Ukulingana na Baibolo

Bushe Abena Kristu Balingile Ukwenekela Lesa Ukubacingilila?

Baibolo ilingi line ilalanda pa maka ya kwa Lesa aya kucingilila bakapepa bakwe ukuti beponenwa na masanso. Imfumu Davidi yatile: “Mpokololeni, mwe Yehova, ku muntu mubi, nindeni ku muntu wa lufyengo.” (Amalumbo 140:1) Lelo, bakapepa ba kwa Lesa abengi abakumanyapo ulukaakala, imisoka, nelyo amasanso yalengwa ne fyabumbwa pe sonde bapusuka fye kwempe ku mfwa nelyo ukucenwa. Bamo balatontonkanya nampo nga Lesa alibapuswishe mu cipesha amano pa nshita sha musango yo, maka maka apo kwaliba inshita shimbi ilyo abantu batiina Lesa bashapusuka lelo baliponenwa na masanso yabipisha, nelyo fye ukufwa imfwa ibi.

BUSHE Yehova Lesa alacingilila abantu bamo ku masanso bambi bena iyo? Bushe tufwile ukwenekela ukupokololwa mu cipesha amano ku lukaakala na masanso yambi lelo?

Ukucingilila kwa Cipesha Amano Ukwaba mu Baibolo

Mu Baibolo mwalembwa amalyashi ayengi ayalanda pa fyo Lesa apokolwele bakapepa bakwe mu cipesha amano. (Esaya 38:1-8; Imilimo 12:1-11; 16:25, 26) Amalembo yashimika ne fyo ababomfi ba kwa Yehova inshita shimbi bashapusushiwe ku kayofi. (1 Ishamfumu 21:1-16; Imilimo 12:1, 2; AbaHebere 11:35-38) Kanshi, Yehova nga alefwaya kuti apingulapo ukucingilila bamo pa mulandu waibela nelyo ubufwayo. E ico, ilyo Abena Kristu bamo bashipokolwelwe ku fya kwesha, tabalingile ukutontonkanya ukuti Lesa nabalekelesha? Tufwile ukwishiba ukuti ifintu fyabipa kuti fyacitika, no kucitikila fye ababomfi ba kwa Yehova aba busumino. Mulandu nshi cabele fyo?

Umulandu Ifintu Fyabipa Ficitikila Ababomfi ba kwa Lesa aba Busumino

Umulandu umo wa kuti ifwe bonse twapyene ulubembu no kukanapwililika kuli Adamu na Efa. Kanshi, kuti twakalipwa, ukucululuka, no kufwa. (Abena Roma 5:12; 6:23) Umulandu na umbi wa kuti tuleikala mu nshiku sha kulekelesha. Baibolo ilondolola ukuti abantu mu nshiku shesu baba “abaumalala, abatalama, aba lwambo, ababulo kuiteka, abankalwe; . . . abashatemwa busuma.” (2 Timote 3:1-5) Ubushininkisho bwa ici bwaba kufulisha kwa kulaalana kwa kwikata kama, ukwiba abantu, ukwipaya, ne misoka imbi iya bukatu.

Ababomfi ba kwa Lesa aba busumino abengi bekala no kubomba na bantu ba lukaakala kabili inshita shimo balasanswa. Napamo kuti twaba mu mibele ingatwipaisha pa mulandu fye wa kuti ukwabula ukwenekela twasangwa ku cifulo cimo pa nshita ishiyene. Kabili ificitika fimo filanga bucine bwa mashiwi ya kwa Solomone ilyo alondolwele ati “inshita ne ca mankumanya fiponena kuli bonse bene.”—Lukala Milandu 9:11.

Kabili umutumwa Paulo alondolwele ukuti Abena Kristu bali no kupakaswa pa mulandu wa kupepa Lesa. Atile: “Awe na bonse abalefwayo kwikala umwabela bukapepa muli Kristu Yesu bakapakaswa.” (2 Timote 3:12) Mu myaka ya nomba line, e fyo caba mu fyalo ifingi.

Kanshi, abatiina Lesa na bo kuti baponenwa no lukaakala, imisoka, amasanso yalengwa ne fyabumbwa pe sonde, nelyo fye imfwa yabulo kwenekela. Satana alyesha ukubomfye ci ku kweba Yehova ukuti alacingilila abantu Bakwe pa kuti belaponenwa na masanso. (Yobo 1:9, 10) Te fyo caba. Lelo, kuti twashininkisha ukuti na lintu Yehova ashipokolwele abantu bakwe mu cipesha amano, alabacingilila.

Ifyo Yehova Acingilila Abantu Bakwe Lelo

Ukupitila mu Cebo cakwe, Yehova alatungulula abantu bakwe ne co cilabacingililako. Bumupashi no kwishiba kwaba mu Baibolo kuti fyalenga umuntu aishiba ifya kupingula no kuba uwatekanya, ifingatwafwa ukusengauka ifilubo fishalinga e lyo no kutwafwa ukupingula mano mano. (Amalumbo 38:4; Amapinda 3:21; 22:3) Ku ca kumwenako, ukuumfwila ukupanda amano kwa mu Baibolo pa lwa bucisenene, ubufunushi, ubukali, no lukaakala kwalipususha Abena Kristu ku macushi ayengi. Na kabili, pa kukanabishanya na babi, napamo teti tusangwe uko akayofi kengacitikila—e kuti ukusangwa ukwabula ukwenekela ku cifulo cimo pa nshita ishiyene. (Amalumbo 26:4, 5; Amapinda 4:14) Abakonka ifishinte fya Baibolo mu mikalile yabo balaba ne mikalile yawamisha, ilingi line cilenga baba abatuntulu sana mu mano na lwa ku mubili.

Ica kusansamusha sana ca kuti nangula Lesa asuminisha ifintu fibi ukucitika, akapeela bakapepa bakwe ubukose bukabilwa pa kuti bashipikishe. Umutumwa Paulo atulaya ukuti: “Wa cishinka Lesa, uushakamuleke ukweshiwa ukucila muli ico mwinganasha; lelo pamo ne ca kwesha akacita na pa kufuminamo, ukuti mube na maka ya kucishipikishako.” (1 Abena Korinti 10:13) Baibolo yatulaya no “kucishamo kwa maka” ku kutwafwa ukushipikisha amasanso.—2 Abena Korinti 4:7.

Lesa Acita Ukulingana no Kufwaya Kwakwe

Bushe Abena Kristu bafwile ukwenekela Lesa ukubapokololako mu cipesha amano lyonse ilyo ubusanso bulepalama? Baibolo taisuminisha ukwenekela kwa musango yo.

Kwena, Yehova Lesa kuti asala ukupokolola umubomfi wakwe uuli onse mu kulungatika. Kabili nga ca kuti umo acetekela ukuti ni Lesa wamupususha ku busanso, talingile ukulengululwa. Lelo ilyo Yehova asala ukukanapokolola, tacilingile ukumonwa ukuti ninshi tabekelwa muli uyo muntu.

Shi natucetekele ukuti te mulandu ne ca kwesha nelyo ubwafya tukaponenwa na bo, Yehova akapekanya ubucingo bwakwe ku babomfi bakwe aba busumino, atemwa ukupitila mu kufumyapo ico cintu, nelyo ukutupeela amaka ya kushipikisha nangu, nga twafwa, ukupitila mu kutubuusha no kutupeela umweo wa muyayaya mu calo cakwe icipya.—Amalumbo 37:10, 11, 29; Yohane 5:28, 29.