kufwala “cishaiwamina,” ica kwa nabwinga, ne fya nshindishi, na masuti ya kwa shibwinga ne nshindishi. Kwaba na maluba, bamotoka balulumbi, napamo no kwashima umwa kuliila, uwa kukopa, ibumba lya bakemba na fimbi. Ifyo nabwinga na shibwinga bengakabila, pamo ne ndalama shipooswapo kuti fyatiinya bashibo.
Mu ncende ishingi balapoosa sana amano ku kukonka ifishilano. Kwaba inshila yapampamikwa iya kucitilamo ifintu, kabili benekela nabwinga na shibwinga ukukonka ifyo fine. Ca cine, fingi bakabila ukwibukisha, lelo kuba fye inshita inono iya kupekanya fyonse.
Bushe cintu mwingenekela ukuwama nelyo ukubipa? Te mulandu ne fyo mwayasuka, ukwetetula pali fyonse ifikabilwa pa bwinga kulenga amepusho ayengi. Bushe ukuupwa kwalola mwi muno nshiku? Bushe cine cine ifi fyonse filakabilwa pa kuti cimoneke ukuti “nauupwa bwino”?
Bushe kuti nacimfya shani amafya yabako pa kupekanya e lyo na masakamika?
Nangu line balafunshika, abengi balipekanya bwino ubwinga bwabo kabili baliipakishe ilya nshita. Ifyo bacitile kuti fyaafwa bambi abalepekanya ubwinga. Na kabili kwaba ifishinte fya mu Baibolo ifingafwa ilyo mulepekanya ubwinga, pa kuti bulya ubushiku bwaisawama, bwaba ubwa nsansa, kabili ubwa kukulilila kuli bonse.